المستدرك على الصحيحين

سیدنا جابر بن عبداللہ رضی اللہ عنہ سے روایت ہے کہ میں نبی کریم ﷺ کے ہمراہ ایک خاتون کے پاس گیا، اس نے ہمارے لیے بکری ذبح کی، تو رسول اللہ ﷺ نے فرمایا: ”ابھی ایک ایسا شخص داخل ہوگا جو اہل جنت میں سے ہے،“ تو سیدنا ابوبکر رضی اللہ عنہ داخل ہوئے، پھر آپ ﷺ نے فرمایا: ”ابھی ایک ایسا شخص داخل ہوگا جو اہل جنت میں سے ہے،“ تو سیدنا عمر رضی اللہ عنہ داخل ہوئے، پھر آپ ﷺ نے فرمایا: ”ابھی ایک ایسا شخص داخل ہوگا جو اہل جنت میں سے ہے، اے اللہ! اگر تو چاہے تو اسے علی بنا دے،“ راوی کہتے ہیں کہ اس کے بعد سیدنا علی بن ابی طالب رضی اللہ عنہ داخل ہوئے۔
یہ حدیث صحیح الاسناد ہے لیکن شیخین نے اسے روایت نہیں کیا۔

سیدنا سلمان فارسی رضی اللہ عنہ سے روایت ہے کہ رسول اللہ ﷺ نے فرمایا: ”تم میں سے حوضِ کوثر پر میرے پاس سب سے پہلے پہنچنے والا وہی ہوگا جو تم میں سب سے پہلے اسلام لایا، اور وہ علی بن ابی طالب ہیں۔“

سیدنا زید بن ارقم رضی اللہ عنہ سے روایت ہے کہ رسول اللہ ﷺ کے ساتھ سب سے پہلے اسلام لانے والے علی بن ابی طالب رضی اللہ عنہ ہیں۔
یہ حدیث صحیح الاسناد ہے لیکن شیخین نے اسے روایت نہیں کیا، جبکہ اس معاملے میں اختلاف کی حقیقت یہ ہے کہ سیدنا ابوبکر صدیق رضی اللہ عنہ بالغ مردوں میں سب سے پہلے اسلام لائے اور سیدنا علی بن ابی طالب رضی اللہ عنہ کا اسلام لانا بلوغت سے پہلے کے دور کا تھا۔

سیدنا ابوسعید خدری رضی اللہ عنہ سے روایت ہے کہ نبی کریم ﷺ سیدہ فاطمہ رضی اللہ عنہا کے ہاں تشریف لائے اور فرمایا: ”میں، تم، یہ سونے والے (یعنی علی) اور یہ دونوں (یعنی حسن اور حسین) قیامت کے دن ایک ہی مقام پر ہوں گے۔“
یہ حدیث صحیح الاسناد ہے لیکن شیخین نے اسے روایت نہیں کیا۔