مصنف ابن ابي شيبه

حضرت عبد اللہ بن ابی اوفیٰ اور حضرت سعید بن جبیر فرماتے ہیں کہ حج اکبر یوم النحر ہے۔

حضرت عمر نے ارشاد فرمایا کہ حج اکبر سے مراد عرفہ کا دن ہے، راوی فرماتے ہیں کہ میں نے حضرت سعید بن المسیب سے اس کا ذکر کیا تو آپ نے فرمایا کہ میں آپ کو حضرت ابن عمر رضی اللہ عنہما سے خبر دیتا ہوں کہ حضرت عمر فرماتے ہیں کہ حج اکبر سے مراد عرفہ کا دن ہے۔

حضرت ابن عون فرماتے ہیں کہ میں نے حضرت محمد سے حج اکبر کے متعلق دریافت کیا ؟ آپ نے فرمایا کہ یہ وہ دن تھا جس دن رسول اکرم (صلی اللہ علیہ وآلہ وسلم) کا حج اور دوسرے مذاہب والوں کا حج موافق ہوا۔

حضرت ابو اسحاق فرماتے ہیں کہ میں نے حضرت عبد اللہ بن شداد سے حج اکبر کے متعلق دریافت کیا ؟ آپ نے فرمایا کہ حج اکبر سے مراد قربانی کا دن ہے۔

حضرت علی رضی اللہ عنہ فرماتے ہیں کہ حج اکبر سے مراد قربانی کا دن ہے۔

ایک شخص نے یوم النحر میں حضرت علی رضی اللہ عنہ کی سواری کی لگام پکڑی اور پوچھا کہ حج اکبر سے کیا مراد ہے ؟ آپ نے فرمایا کہ آج کا دن ہی مراد ہے۔

حضرت مغیرہ بن شعبہ اونٹ پر سوار ہو کر فرما رہے تھے کہ یہ قربانی کا دن ہے، یہ عید الاضحی کا دن ہے اور یہی حج اکبر کا دن ہے۔

حضرت عامر فرماتے ہیں کہ حج اکبر سے مراد وہ دن ہے جس دن قربانی کی جاتی ہے اور احرام کو کھولا جاتا ہے۔

حضرت ابن ابی اوفی ارشاد فرماتے ہیں کہ حج اکبر سے مراد قربانی والا دن ہے۔

حضرت ابن عباس رضی اللہ عنہما فرماتے ہیں کہ حج اکبر سے مراد قربانی کا دن ہے۔

حضرت ابو جحیفہ فرماتے ہیں کہ حج اکبر سے مراد قربانی کا دن ہے۔