المستدرك على الصحيحين

مصعب بن عبداللہ زبیری سے روایت ہے کہ ابو ہاشم بن عتبہ بن ربیعہ بن عبد شمس بن عبدمناف (ان کا نسب ہے)، ان کی والدہ خناس بنت مالک بن مضرب بن حجیر بن عبد بن معصی بن عامر بن لوی تھیں، ان کی ایک آنکھ جنگِ یرموک میں ضائع ہو گئی تھی، اور ابو ہاشم کی وفات حضرت معاویہ رضی اللہ عنہ کے زمانہ میں ہوئی۔

کہیل بن حرملہ سے روایت ہے کہ سیدنا ابوہریرہ رضی اللہ عنہ دمشق آئے اور ابوکلثوم سدوسی کے ہاں قیام فرمایا، ہم ان کے پاس حاضر ہوئے اور ہمارے درمیان صلاۃِ وسطیٰ (درمیانی نماز) کے بارے میں تذکرہ ہوا تو اس میں ہمارا اختلاف ہو گیا، ابوہریرہ رضی اللہ عنہ نے فرمایا: تمہاری طرح ہمارا بھی اسی وقت اختلاف ہوا تھا جب ہم رسول اللہ ﷺ کے گھر کے سامنے صحن میں موجود تھے، ہم میں ایک صالح شخص ابو ہاشم بن عتبہ بن ربیعہ بھی موجود تھے، وہ اٹھے اور رسول اللہ ﷺ کی خدمت میں حاضر ہوئے کیونکہ وہ آپ ﷺ کے سامنے (سوال کرنے میں) دلیر تھے، پھر وہ باہر تشریف لائے اور ہمیں بتایا کہ اس سے مراد نمازِ عصر ہے۔

ابووائل سے روایت ہے کہ حضرت معاویہ رضی اللہ عنہ (اپنے ماموں) ابو ہاشم بن عتبہ کے پاس گئے جبکہ وہ رو رہے تھے، انہوں نے پوچھا: اے ماموں! آپ کیوں رو رہے ہیں؟ کیا کسی درد کی وجہ سے یا دنیا (چھوٹنے) کے غم میں؟ انہوں نے جواب دیا: ان میں سے کوئی بات نہیں، بلکہ رسول اللہ ﷺ نے مجھ سے ایک عہد لیا تھا جس پر میں قائم نہ رہ سکا، آپ ﷺ نے مجھ سے فرمایا تھا: ”اے ابوہاشم! عنقریب تمہیں وہ مال و دولت میسر آئے گا جو لوگوں کو دیا جاتا ہے۔“