المستدرك على الصحيحين

محمد بن اسحاق بن یسار بیان کرتے ہیں کہ ابو عبیدہ (رضی اللہ عنہ) کا نسب یہ ہے: عامر بن عبد اللہ بن جراح بن ہلال بن اہیب بن ضبہ بن حارث بن فہر بن مالک بن نضر بن کنانہ، اور ان کی والدہ ام غنم بنت جابر بن عدل بن عامر بن عمیرہ بن ودیعہ بن حارث بن فہر ہیں۔

خلیفہ بن خیاط نے بھی یہی نسب بیان کیا ہے اور مزید کہا کہ سیدنا ابو عبیدہ رضی اللہ عنہ کی والدہ نے اسلام کا زمانہ پایا (یعنی وہ مشرف بہ اسلام ہوئیں)۔

ابن ابی نجیح سے روایت ہے کہ سیدنا عمر رضی اللہ عنہ نے اپنے ساتھیوں سے فرمایا: ”تمنا کرو (کہ تم کیا چاہتے ہو)“، تو ان میں سے ہر شخص کسی نہ کسی چیز کی تمنا کرنے لگا، پھر آپ رضی اللہ عنہ نے فرمایا: ”لیکن میں تو ایسے گھر کی تمنا کرتا ہوں جو ابو عبیدہ بن جراح جیسے (بہادر اور امین) مردوں سے بھرا ہوا ہو“، لوگوں نے ان سے کہا: آپ نے تو اسلام کی خیر خواہی میں کوئی کسر نہیں چھوڑی، آپ نے فرمایا: ”میرا یہی مقصد تھا“۔

ابو عبیدہ بن عبد اللہ بن مسعود سے روایت ہے کہ سیدنا عبد اللہ بن مسعود رضی اللہ عنہ فرمایا کرتے تھے: ”رسول اللہ ﷺ کے اصحاب میں سے میرے تین گہرے دوست تھے اور میں نے (ان کے انتخاب میں) کوئی کوتاہی نہیں کی: ابوبکر، عمر اور ابو عبیدہ (رضی اللہ عنہم)۔“