المستدرك على الصحيحين

ابراہیم بن اسحاق حربی سے روایت ہے کہ ابو العاص بن ربیع رسول اللہ ﷺ کی صاحبزادی سیدہ زینب رضی اللہ عنہا کے شوہر اور ان کے خالہ زاد تھے، ان کی والدہ ہالہ بنت خویلد سیدہ خدیجہ رضی اللہ عنہا کی بہن تھیں، اور ابوالعاص کا (اصل) نام مہشم تھا، انہیں ”جرو البطحاء“ کا لقب دیا گیا تھا، سیدہ زینب رضی اللہ عنہا سے ابو العاص کے دو بچے علی اور امامہ پیدا ہوئے، ابوالعاص کی وفات سنہ 11 ہجری میں حضرت ابوبکر رضی اللہ عنہ کی خلافت کے دوران ہوئی۔

سیدنا ابن عباس رضی اللہ عنہما سے روایت ہے کہ رسول اللہ ﷺ نے سیدہ زینب رضی اللہ عنہا کو ابو العاص کے پاس پہلے نکاح ہی پر لوٹا دیا تھا اور ان کے درمیان کسی نئے نکاح کا اضافہ نہیں کیا تھا۔
یہ اسناد امام مسلم کی شرط پر صحیح ہے۔

سیدنا عبداللہ بن عمرو بن عاص رضی اللہ عنہما سے روایت ہے، انہوں نے کہا کہ سیدہ زینب رضی اللہ عنہا اپنے شوہر ابوالعاص سے ایک سال پہلے ایمان لائی تھیں، پھر جب ابوالعاص ایمان لائے تو نبی کریم ﷺ نے انہیں (زینب کو) نئے نکاح کے ساتھ ان کے پاس لوٹایا۔