المستدرك على الصحيحين

مالک بن یخامر سے روایت ہے کہ انہوں نے سیدنا ابو عبیدہ رضی اللہ عنہ کا حلیہ بیان کرتے ہوئے فرمایا: وہ دبلے پتلے جسم کے مالک تھے، ان کا چہرہ ہڈیوں والا (گوشت سے خالی) تھا، داڑھی ہلکی تھی، قد لمبا تھا، تھوڑا سا آگے کی طرف جھکے ہوئے تھے اور (غزوہ احد میں رسول اللہ ﷺ کے چہرہ انور سے کڑیاں نکالنے کی وجہ سے) ان کے سامنے کے دو دانت ٹوٹے ہوئے تھے۔

عروہ بن رویم سے روایت ہے کہ سیدنا ابو عبیدہ بن جراح رضی اللہ عنہ کی وفات سنہ 18 ہجری میں اردن کے مقام فحل میں ہوئی۔

عروہ سے روایت ہے کہ بنو حارث بن فہر میں سے جن لوگوں نے غزوہ بدر میں شرکت کی ان میں سیدنا ابو عبیدہ بن جراح رضی اللہ عنہ بھی شامل تھے اور اس وقت ان کی عمر اکتالیس سال تھی۔

عبداللہ بن شوذب سے روایت ہے کہ غزوہ بدر کے دن سیدنا ابو عبیدہ بن جراح رضی اللہ عنہ کے والد ان پر (حملہ کرنے کے لیے) مسلسل تاک لگائے ہوئے تھے، جبکہ ابو عبیدہ ان کے سامنے آنے سے بچ رہے تھے، لیکن جب ان کے والد نے (حملے میں) بہت زیادہ اصرار کیا تو ابو عبیدہ نے ان کا رخ کیا اور انہیں قتل کر دیا، چنانچہ جب انہوں نے اپنے (مشرک) باپ کو قتل کیا تو اللہ تعالیٰ نے ان کے بارے میں یہ آیت نازل فرمائی: ﴿لَا تَجِدُ قَوْمًا يُؤْمِنُونَ بِاللَّهِ وَالْيَوْمِ الْآخِرِ يُوَادُّونَ مَنْ حَادَّ اللَّهَ وَرَسُولَهُ وَلَوْ كَانُوا آبَاءَهُمْ أَوْ أَبْنَاءَهُمْ﴾ [سورة المجادلة: 22] ”آپ ایسی کسی قوم کو نہیں پائیں گے جو اللہ اور یومِ آخرت پر ایمان رکھتی ہو اور وہ ان لوگوں سے دوستی کریں جنہوں نے اللہ اور اس کے رسول کی مخالفت کی، اگرچہ وہ ان کے باپ یا ان کے بیٹے ہی کیوں نہ ہوں“ (آخر تک)۔