المستدرك على الصحيحين

مکحول سے روایت ہے کہ جس نے سیدنا بلال رضی اللہ عنہ کو دیکھا اس نے بتایا کہ وہ گہرے سانولے رنگ کے، دبلے پتلے، دراز قد اور قدرے آگے کو جھکے ہوئے تھے، ان کے بال گھنے تھے، رخساروں پر بال ہلکے تھے، بڑھاپے کی وجہ سے بال کافی سفید تھے اور وہ انہیں رنگتے نہیں تھے، بلال رضی اللہ عنہ غزوہ بدر، احد، خندق اور رسول اللہ ﷺ کے ہمراہ تمام غزوات میں شریک رہے، اور رسول اللہ ﷺ نے ان کے اور عبیدہ بن حارث بن عبد المطلب کے درمیان بھائی چارہ قائم فرمایا تھا۔

حسین جعفی کہتے ہیں کہ بلال بن رباح کی کنیت ابو عمرو تھی، ان کی والدہ کا نام حمامہ تھا، ان کی عمر سڑسٹھ سال ہوئی اور وہ دمشق کے مقبرے میں باب الصغیر کے پاس دفن ہوئے۔

محمد بن اسحاق سے روایت ہے کہ سیدنا ابوبکر رضی اللہ عنہ نے بلال کو امیہ بن خلف سے خریدا تھا، وہ رسول اللہ ﷺ کے ہمراہ غزوہ بدر میں شریک ہوئے، وہ سیاہ فام تھے، ابوبکر رضی اللہ عنہ نے امیہ بن خلف کو ایک غلام دے کر اس کے بدلے بلال کو لیا تھا، ان کی والدہ کا نام حمامہ تھا اور وہ دونوں ہی اسلام لائے تھے، ان کی کنیت ابو عبداللہ تھی، ان کی وفات سنہ 20 ہجری میں دمشق میں ہوئی اور ایک قول کے مطابق سنہ 18 ہجری میں ہوئی۔

مدرک بن عوف احمسی کہتے ہیں کہ میرا گزر بلال رضی اللہ عنہ کے پاس سے ہوا جبکہ وہ مسجد میں تھے، میں نے پوچھا: ”اے ابو عبداللہ! آپ یہاں کیوں بیٹھے ہیں؟“ انہوں نے کہا: ”میں سورج طلوع ہونے کا انتظار کر رہا ہوں۔“

محمد بن اسماعیل بخاری کہتے ہیں کہ بلال بن رباح کی کنیت ابو عبدالکریم تھی، ایک قول کے مطابق ابو عبداللہ اور ایک قول کے مطابق ابو عمرو تھی، وہ سیدنا ابوبکر رضی اللہ عنہ کے آزاد کردہ غلام تھے۔

ابن اسحاق کہتے ہیں کہ بلال بن رباح کی والدہ کا نام حمامہ اور ان کی بہن کا نام غفرہ تھا، جن کی نسبت سے عمر بن عبداللہ مدنی کو «مولٰی غفرہ» کہا جاتا ہے۔