المستدرك على الصحيحين

سیدنا ابو سعید خدری رضی اللہ عنہ سے روایت ہے کہ جب رسول اللہ ﷺ کی وفات ہوئی تو انصار کے خطبا کھڑے ہوئے، ان میں سے کوئی شخص یہ کہنے لگا: اے گروہِ مہاجرین! رسول اللہ ﷺ جب بھی آپ میں سے کسی کو عامل مقرر فرماتے تھے تو ہمارے کسی شخص کو بھی اس کے ساتھ ملا دیتے تھے، لہٰذا ہماری رائے یہ ہے کہ اس معاملے یعنی خلافت کو دو شخص سنبھالیں، ایک آپ میں سے اور ایک ہم میں سے، راوی کہتے ہیں: پھر انصار کے خطبا مسلسل اسی بات پر قائم رہے، تب سیدنا زید بن ثابت رضی اللہ عنہ کھڑے ہوئے اور فرمایا: بے شک رسول اللہ ﷺ مہاجرین میں سے تھے، اور امام بھی مہاجرین میں سے ہوگا، اور ہم ان کے انصار یعنی مددگار ہیں جیسے ہم رسول اللہ ﷺ کے انصار تھے، پھر سیدنا ابوبکر رضی اللہ عنہ کھڑے ہوئے اور فرمایا: اے گروہِ انصار! اللہ تمہیں جزائے خیر دے اور تمہارے کلام کرنے والے کو حق پر ثابت قدم رکھے، پھر فرمایا: اگر تم اس کے علاوہ کچھ کرتے تو ہم تم سے صلح نہ کرتے، پھر سیدنا زید بن ثابت رضی اللہ عنہ نے سیدنا ابوبکر رضی اللہ عنہ کا ہاتھ پکڑا اور فرمایا: ”یہ تمہارے صاحب ہیں، پس ان کی بیعت کرو۔“ پھر سب لوگ چل دیے، پھر جب سیدنا ابوبکر رضی اللہ عنہ منبر پر بیٹھے تو لوگوں کے چہروں پر نظر ڈالی مگر وہاں سیدنا علی رضی اللہ عنہ کو نہ پایا، تو ان کے بارے میں دریافت فرمایا، چنانچہ انصار کے کچھ لوگ گئے اور انہیں لے آئے، سیدنا ابوبکر رضی اللہ عنہ نے فرمایا: ”اے رسول اللہ ﷺ کے چچا زاد بھائی اور ان کے داماد! کیا آپ نے مسلمانوں کی قوت کو پارہ پارہ کرنے کا ارادہ کیا ہے؟!“ تو انہوں نے جواب دیا: ”اے خلیفہ رسول اللہ! کوئی ملامت نہیں“، پھر انہوں نے ان کی بیعت کر لی، پھر آپ نے سیدنا زبیر بن عوام رضی اللہ عنہ کو نہ پایا تو ان کے بارے میں دریافت فرمایا یہاں تک کہ لوگ انہیں لے آئے، آپ نے فرمایا: ”اے رسول اللہ ﷺ کی پھوپھی کے بیٹے اور ان کے حواری! کیا آپ نے مسلمانوں کی قوت کو پارہ پارہ کرنے کا ارادہ کیا ہے؟!“ تو انہوں نے بھی ویسا ہی جواب دیا: ”اے خلیفہ رسول اللہ! کوئی ملامت نہیں۔“ چنانچہ ان دونوں نے بیعت کر لی۔
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔

سیدہ عائشہ رضی اللہ عنہا سے روایت ہے کہ جب نبی کریم ﷺ کو مسجدِ اقصیٰ کی سیر کرائی گئی تو صبح کے وقت لوگ اس کے بارے میں چہ میگوئیاں کرنے لگے، اس پر وہ لوگ بھی مرتد ہو گئے جو آپ ﷺ پر ایمان لا چکے تھے اور آپ ﷺ کی تصدیق کر چکے تھے، اور کچھ مشرکین دوڑتے ہوئے سیدنا ابوبکر رضی اللہ عنہ کے پاس گئے اور کہنے لگے: کیا آپ کو اپنے صاحب کے متعلق کچھ خبر ہے؟ وہ یہ دعویٰ کرتے ہیں کہ آج رات انہیں بیت المقدس کی سیر کرائی گئی ہے! سیدنا ابوبکر رضی اللہ عنہ نے پوچھا: ”کیا انہوں نے واقعی یہ فرمایا ہے؟“ انہوں نے کہا: جی ہاں، سیدنا ابوبکر رضی اللہ عنہ نے فرمایا: ”اگر انہوں نے یہ فرمایا ہے تو یقیناً بالکل سچ فرمایا ہے۔“ ان لوگوں نے پوچھا: کیا آپ اس بات کی بھی تصدیق کرتے ہیں کہ وہ آج رات بیت المقدس گئے اور صبح ہونے سے پہلے واپس بھی آگئے؟! آپ نے فرمایا: ”جی ہاں، میں تو اس سے بھی زیادہ دور کی بات میں ان کی تصدیق کرتا ہوں؛ میں تو صبح و شام آسمان سے آنے والی خبر یعنی وحی کے معاملے میں ان کی بلا جھجھک تصدیق کرتا ہوں“؛ اسی وجہ سے ان کا نام ابوبکر صدیق پڑ گیا۔
یہ حدیث شیخین کی شرط پر صحیح ہے لیکن انہوں نے اسے روایت نہیں کیا، بیشک محمد بن کثیر صنعانی صدوق ہیں۔