المستدرك على الصحيحين

سیدنا عبایہ بن رفاعہ سے روایت ہے کہ سیدنا عمر رضی اللہ عنہ کو یہ خبر پہنچی کہ جب سیدنا سعد رضی اللہ عنہ نے محل تعمیر کیا تو کہا: ”اب (عام لوگوں کا) شور و غل «الصُّوَيت» منقطع ہو گیا“، تو انہوں نے ان کی طرف محمد بن مسلمہ کو بھیجا... اور اس کے آخر میں ہے کہ سیدنا عمر رضی اللہ عنہ نے فرمایا: ”میں نے یہ پسند نہیں کیا کہ میں تمہیں (ایسا) حکم دوں جس میں تمہارے لیے تو آسانی ہو اور میرے لیے تنگی، حالانکہ میرے ارد گرد اہل مدینہ کو بھوک نے نڈھال کر رکھا ہے، اور میں نے رسول اللہ ﷺ کو یہ فرماتے سنا ہے: ”آدمی اپنے پڑوسی کو چھوڑ کر اکیلا سیر نہیں ہوتا“۔

سیدہ عائشہ رضی اللہ عنہا سے روایت ہے، میں نے عرض کیا: یا رسول اللہ! میرے دو پڑوسی ہیں، میں (ہدیہ دینے کی) ابتدا کس سے کروں؟ آپ ﷺ نے فرمایا: ”جس کا دروازہ تم سے زیادہ قریب ہو“۔

سیدہ عائشہ رضی اللہ عنہا سے روایت ہے، میں نے عرض کیا: یا رسول اللہ! میرے دو پڑوسی ہیں، میں ان میں سے کس کو ہدیہ دوں؟ آپ ﷺ نے فرمایا: ”جس کا دروازہ تم سے زیادہ قریب ہو“۔
یہ حدیث شیخین کی شرط پر صحیح ہے، کیونکہ طلحہ بن عبداللہ بن عوف ان راویوں میں سے ہیں جن کی روایت پر شیخین کا اتفاق ہے۔

سیدنا ابوموسیٰ اشعری رضی اللہ عنہ سے روایت ہے کہ رسول اللہ ﷺ نے فرمایا: ”تم اس وقت تک مومن نہیں ہو سکتے جب تک ایک دوسرے سے محبت نہ کرنے لگو، کیا میں تمہیں وہ بات نہ بتاؤں جس سے تم آپس میں محبت کرنے لگو گے؟“ صحابہ نے عرض کیا: کیوں نہیں یا رسول اللہ! آپ ﷺ نے فرمایا: ”آپس میں سلام کو عام کرو، تم میں محبت پیدا ہو جائے گی؛ اور اس ذات کی قسم جس کے قبضے میں میری جان ہے! تم جنت میں داخل نہیں ہو گے یہاں تک کہ تم ایک دوسرے پر رحم کرو“، صحابہ نے عرض کیا: یا رسول اللہ! ہم سب رحم دل ہیں، آپ ﷺ نے فرمایا: ”اس سے مراد صرف تمہاری اپنی (خصوصی) رحمت نہیں بلکہ عام مخلوق پر رحم کرنا ہے، عام مخلوق پر رحم کرنا ہے“۔
یہ حدیث صحیح الاسناد ہے لیکن شیخین نے اسے روایت نہیں کیا۔