مسند أبي يعلى الموصلي

سیدنا عمرو بن مرہ رضی اللہ عنہ سے روایت ہے کہ انہوں نے سیدنا معاویہ رضی اللہ عنہ سے کہا کہ میں نے رسول اللہ ﷺ کو یہ فرماتے ہوئے سنا: «مَا مِنْ وَالٍ يُغْلَقُ بَابُهُ دُونَ ذَوِي الْخَلَّةِ وَالْحَاجَةِ، إِلَّا أَغْلَقَ اللَّهُ أَبْوَابَ السَّمَاءِ، عَنْ خَلَّتِهِ وَمَسْكَنَتِهِ» ”ایسا کوئی بھی حکمران جو حاجت مندوں، ضرورت مندوں اور مساکین پر اپنے دروازے بند کر لیتا ہے، تو اللہ تعالیٰ بھی اس کی حاجت، ضرورت اور فقر و فاقہ کے وقت آسمان کے دروازے بند کر دیتا ہے“۔

سیدنا عمرو بن مرہ رضی اللہ عنہ سے روایت ہے کہ انہوں نے سیدنا معاویہ رضی اللہ عنہ سے کہا کہ میں نے رسول اللہ ﷺ کو یہ فرماتے ہوئے سنا ہے کہ ”کوئی بھی ایسا امیر یا حاکم نہیں جو ضرورت مند، حاجت مند اور مسکین کے لیے اپنا دروازہ بند کرے مگر یہ کہ اللہ تعالیٰ بھی اس کی ضرورت اور فقر و فاقہ کے وقت آسمان کے دروازے بند فرما دیتا ہے“، (یہ سن کر) سیدنا معاویہ رضی اللہ عنہ نے لوگوں کی حاجات کی نگرانی کے لیے ایک مستقل شخص کو مقرر فرما دیا۔

سیدنا عمرو بن مرہ جہنی رضی اللہ عنہ سے روایت ہے کہ میں رسول اللہ ﷺ کی خدمتِ اقدس میں حاضر تھا کہ آپ ﷺ نے دریافت فرمایا: ”یہاں جو لوگ قبیلہ معد سے تعلق رکھتے ہیں، وہ کھڑے ہو جائیں؟“ وہ بیان کرتے ہیں کہ میں نے کھڑا ہونے کے لیے اپنا کپڑا سنبھالا تو آپ ﷺ نے مجھ سے فرمایا: ”تم بیٹھ جاؤ۔“ پھر جب آپ ﷺ نے دوسری مرتبہ یہی بات فرمائی تو میں نے عرض کی: اے اللہ کے رسول ﷺ! میں کن لوگوں میں سے ہوں؟ آپ ﷺ نے ارشاد فرمایا: ”تمہارا تعلق قبیلہ حِمیَر سے ہے۔“