المستدرك على الصحيحين

سیدنا عبداللہ بن عمرو رضی اللہ عنہما سے روایت ہے کہ انہوں نے اسے نبی کریم ﷺ سے مرفوعاً بیان کیا کہ آپ ﷺ نے فرمایا: ”رحم کرنے والوں پر رحمن رحم فرماتا ہے، تم زمین والوں پر رحم کرو آسمان والا تم پر رحم فرمائے گا، رشتہ داری (رحم) رحمن کی ایک شاخ ہے، پس جس نے اسے جوڑا اس نے (اللہ کے تعلق کو) جوڑ لیا اور جس نے اسے توڑا اللہ اسے کاٹ دے گا۔“
امام حاکم فرماتے ہیں: یہ تمام اسانید صحیح ہیں، میں نے صحابہ کے تذکرے کے ساتھ ان کی اسانید کی پوری تحقیق اس لیے کی ہے تاکہ کوئی یہ وہم نہ کرے کہ شیخین نے صحیح احادیث کو نظر انداز کر دیا ہے۔

سیدنا عبداللہ بن مسعود رضی اللہ عنہ سے روایت ہے، انہوں نے کہا: میں نبی کریم ﷺ کی خدمت میں حاضر ہوا جبکہ آپ ﷺ چمڑے کے ایک سرخ خیمے میں تقریباً چالیس آدمیوں کے ساتھ تشریف فرما تھے، آپ ﷺ نے فرمایا: ”تمہارے لیے (فتوحات کے) دروازے کھول دیے گئے ہیں، تمہاری مدد کی جائے گی اور تم مالِ غنیمت پاؤ گے، پس تم میں سے جو اس دور کو پائے اسے چاہیے کہ اللہ سے ڈرے، نیکی کا حکم دے، برائی سے روکے اور صلہ رحمی کرے؛ اور اس شخص کی مثال جو اپنی قوم کی ناحق معاملے میں مدد کرتا ہے اس اونٹ جیسی ہے جو (کنویں میں) گر رہا ہو اور وہ (اسے بچانے کے لیے) اس کی دم پکڑ کر کھینچ رہا ہو (مطلب یہ کہ وہ اسے ہلاکت سے نہیں بچا سکتا)۔“
یہ حدیث صحیح الاسناد ہے لیکن شیخین نے اسے روایت نہیں کیا۔

قاسم بن مخول بہزی اپنے والد سے روایت کرتے ہیں، انہوں نے عرض کیا: یا رسول اللہ! مجھے وصیت فرمائیے، آپ ﷺ نے فرمایا: ”نماز قائم کرو، زکوٰۃ ادا کرو، رمضان کے روزے رکھو، بیت اللہ کا حج اور عمرہ کرو، اپنے والدین کے ساتھ حسنِ سلوک کرو، صلہ رحمی کرو، مہمان کی تواضع کرو، نیکی کا حکم دو، برائی سے روکو اور جہاں بھی حق ہو اسی کے ساتھ رہو۔“
یہ حدیث علمائے یمن کے نزدیک صحیح الاسناد ہے لیکن شیخین نے اسے روایت نہیں کیا۔

سیدنا عبداللہ بن سلام رضی اللہ عنہ سے روایت ہے، انہوں نے کہا: جب رسول اللہ ﷺ (مدینہ منورہ) تشریف لائے تو لوگ آپ کی طرف دوڑے، اور کہا گیا کہ رسول اللہ ﷺ تشریف لے آئے ہیں، میں بھی لوگوں کے ساتھ آپ ﷺ کو دیکھنے کے لیے گیا، پھر جب میں نے رسول اللہ ﷺ کے چہرہ مبارک کو غور سے دیکھا تو میں پہچان گیا کہ یہ چہرہ کسی جھوٹے کا نہیں ہو سکتا، آپ ﷺ نے سب سے پہلی بات جو ارشاد فرمائی وہ یہ تھی: ”اے لوگو! سلام کو رواج دو (عام کرو)، کھانا کھلاؤ، صلہ رحمی کرو اور رات کو اس وقت نماز پڑھو جب لوگ سو رہے ہوں، تم سلامتی کے ساتھ جنت میں داخل ہو جاؤ گے۔“
یہ حدیث صحیح الاسناد ہے لیکن شیخین نے اسے روایت نہیں کیا۔

سیدنا ابوہریرہ رضی اللہ عنہ سے روایت ہے، انہوں نے عرض کیا: یا رسول اللہ! جب میں آپ کو دیکھتا ہوں تو میرا جی خوش ہو جاتا ہے اور میری آنکھیں ٹھنڈی ہو جاتی ہیں، پس مجھے ہر چیز کے بارے میں بتائیے، آپ ﷺ نے فرمایا: ”ہر چیز پانی سے پیدا کی گئی ہے“، وہ کہتے ہیں کہ میں نے عرض کیا: مجھے کسی ایسے عمل کے بارے میں بتائیے جسے کرنے سے میں جنت میں داخل ہو جاؤں، آپ ﷺ نے فرمایا: ”سلام کو عام کرو، کھانا کھلاؤ، صلہ رحمی کرو اور رات کو اس وقت (عبادت کے لیے) کھڑے ہو جب لوگ سو رہے ہوں، پھر سلامتی کے ساتھ جنت میں داخل ہو جاؤ۔“
یہ حدیث صحیح الاسناد ہے لیکن شیخین نے اسے روایت نہیں کیا۔

سیدنا عبداللہ بن عباس رضی اللہ عنہما سے روایت ہے کہ نبی کریم ﷺ نے فرمایا: ”تورات میں لکھا ہے: جسے یہ بات پسند ہو کہ اس کی زندگی لمبی ہو اور اس کے رزق میں اضافہ کر دیا جائے، اسے چاہیے کہ وہ صلہ رحمی کرے۔“
یہ حدیث اس سیاق کے ساتھ صحیح الاسناد ہے لیکن شیخین نے اسے روایت نہیں کیا، انہوں نے صرف یونس بن یزید کی زہری سے اور انہوں نے سیدنا انس سے روایت کردہ حدیث پر اتفاق کیا ہے۔