المستدرك على الصحيحين

عمیر بن اسحاق، سیدنا مقداد بن اسود رضی اللہ عنہ سے روایت کرتے ہیں، انہوں نے کہا: رسول اللہ ﷺ نے مجھے ایک مہم پر (امیر بنا کر) بھیجا، جب میں واپس آیا تو آپ ﷺ نے مجھ سے پوچھا: ”تم نے اپنے آپ کو کیسا پایا؟“ میں نے عرض کیا: ”(امارت کے نشے میں) میری یہ حالت ہو گئی تھی کہ میں اپنے ساتھیوں کو اپنا غلام اور خادم سمجھنے لگا تھا۔ اللہ کی قسم! اس کے بعد میں کبھی دو آدمیوں پر بھی امیر نہیں بنوں گا۔“
یہ حدیث صحیح الاسناد ہے لیکن شیخین نے اسے روایت نہیں کیا۔
سیدنا ابو عبس بن جبر انصاری خزرجی رضی اللہ عنہ کے مناقب کا بیان۔

ابن اسحاق سے بنو حارث بن خزرج بن عمرو بن مالک بن اوس میں سے رسول اللہ ﷺ کے ہمراہ غزوہ بدر میں شرکت کرنے والوں کے ناموں کے بارے میں مروی ہے کہ ان میں ابو عبس بن جبر بن عمرو بن زید بن جشم بن حارثہ رضی اللہ عنہ بھی شامل تھے۔

عروہ سے روایت ہے، انہوں نے کہا: ابو عبس بن جبر بن عمرو بن زید بن جشم بن حارثہ رضی اللہ عنہ نے رسول اللہ ﷺ کے ہمراہ غزوہ بدر میں شرکت کی تھی۔

امام احمد بن حنبل کہتے ہیں کہ میں نے یعقوب کے سامنے غزوہ بدر میں شریک ہونے والوں کے نام پڑھے، جن میں ابو عبس بن جبر رضی اللہ عنہ کا نام بھی تھا، اور ان کا اصل نام عبدالرحمٰن بن جبر تھا۔

محمد بن عبداللہ بن نمیر بیان کرتے ہیں کہ ابو عبس عبداللہ بن جبر بن عمرو بن زید انصاری رضی اللہ عنہ اور کعب احبار کی وفات تینتیس (33) ہجری میں ہوئی۔