المستدرك على الصحيحين

فضل بن دکین سے روایت ہے، انہوں نے کہا: سیدنا طلحہ اور سیدنا زبیر بن عوام رضی اللہ عنہما رجب سن 36 ہجری میں شہید ہوئے۔

محمد بن عمر اپنے شیوخ سے روایت کرتے ہیں، انہوں نے کہا: سیدنا زبیر رضی اللہ عنہ جنگِ جمل کے دن، جو کہ اس سال 10 جمادی الآخر بروز جمعرات کا دن تھا، معرکے کے بعد ”ذو الخمار“ نامی گھوڑے پر سوار ہو کر مدینہ منورہ کی طرف روانہ ہوئے، پس وہ وادیِ سباع میں شہید کیے گئے اور وہیں دفن ہوئے، اور سیدنا عروہ بن زبیر رضی اللہ عنہ سے مروی ہے، انہوں نے فرمایا: میرے والد جنگِ جمل کے دن شہید ہوئے اور ان کی عمر ساٹھ سال سے چار سال زائد (یعنی 64 سال) تھی۔

ابن عمر سے مروی ہے کہ میں نے مصعب بن ثابت بن عبداللہ بن زبیر کو کہتے ہوئے سنا: سیدنا زبیر بن عوام رضی اللہ عنہ غزوۂ بدر میں شریک ہوئے تو ان کی عمر 27 سال تھی، اور جب وہ شہید ہوئے تو ان کی عمر 64 سال تھی۔

عبداللہ بن عون سے روایت ہے، وہ (ان صحابہ کے تذکرے پر) رو پڑے اور کہا: یہ وہ بہترین لوگ تھے جنہیں شہید کر دیا گیا، پھر انہوں نے کہا: سیدنا زبیر رضی اللہ عنہ اپنے قاتل کی طرف متوجہ ہوئے جبکہ وہ ان پر قابو پا چکا تھا، تو سیدنا زبیر رضی اللہ عنہ نے فرمایا: ”میں تمہیں اللہ کا واسطہ دیتا ہوں“، تو وہ (قاتل) ان سے رک گیا، انہوں نے کئی بار ایسا ہی کیا، لیکن جب اس نے سیدنا زبیر رضی اللہ عنہ سے غداری کی اور ان پر وار کیا تو سیدنا زبیر رضی اللہ عنہ نے فرمایا: ”اللہ تجھے غارت کرے، تو اللہ کا واسطہ دیتا ہے اور پھر اسے خود ہی بھول جاتا ہے۔“

حمید بن منہیب سے روایت ہے، انہوں نے کہا: میں نے اس سال حج کیا جس میں سیدنا عثمان رضی اللہ عنہ شہید ہوئے، میری ملاقات مکہ میں سیدنا طلحہ، سیدنا زبیر اور سیدہ عائشہ رضی اللہ عنہم سے ہوئی، جب وہ بصرہ کی طرف روانہ ہوئے تو میں بھی ان کے ساتھ چلا گیا، پھر سیدنا علی بن ابی طالب رضی اللہ عنہ ان کے مقابلے میں آئے یہاں تک کہ دونوں فریقوں کا آمنا سامنا ہوا اور وہ جنگِ جمل کا دن تھا، اس دن فریقین کے درمیان شدید لڑائی ہوئی اور اس روز ستر آدمیوں نے (سیدہ عائشہ رضی اللہ عنہا کے) اونٹ کی نکیل تھامی، (راوی نے طویل حدیث ذکر کی اور) آخر میں کہا: سیدنا زبیر رضی اللہ عنہ پیٹھ پھیر کر (میدان سے) روانہ ہوئے تو بنو تمیم کے ایک شخص ابن جرموز نے انہیں پا لیا اور انہیں شہید کر دیا۔