المستدرك على الصحيحين

سیدنا ابوہریرہ رضی اللہ عنہ سے روایت ہے، انہوں نے کہا: اہل صفہ اسلام کے مہمان تھے، ان کا نہ کوئی گھر بار تھا اور نہ مال و دولت، اور اس اللہ کی قسم جس کے سوا کوئی معبود نہیں! میں بھوک کی شدت سے اپنے جگر (پیٹ) کو زمین پر ٹکا دیا کرتا تھا اور کبھی بھوک کی وجہ سے اپنے پیٹ پر پتھر باندھ لیا کرتا تھا، ایک دن میں ان کے راستے پر بیٹھ گیا جہاں سے وہ نکلا کرتے تھے، پس وہاں سے سیدنا ابوبکر رضی اللہ عنہ گزرے تو میں نے ان سے کتاب اللہ کی ایک آیت کے بارے میں سوال کیا اور میرا مقصد صرف یہ تھا کہ وہ مجھے اپنے ساتھ لے جائیں (تاکہ کچھ کھانے کو مل جائے)، مگر وہ گزر گئے اور ایسا نہ کیا، پھر سیدنا عمر رضی اللہ عنہ گزرے، میں نے ان سے بھی کتاب اللہ کی ایک آیت کے بارے میں پوچھا اور میرا مقصد یہی تھا کہ وہ مجھے اپنے ساتھ لے جائیں، مگر وہ بھی گزر گئے اور ایسا نہ کیا، پھر وہاں سے ابوالقاسم ﷺ تشریف لائے تو مجھے دیکھ کر مسکرائے اور فرمایا: ”اے ابوہریرہ!“ میں نے عرض کیا: اے اللہ کے رسول! میں حاضر ہوں، آپ ﷺ نے فرمایا: ”میرے ساتھ چلو“ اور آپ ﷺ آگے چل دیے، میں آپ ﷺ کے پیچھے ہو لیا، آپ ﷺ اپنے گھر میں داخل ہوئے، میں نے اجازت طلب کی تو مجھے اجازت مل گئی، وہاں پیالے میں کچھ دودھ موجود تھا، آپ ﷺ نے پوچھا: ”تمہارے پاس یہ دودھ کہاں سے آیا؟“ بتایا گیا کہ فلاں شخص نے آپ کے لیے ہدیہ بھیجا ہے، تب رسول اللہ ﷺ نے فرمایا: ”اے ابوہریرہ!“ میں نے عرض کیا: لبیک، آپ ﷺ نے فرمایا: ”اہل صفہ کے پاس جاؤ اور انہیں بلا کر لاؤ“، وہ اسلام کے مہمان تھے، نہ ان کا کوئی گھر تھا نہ مال، جب آپ ﷺ کے پاس صدقہ آتا تو آپ ﷺ ان کی طرف بھیج دیتے اور خود اس میں سے کچھ تناول نہ فرماتے، اور جب ہدیہ آتا تو ان کی طرف پیغام بھیجتے اور خود بھی اس میں سے تناول فرماتے اور انہیں بھی اس میں شریک کرتے، مجھے یہ بات (ان کو بلانا) کچھ ناگوار گزری اور میں نے (دل میں) کہا: ان تمام اہل صفہ کے لیے اس ایک پیالے کی کیا حقیقت ہے؟ میں تو صرف ان کو بلانے والا قاصد ہوں، آپ ﷺ مجھے حکم دیں گے تو میں یہ پیالہ ان کے درمیان گھماؤں گا، بھلا اس میں سے مجھے کیا ملے گا حالانکہ مجھے امید تھی کہ اس میں سے مجھے اتنا ملے گا جو میری ضرورت پوری کر دے؟ لیکن اللہ اور اس کے رسول ﷺ کی اطاعت کے سوا کوئی چارہ نہ تھا، چنانچہ میں ان کے پاس گیا اور انہیں بلا لایا، جب وہ آپ ﷺ کی خدمت میں حاضر ہوئے اور اپنی جگہوں پر بیٹھ گئے تو آپ ﷺ نے فرمایا: ”اے ابوہریرہ! پیالہ پکڑو اور انہیں دو“، میں نے پیالہ پکڑ لیا اور ایک ایک شخص کو دینے لگا، وہ شخص پیتا یہاں تک کہ سیراب ہو جاتا پھر پیالہ واپس کر دیتا، یہاں تک کہ میں رسول اللہ ﷺ تک پہنچ گیا اور تمام لوگ سیراب ہو چکے تھے، رسول اللہ ﷺ نے پیالہ پکڑا اور اسے اپنے مبارک ہاتھوں پر رکھا، پھر اپنا سر مبارک میری طرف اٹھایا اور مسکرا کر فرمایا: ”اے ابوہریرہ!“ میں نے عرض کیا: لبیک یا رسول اللہ! آپ ﷺ نے فرمایا: ”اب بیٹھ جاؤ اور پیو“، میں نے پیا، پھر آپ ﷺ نے فرمایا: ”پیو“، میں نے پھر پیا، آپ ﷺ برابر فرماتے رہے: ”پیو“ یہاں تک کہ میں نے عرض کیا: اس ذات کی قسم جس نے آپ کو حق کے ساتھ مبعوث فرمایا ہے! اب میں اس (دودھ) کے لیے مزید کوئی جگہ نہیں پا رہا، پھر آپ ﷺ نے پیالہ پکڑا، اللہ کی حمد بیان کی، «بسم اللہ» پڑھی اور خود نوش فرمایا۔
یہ حدیث شیخین کی شرط پر صحیح ہے لیکن انہوں نے اس سیاق کے ساتھ اسے روایت نہیں کیا۔

سیدنا ابوہریرہ رضی اللہ عنہ سے روایت ہے کہ اہل صفہ ستر (70) آدمی تھے اور ان کے پاس اوڑھنے کے لیے چادریں تک نہ تھیں۔
یہ حدیث شیخین کی شرط پر صحیح ہے لیکن انہوں نے اسے روایت نہیں کیا! امام حاکم فرماتے ہیں: میں نے اہل صفہ کے متعلق مروی ان روایات پر غور کیا تو میں نے انہیں تقویٰ، اللہ پر توکل اور رسول اللہ ﷺ کی خدمت میں ہمہ وقت مشغول رہنے کے اعتبار سے افضل ترین صحابہ پایا، اللہ تعالیٰ نے ان کے لیے وہی مسکنت، فقر، اللہ کی عبادت کے لیے یکسوئی اور اہل دنیا کے لیے دنیا چھوڑ دینے کو پسند فرمایا جو اپنے نبی ﷺ کے لیے پسند فرمایا تھا، اور یہی وہ گروہ ہے جن کی طرف صدی در صدی صوفیہ منسوب ہوتے چلے آ رہے ہیں، پس جو بھی ان کی سنت، دنیا چھوڑنے پر ان کے صبر، فقر کے ساتھ انسیت اور سوال کرنے سے بچنے کے طریقے پر چلا، وہ ہر زمانے میں اہل صفہ کا مقتدی اور اپنے خالق پر توکل کرنے والا ہے۔

سہل بن عبداللہ تستری فرماتے ہیں: جب اللہ تعالیٰ نے نبی کریم ﷺ کو مبعوث فرمایا تو دنیا میں لوگوں کی سات اقسام تھیں: بادشاہ، کسان، مویشی پالنے والے، تاجر، دستکار، مزدور اور کمزور و فقراء، ان میں سے کسی کو بھی یہ حکم نہیں دیا گیا کہ وہ اپنے پیشے کو چھوڑ دیں، بلکہ انہیں ان تمام حالات میں علم، یقین، تقویٰ اور توکل کا حکم دیا گیا، سہل رحمہ اللہ فرماتے ہیں کہ عقل مند کو یہ کہنا چاہیے: جب مجھے یہ علم ہو گیا کہ میں تیرا بندہ ہوں تو اب میرے لیے یہ مناسب نہیں کہ میں تیرے سوا کسی اور سے امید رکھوں یا تمنا کروں، اور نہ ہی میں تیرے بارے میں یہ وہم کروں جبکہ تو نے مجھے پیدا کیا اور اپنا بندہ بنایا کہ تو مجھے میرے نفس کے حوالے کر دے گا یا میرے معاملات تیرے سوا کسی اور کے سپرد کر دے گا۔
امام حاکم فرماتے ہیں: رسول اللہ ﷺ نے اس گروہ کی ان صفات کے ساتھ تعریف فرمائی ہے جو اللہ تعالیٰ نے دیگر گروہوں کے مقابلے میں انہیں خاص طور پر عطا فرمائی ہیں، پس جس شخص میں وہ صفات پائی جائیں وہ تصوف کے نام کا مستحق ہے۔