المستدرك على الصحيحين

سیدنا سہل بن سعد رضی اللہ عنہ سے روایت ہے، انہوں نے کہا کہ بلال رضی اللہ عنہ نے ظہر کی نماز کے لیے اذان دی، اسی دوران بنو عمرو بن عوف کی طرف سے شور و غل کی آواز آئی کہ ان کے درمیان لڑائی جھگڑا ہو گیا ہے یہاں تک کہ انہوں نے ایک دوسرے پر پتھراؤ کیا، پس نبی کریم ﷺ ان کے پاس (صلح کے لیے) تشریف لے گئے اور فرمایا: ”اے ابوبکر! اگر نماز کھڑی ہو جائے تو تم آگے بڑھ کر لوگوں کو نماز پڑھا دینا“، انہوں نے عرض کیا: جی بہتر۔
یہ حدیث شیخین کی شرط پر صحیح ہے لیکن انہوں نے اس طرح اسے روایت نہیں کیا، انہوں نے اس پر تو اتفاق کیا ہے کہ نبی کریم ﷺ نے اپنے مرض الوفات میں ایسا فرمایا تھا۔

سیدنا انس بن مالک رضی اللہ عنہ سے روایت ہے، انہوں نے کہا کہ مجھے بنو مصطلق نے رسول اللہ ﷺ کی طرف بھیجا اور کہا کہ ہمارے لیے رسول اللہ ﷺ سے پوچھیں کہ آپ کے بعد ہم اپنے صدقات (زکوٰۃ) کس کے حوالے کریں؟ میں آپ ﷺ کی خدمت میں حاضر ہوا اور سوال کیا، تو آپ ﷺ نے فرمایا: ”ابوبکر کے“، میں ان کے پاس واپس آیا اور انہیں بتایا، انہوں نے کہا: آپ ﷺ کے پاس دوبارہ جائیں اور پوچھیں کہ اگر ابوبکر کو کچھ (وفات) ہو جائے تو پھر کس کے؟ میں نے حاضر ہو کر پوچھا تو فرمایا: ”عمر کے“، انہوں نے کہا: پھر جائیے اور پوچھیں کہ اگر عمر کو کچھ ہو جائے تو پھر کس کے؟ میں نے حاضر ہو کر پوچھا تو فرمایا: ”عثمان کے“، میں نے واپس جا کر انہیں بتایا تو انہوں نے کہا: پھر جا کر پوچھیں کہ اگر عثمان کو کچھ ہو جائے تو پھر کس کے؟ میں نے حاضر ہو کر پوچھا تو آپ ﷺ نے فرمایا: ”اگر عثمان کو کچھ ہو جائے تو پھر تمہارے لیے آخری زمانے تک ہلاکت ہی ہلاکت ہے۔“
یہ حدیث صحیح الاسناد ہے لیکن شیخین نے اسے روایت نہیں کیا۔

سیدنا ابن عمر رضی اللہ عنہما سے روایت ہے کہ رسول اللہ ﷺ نے ابوبکر اور عمر رضی اللہ عنہما کے بارے میں فرمایا: ”میرے بعد تم دونوں پر کوئی بھی حکمرانی نہیں کرے گا۔“
یہ حدیث صحیح الاسناد ہے لیکن شیخین نے اسے روایت نہیں کیا۔

حبیب بن حبیب سے روایت ہے، انہوں نے کہا کہ میں رسول اللہ ﷺ کے پاس موجود تھا جب آپ ﷺ نے حسان بن ثابت رضی اللہ عنہ سے فرمایا: ”کیا تم نے ابوبکر کے بارے میں کچھ کہا ہے؟ سناؤ تاکہ میں سنوں“، انہوں نے عرض کیا: (میں نے یہ اشعار کہے ہیں) ”وہ عظیم الشان غار میں دو میں سے دوسرے تھے جبکہ دشمن پہاڑ پر چڑھ کر ان کے گرد چکر لگا رہا تھا، اور وہ رسول اللہ ﷺ کے محبوب تھے، لوگوں کو بخوبی معلوم ہے کہ تمام مخلوق میں آپ ﷺ نے کسی کو ان کے برابر نہیں ٹھہرایا۔“

مرہ الطیب سے روایت ہے، انہوں نے کہا کہ ابو سفیان بن حرب، سیدنا علی بن ابی طالب رضی اللہ عنہ کے پاس آئے اور کہنے لگے: کیا بات ہے کہ یہ معاملہ (خلافت) قریش کے سب سے کم تعداد والے اور سب سے کمزور قبیلے (یعنی ابوبکر) میں چلا گیا؟ اللہ کی قسم! اگر آپ چاہیں تو میں ان کے خلاف اس جگہ کو گھوڑوں اور جوانوں سے بھر دوں، تو سیدنا علی رضی اللہ عنہ نے فرمایا: ”اے ابو سفیان! تم ایک طویل عرصے سے اسلام اور اہل اسلام کی دشمنی کرتے آئے ہو مگر اس نے اسلام کو ذرہ برابر نقصان نہیں پہنچایا، بے شک ہم نے ابوبکر کو اس (خلافت) کا اہل پایا ہے۔“