المستدرك على الصحيحين

سیدنا علی رضی اللہ عنہ سے روایت ہے کہ جب حسن کی ولادت ہوئی تو میں نے ان کا نام ”حرب“ رکھا، نبی کریم ﷺ نے مجھ سے دریافت فرمایا: ”تم نے میرے بیٹے کا کیا نام رکھا ہے؟“ میں نے عرض کیا: حرب، آپ ﷺ نے فرمایا: ”(نہیں) وہ حسن ہے“، پھر جب حسین کی ولادت ہوئی تو میں نے ان کا نام ”حرب“ رکھا، نبی کریم ﷺ نے دریافت فرمایا: ”تم نے میرے بیٹے کا کیا نام رکھا ہے؟“ میں نے عرض کیا: حرب، آپ ﷺ نے فرمایا: ”(نہیں) وہ حسین ہے“، پھر جب محسن کی ولادت ہوئی تو آپ ﷺ نے فرمایا: ”تم نے میرے بیٹے کا کیا نام رکھا ہے؟“ میں نے عرض کیا: حرب، آپ ﷺ نے فرمایا: ”وہ محسن ہے“، پھر نبی کریم ﷺ نے ارشاد فرمایا: ”میں نے اپنے ان بیٹوں کے نام ہارون علیہ السلام کے بیٹوں کے ناموں پر شبر، شبیر اور مشبر رکھے ہیں۔“
یہ حدیث صحیح الاسناد ہے لیکن شیخین نے اسے روایت نہیں کیا۔

عقبہ بن حارث سے روایت ہے کہ سیدنا ابوبکر صدیق رضی اللہ عنہ نے سیدنا حسن بن علی رضی اللہ عنہما سے ملاقات کی، انہیں اپنے سینے سے لگایا اور فرمایا: ”میرے باپ آپ پر فدا ہوں، یہ نبی (ﷺ) کے مشابہ ہے، علی کے مشابہ نہیں“، اور سیدنا علی رضی اللہ عنہ (یہ سن کر) مسکرا رہے تھے۔
یہ حدیث شیخین کی شرط پر صحیح ہے۔

سیدنا ابوہریرہ رضی اللہ عنہ سے روایت ہے کہ انہوں نے سیدنا حسن بن علی رضی اللہ عنہما سے ملاقات کی اور کہا: میں نے رسول اللہ ﷺ کو آپ کے شکم مبارک کا بوسہ لیتے ہوئے دیکھا ہے، لہٰذا آپ وہ جگہ ظاہر کریں جس کا رسول اللہ ﷺ نے بوسہ لیا تھا تاکہ میں بھی اسے چوم لوں، راوی کہتے ہیں: تو حسن رضی اللہ عنہ نے وہ جگہ (اپنے پیٹ سے کپڑا ہٹا کر) ظاہر کر دی اور انہوں نے اسے چوم لیا۔
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔

وہب ابوجحیفہ رضی اللہ عنہ سے روایت ہے، انہوں نے کہا: میں نے رسول اللہ ﷺ کی زیارت کی ہے اور حسن بن علی رضی اللہ عنہما آپ ﷺ کے مشابہ تھے۔
یہ حدیث شیخین کی شرط پر صحیح ہے لیکن انہوں نے اسے روایت نہیں کیا! اور اس کی ایک صحیح شاہد حدیث بھی موجود ہے: