المستدرك على الصحيحين

سیدنا علی رضی اللہ عنہ سے روایت ہے، انہوں نے فرمایا: رسول اللہ ﷺ نے مجھے یمن کی طرف قاضی بنا کر بھیجا، تو میں نے عرض کیا: اے اللہ کے رسول! میں ایک نوجوان شخص ہوں اور میرے پاس ایسے مقدمات آئیں گے جن کا مجھے علم نہیں ہے، تو آپ ﷺ نے اپنا دستِ مبارک میرے سینے پر رکھا اور دعا فرمائی: «اللَّهُمَّ ثَبِّتْ لِسَانَهُ وَاهْدِ قَلْبَهُ» ”اے اللہ! اس کی زبان کو ثابت رکھ اور اس کے دل کو ہدایت دے،“ تو اس کے بعد مجھے کبھی فیصلوں میں کوئی شک و شبہ نہیں ہوا۔
یہ حدیث امام بخاری اور امام مسلم کی شرط پر صحیح ہے لیکن انہوں نے اسے روایت نہیں کیا۔

سیدنا زید بن ارقم رضی اللہ عنہ سے روایت ہے کہ میں رسول اللہ ﷺ کی خدمت میں حاضر تھا کہ یمن کا ایک شخص آیا اور اس نے نبی کریم ﷺ کو ایک واقعہ بتاتے ہوئے عرض کیا: اے اللہ کے رسول! سیدنا علی رضی اللہ عنہ کے پاس تین ایسے آدمی آئے جو ایک بچے کے بارے میں جھگڑ رہے تھے، ان تینوں نے ایک ہی طہر (پاکی کے ایام) میں ایک خاتون سے تعلق قائم کیا تھا، تو سیدنا علی رضی اللہ عنہ نے ان میں سے باری باری دو دو افراد سے کہا کہ تم اس بچے سے دستبردار ہو کر اپنے تیسرے ساتھی کے حق میں خوش دلی کا مظاہرہ کرو، مگر وہ راضی نہ ہوئے، پھر انہوں نے فرمایا: ”تم ایسے شریک ہو جو باہم جھگڑ رہے ہو، اب میں تمہارے درمیان قرعہ اندازی کروں گا، جس کے نام قرعہ نکلے گا بچہ اسی کا ہوگا اور اسے اپنے بقیہ دو ساتھیوں کو (بچے کی) دیت کا دو تہائی حصہ ادا کرنا ہوگا،“ چنانچہ انہوں نے قرعہ اندازی کی اور ان میں سے ایک کے نام قرعہ نکلا تو انہوں نے بچہ اس کے حوالے کر دیا، یہ سن کر رسول اللہ ﷺ مسکرا دیے یہاں تک کہ آپ ﷺ کے دندانِ مبارک ظاہر ہو گئے۔

سیدنا زید بن ارقم رضی اللہ عنہ کی سابقہ روایت میں یہ اضافہ مروی ہے کہ نبی کریم ﷺ نے ارشاد فرمایا: ”اس مقدمے میں میرا فیصلہ بھی وہی ہوتا جو علی نے کیا ہے۔“
یہ حدیث صحیح الاسناد ہے لیکن شیخین نے اسے روایت نہیں کیا، ابن عیینہ کی روایت سے اس کی مزید تاکید ہوتی ہے اور ابو اسحاق سبیعی نے اس کی روایت میں اجلح کی متابعت کی ہے۔