المستدرك على الصحيحين

سیدنا شکل بن حمید رضی اللہ عنہ سے روایت ہے کہ میں رسول اللہ ﷺ کی خدمت میں حاضر ہوا اور عرض کیا: اے اللہ کے رسول! مجھے ایسی دعا سکھائیے جس کے ذریعے میں پناہ مانگوں، تو آپ ﷺ نے میرا ہاتھ پکڑ کر فرمایا: ”کہو: «اللَّهُمَّ إِنِّي أَعُوذُ بِكَ مِنْ شَرِّ سَمْعِي، وَمِنْ شَرِّ بَصَرِي، وَمِنْ شَرِّ نَفْسِي، وَمِنْ شَرِّ مَنِيِّي» ”اے اللہ! میں تیری پناہ مانگتا ہوں اپنی سماعت کے شر سے، اپنی بصارت کے شر سے، اپنے نفس (دل) کے شر سے اور اپنی منی (شہوت و جنسی اعضاء) کے شر سے“، یہاں تک کہ میں نے اسے حفظ کر لیا۔“
اس حدیث کی سند صحیح ہے لیکن شیخین نے اسے روایت نہیں کیا۔

سیدنا ابوبکرہ رضی اللہ عنہ سے ان کے بیٹے مسلم بن ابوبکرہ کی روایت ہے کہ میرے والد نے مجھے یہ کہتے ہوئے سنا: اے اللہ! میں فکر و پریشانی، سستی اور قبر کے عذاب سے تیری پناہ مانگتا ہوں، تو انہوں نے پوچھا: اے میرے بیٹے! تم نے یہ کلمات کس سے سنے ہیں؟ میں نے کہا: میں نے آپ ہی کو یہ کہتے ہوئے سنا ہے، انہوں نے فرمایا: ”انہیں لازم پکڑ لو، کیونکہ میں نے رسول اللہ ﷺ کو یہی کلمات کہتے ہوئے سنا ہے۔“
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔

سیدنا ابوہریرہ رضی اللہ عنہ سے روایت ہے کہ رسول اللہ ﷺ ان کلمات کے ذریعے پناہ مانگا کرتے تھے: «أَعُوذُ بِكَ مِنْ عَذَابِ جَهَنَّمَ، وَعَذَابِ الْقَبْرِ، وَفِتْنَةِ الْمَحْيَا وَفِتْنَةِ الْمَمَاتِ، وَفِتْنَةِ الدَّجَّالِ» ”میں تیری پناہ مانگتا ہوں جہنم کے عذاب سے، قبر کے عذاب سے، زندگی اور موت کے فتنے سے اور دجال کے فتنے سے۔“
یہ حدیث امام بخاری کی شرط پر صحیح ہے لیکن شیخین نے اسے روایت نہیں کیا۔