المستدرك على الصحيحين

سیدنا انس بن مالک رضی اللہ عنہ سے روایت ہے کہ سیدنا علی رضی اللہ عنہ کی اولاد میں سے سیدنا حسن رضی اللہ عنہ سے بڑھ کر کوئی رسول اللہ ﷺ کے مشابہ نہ تھا۔

عبد اللہ بن عبید بن عمیر سے روایت ہے کہ سیدنا حسن بن علی رضی اللہ عنہما نے 25 حج پیدل چل کر ادا کیے جبکہ ان کی قیمتی سواریاں (نحیب اونٹنیاں) ان کے ساتھ (بغیر سوار کے) ہانکی جاتی تھیں۔

قتادہ سے روایت ہے کہ سیدہ فاطمہ رضی اللہ عنہا کے ہاں سیدنا حسن رضی اللہ عنہ کی ولادت غزوہ احد کے دو سال بعد ہوئی، جبکہ غزوہ احد اور نبی کریم ﷺ کی مدینہ تشریف آوری کے درمیان دو سال، چھ ماہ اور پندرہ دن کا فاصلہ تھا، اس طرح ہجری تاریخ کے مطابق حسن رضی اللہ عنہ کی ولادت 4 سال، 6 ماہ اور 15 دن پر ہوئی۔

ابن واقد سے روایت ہے کہ ابو محمد سیدنا حسن بن علی بن ابی طالب رضی اللہ عنہما کی وفات ربیع الاول سن 49 ہجری میں ہوئی اور ان کی نمازِ جنازہ سعید بن العاص نے پڑھائی۔

سیدنا ابوہریرہ رضی اللہ عنہ سے روایت ہے کہ میں اس شخص (حسن رضی اللہ عنہ) سے اس وقت سے ہمیشہ محبت کرتا ہوں جب سے میں نے رسول اللہ ﷺ کو ان کے ساتھ وہ سلوک کرتے دیکھا جو میں نے دیکھا، میں نے حسن کو نبی کریم ﷺ کی گود میں دیکھا جبکہ وہ اپنی انگلیاں نبی کریم ﷺ کی داڑھی مبارک میں ڈال رہے تھے اور نبی کریم ﷺ اپنی زبان ان کے منہ میں ڈال رہے تھے، پھر آپ ﷺ نے فرمایا: «اللَّهُمَّ إِنِّي أُحِبُّهُ فَأَحِبَّهُ» ”اے اللہ! میں اس سے محبت کرتا ہوں پس تو بھی اس سے محبت فرما۔“
یہ حدیث صحیح الاسناد ہے لیکن شیخین نے اسے روایت نہیں کیا۔