المستدرك على الصحيحين

سیدنا عبداللہ بن عباس رضی اللہ عنہما سے روایت ہے، انہوں نے کہا: رسول اللہ ﷺ کے چچا حمزہ بن عبدالمطلب رضی اللہ عنہ (غزوہِ احد میں) اس حال میں شہید ہوئے کہ وہ جنبی تھے، تو رسول اللہ ﷺ نے فرمایا: ”فرشتوں نے انہیں غسل دیا ہے۔“
یہ حدیث صحیح الاسناد ہے لیکن شیخین نے اسے روایت نہیں کیا۔

سیدنا اسامہ بن زید رضی اللہ عنہما سے روایت ہے، انہوں نے کہا کہ رسول اللہ ﷺ سیدنا حمزہ کے گھر جانے کے ارادے سے نکلے، میں بھی آپ ﷺ کے پیچھے چل پڑا یہاں تک کہ آپ ﷺ دروازے پر رک گئے اور فرمایا: ”السلام علیکم، کیا ابو عمارہ گھر پر ہیں؟“ راوی کہتے ہیں: تو ان کی زوجہ نے عرض کیا: ”نہیں اللہ کی قسم! میرے ماں باپ آپ پر قربان ہوں، وہ آپ ہی کی طرف نکلے ہیں، میرا خیال ہے کہ وہ بنو نجار کی کسی گلی میں آپ کو نہ مل سکے، اے اللہ کے رسول! میرے ماں باپ آپ پر قربان، کیا آپ اندر تشریف نہیں لائیں گے؟“ آپ ﷺ نے دریافت فرمایا: ”کیا تمہارے پاس کھانے کو کچھ ہے؟“ انہوں نے عرض کیا: ”جی ہاں“، پس آپ ﷺ اندر تشریف لے گئے اور انہوں نے آپ ﷺ کے سامنے «قَعْب» ”لکڑی کا پیالہ“ پیش کیا جس میں «حَيْس» ”کھجور، گھی اور پنیر کا حلوہ“ تھا، انہوں نے عرض کیا: ”اے اللہ کے رسول! میرے ماں باپ آپ پر قربان، اسے کھائیے، یہ آپ کے لیے خوشگوار اور ہضم ہونے والا ہو، آپ تشریف لائے ہیں جبکہ میں خود آپ کے پاس آ کر مبارکباد دینا چاہتی تھی، کیونکہ مجھے ابو عمارہ نے بتایا ہے کہ آپ کو جنت میں ایک نہر عطا کی گئی ہے جسے الکوثر کہا جاتا ہے“، تو رسول اللہ ﷺ نے فرمایا: ”اور اس کے (پینے کے) برتنوں کی تعداد آسمان کے ستاروں سے بھی زیادہ ہے، اور وہاں میرے پاس پہنچنے والوں میں سب سے زیادہ محبوب تمہاری قوم کے لوگ ہیں۔“
یہ حدیث صحیح الاسناد ہے لیکن شیخین نے اسے روایت نہیں کیا۔

سیدنا انس رضی اللہ عنہ سے روایت ہے کہ رسول اللہ ﷺ جنگِ احد کے دن سیدنا حمزہ کے پاس سے گزرے جبکہ ان کے ناک کان کاٹے جا چکے تھے اور ان کے جسم کا مثلہ کیا گیا تھا، تو آپ ﷺ نے فرمایا: ”اگر صفیہ (سیدنا حمزہ کی بہن) کے رنج و ملال کا ڈر نہ ہوتا تو میں انہیں (اسی میدان میں) چھوڑ دیتا یہاں تک کہ اللہ تعالیٰ انہیں پرندوں اور درندوں کے پیٹ سے جمع فرماتا“، پھر آپ ﷺ نے انہیں ایک «نَمِرة» ”دھاری دار چادر“ میں کفن دیا۔
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔

سیدنا جابر بن عبداللہ رضی اللہ عنہما سے روایت ہے، انہوں نے کہا: ہم میں سے ایک شخص کے ہاں بیٹا پیدا ہوا، تو لوگوں نے پوچھا: ”ہم اس کا کیا نام رکھیں؟“ تو نبی کریم ﷺ نے فرمایا: ”اس کا نام وہ رکھو جو مجھے تمام ناموں میں سب سے زیادہ محبوب ہے: حمزہ بن عبدالمطلب۔“
یہ حدیث صحیح الاسناد ہے لیکن شیخین نے اسے روایت نہیں کیا۔

مدینہ منورہ کے ایک شخص سے روایت ہے کہ میرے دادا میرے والد کو لے کر رسول اللہ ﷺ کی خدمت میں حاضر ہوئے اور عرض کیا: ”یہ میرا بیٹا ہے، میں اس کا کیا نام رکھوں؟“ آپ ﷺ نے فرمایا: ”اس کا نام اس شخصیت کے نام پر رکھو جو مجھے تمام لوگوں میں سب سے زیادہ محبوب ہے: حمزہ بن عبدالمطلب۔“
اس مجہول راوی نے ابن عیینہ سے روایت کرنے میں کمی کی ہے، اور اس معاملے میں صحیح قول یعقوب بن حمید کا ہے، اور ابواحمد الحافظ مجھ سے اس بات پر مناظرہ کرتے تھے کہ بخاری نے اپنی جامع صحیح میں ان سے روایت لی ہے جبکہ میں اس کا انکار کرتا تھا۔

سیدنا عبداللہ بن عباس رضی اللہ عنہما سے روایت ہے کہ رسول اللہ ﷺ نے فرمایا: ”میں گزشتہ رات جنت میں داخل ہوا، وہاں میں نے دیکھا کہ جعفر (طیار) فرشتوں کے ساتھ اڑ رہے ہیں اور حمزہ ایک تخت پر ٹیک لگائے بیٹھے ہیں۔“
یہ حدیث صحیح الاسناد ہے لیکن شیخین نے اسے روایت نہیں کیا۔