مصنف ابن ابي شيبه

حضرت امام زہری سے مروی ہے کہ نبی کریم صلی اللہ علیہ وآلہ وسلم نے صدقۃ الفطر نماز عید سے پہلے ادا کرنیکا حکم فرمایا۔

حضرت نافع سے مروی ہے کہ حضرت عبد اللہ بن عمر رضی اللہ عنہما صدقۃ الفطر نماز سے پہلے ادا فرمایا کرتے تھے۔

حضرت ابن عمر رضی اللہ عنہما سے اسی کے مثل منقول ہے۔

حضرت عبد اللہ بن عباس رضی اللہ عنہما فرماتے ہیں کہ بیشک سنت طریقہ یہ ہے کہ صدقۃ الفطر کو نماز سے پہلے ادا کیا جائے۔

حضرت ابو معشر سے مروی ہے کہ ابراہیم صدقۃ الفطر عید گاہ (کھلا میدان) جانے سے پہلے ادا کرنے کو پسند کرتے تھے۔

حضرت عبد اللہ بن مسلم بن یسار اپنے والد سے روایت کرتے ہیں کہ وہ صدقۃ الفطر نماز عید سے قبل ادا فرمایا کرتے تھے۔

حضرت افلح سے مروی ہے کہ حضرت قاسم نماز سے پہلے صدقۃ الفطر ادا فرمایا کرتے تھے۔

حضرت سعید بن یزید سے مروی ہے کہ حضرت ابو نضرہ محلہ کی مسجد میں یوم الفطر کے دن بیٹھ جاتے، ان کے پاس زکوٰۃ (وغیرہ) لائی جاتی تو اور جو باقی رہ جاتے ان کی طرف قاصد روانہ کرتے ان کی زکوٰۃ بھی آجاتی وہ اس کو محلہ کے فقراء کے درمیان تقسیم فرماتے پھر مسجد سے نکلتے۔

حضرت ضحاک فرماتے ہیں کہ آدمی عید الفطر کے دن عید گاہ کی طرف تب تک نہ جائے جب تک کہ صدقۃ الفطر ادا نہ کرے اور جو اس کے اہل پر واجب ہے وہ ادا نہ کرلے۔

حضرت عکرمہ فرماتے ہیں کہ اپنی نماز سے قبل (نماز عید) زکوٰۃ (صدقۃ الفطر) ادا کرو۔

حضرت حکم سے مروی ہے کہ فقہاء کرام صدقۃ الفطر نماز سے قبل ادا کرنے کو پسند فرماتے تھے۔ جب کہ حضرت عامر فرماتے ہیں کہ اگر چاہے تو صدقۃ الفطر نماز سے پہلے ادا کرے اور اگر چاہے تو بعد میں ادا کرلے۔

حضرت ابن عون سے مروی ہے کہ حضرت ابن سیرین صدقۃ الفطر نماز کے بعد ادا فرمایا کرتے تھے۔

حضرت مجاہد فرماتے ہیں کہ صدقۃ الفطر یوم الفطر کی زکوٰۃ ہے۔ اور جو اس کو نماز کے بعد ادا کرے تو یہ اس کے حق میں صدقہ ہے۔