المستدرك على الصحيحين

محمد بن عبد اللہ بن نمیر سے روایت ہے کہ سیدنا حسان بن ثابت انصاری رضی اللہ عنہ کی وفات سیدنا معاویہ رضی اللہ عنہ کے دورِ امارت میں پچپن ہجری میں ہوئی۔

سیدنا حسان بن ثابت رضی اللہ عنہ کے راوی حرملہ سے روایت ہے، انہوں نے کہا: میں حسان کی خدمت میں حاضر ہوا اور عرض کیا: ”اے ابوالحسام (تیز دھار تلوار والے)۔“

سیدنا حسان بن ثابت رضی اللہ عنہ سے روایت ہے، انہوں نے فرمایا: اللہ کی قسم! میں اس وقت سات یا آٹھ سال کا ایک سمجھدار بچہ تھا اور جو سنتا تھا اسے یاد رکھتا تھا، میں نے ایک یہودی کو یثرب میں اپنے قلعے کے اوپر سے چیختے ہوئے سنا: ”اے گروہِ یہود!“ جب وہ جمع ہو گئے تو انہوں نے پوچھا: تیرا برا ہو، تجھے کیا ہوا ہے؟ اس نے کہا: ”اس نبی کا ستارہ طلوع ہو چکا ہے جس نے آج کی رات مبعوث ہونا ہے۔“

سعید بن عبد الرحمن بن حسان بن ثابت سے روایت ہے کہ ہمارے پردادا حرام ابوالمنذر نے ایک سو بیس سال زندگی پائی، ان کے بیٹے منذر بن حرام نے ایک سو بیس سال، ان کے بیٹے ثابت بن منذر نے ایک سو بیس سال اور ان کے بیٹے سیدنا حسان بن ثابت رضی اللہ عنہ نے بھی ایک سو بیس سال عمر پائی، جب حسان کی وفات کا وقت قریب آیا تو انہوں نے آگ روشن کی اور اپنے قبیلے کو جمع کر کے یہ شعر پڑھا: ”یقیناً وہ شخص جو صبح و شام لوگوں کے شر سے محفوظ رہا وہ سعادت مند ہے سوائے اس کے جس نے خود کوئی گناہ کیا ہو۔“ ان کے بعد ان کے بیٹے عبد الرحمن بن حسان بن ثابت اسی برس سے کچھ اوپر زندہ رہے، جب ان کا آخری وقت آیا تو انہوں نے آگ روشن کر کے قبیلے کو جمع کیا اور یہ شعر پڑھا: ”بے شک وہ شخص جس نے مال و دولت تو حاصل کر لی مگر اپنے فضل و کرم سے اپنے کسی دوست کا بھلا نہ کیا وہ بڑا ہی ناشکرا ہے۔“ ان کے بعد ان کے بیٹے سعید بن عبد الرحمن بن حسان بن ثابت اسی 80 برس سے کچھ زائد جئے اور وفات کے وقت یہ شعر کہا: ”بے شک وہ شخص جس کی دنیا ہی اس کا سب سے بڑا غم بن جائے وہ دنیا کی دھوکے کی رسی کو تھامے ہوئے ہے۔“

سیدہ عائشہ رضی اللہ عنہا سے روایت ہے کہ رسول اللہ ﷺ سیدنا حسان رضی اللہ عنہ کے لیے مسجد میں ایک منبر رکھواتے تھے جس پر وہ کھڑے ہو کر رسول اللہ ﷺ کی جانب سے (مشرکین کے مقابلے میں) فخریہ اشعار پڑھتے تھے، اور رسول اللہ ﷺ فرماتے تھے: ”بے شک اللہ تعالیٰ روح القدس (سیدنا جبرائیل علیہ السلام) کے ذریعے حسان کی تائید فرماتا ہے جب تک وہ رسول اللہ ﷺ کا دفاع کرتے ہیں یا آپ ﷺ کی طرف سے فخریہ جواب دیتے ہیں۔“

سیدہ عائشہ رضی اللہ عنہا سے نبی کریم ﷺ کے حوالے سے اسی مفہوم کی روایت منقول ہے۔
یہ حدیث صحیح الاسناد ہے لیکن شیخین نے اسے روایت نہیں کیا۔

عروہ سے روایت ہے کہ سیدہ عائشہ رضی اللہ عنہا اس بات کو سخت ناپسند کرتی تھیں کہ ان کے سامنے سیدنا حسان بن ثابت رضی اللہ عنہ کو برا بھلا کہا جائے، وہ (ان کا دفاع کرتے ہوئے) فرماتی تھیں: ”کیا یہ وہی نہیں ہیں جنہوں نے (رسول اللہ ﷺ کی محبت میں) یہ شعر کہا تھا: ”پس یقیناً میرے والد، ان کے والد اور میری عزت، تم لوگوں (مشرکین) کے مقابلے میں محمد ﷺ کی آبرو کے لیے ڈھال ہے۔“

سلیمان بن یسار سے روایت ہے، انہوں نے کہا: میں نے سیدنا حسان بن ثابت رضی اللہ عنہ کو دیکھا، ان کی پیشانی کے بال (پٹّے) ان کی دونوں آنکھوں کے درمیان لٹک رہے تھے۔