المعجم الكبير للطبراني

سیدہ ام سلمہ رضی اللہ عنہا سے روایت ہے کہ رسول اللہ ﷺ نے فرمایا: ”ایک خلیفہ کی وفات کے وقت اختلاف پیدا ہو گا، تو بنو ہاشم میں سے ایک شخص مدینہ سے مکہ کی طرف نکلے گا، پھر لوگ اس کے پاس آئیں گے اور رکن اور مقام کے درمیان اس کی بیعت کریں گے، حالانکہ وہ خود اسے ناپسند کرے گا۔ پھر ان کے خلاف شام سے ایک لشکر تیار کیا جائے گا، یہاں تک کہ جب وہ بیداء پر پہنچیں گے تو انہیں زمین میں دھنسا دیا جائے گا۔ پھر عراق کے جتھے اور شام کے ابدال اس کے پاس آ جائیں گے، اور شام میں ایک شخص اٹھے گا جس کے ننہال کلب قبیلے میں ہوں گے، وہ ان کے خلاف ایک لشکر تیار کرے گا، تو اللہ انہیں شکست دے گا، اور شکست انہی پر ہو گی، اور یہ کلب کا دن کہلائے گا، اور محروم وہی ہو گا جو کلب کی غنیمت سے محروم رہے۔ اور وہ خزانے نکالے گا اور مال تقسیم کرے گا، اور اسلام اپنا بوریا بستر زمین پر پھیلا دے گا، وہ اسی حال میں سات سال یا چھ سال زندہ رہے گا۔“
عبیداللہ کہتے ہیں: میں نے یہ حدیث لیث کو سنائی تو انہوں نے کہا: مجھے یہ حدیث مجاہد نے بیان کی ہے۔

سیدہ ام سلمہ رضی اللہ عنہا سے روایت ہے کہ انہوں نے عرض کیا: یا رسول اللہ! ہشام بن مغیرہ کھانا کھلاتا، مہمان نوازی کرتا، صلہ رحمی کرتا اور قیدی چھڑاتا تھا، اگر وہ آپ کا زمانہ پاتا تو اسلام لے آتا، تو کیا اسے اس کا کوئی اجر ملے گا؟ آپ ﷺ نے فرمایا: ”وہ تمہارا چچا دنیا، اس کے تذکرے اور اس کی زیبائش کے لیے دیتا تھا، اور اس نے کبھی ایک دن بھی یہ نہیں کہا: اے اللہ! مجھے روزِ جزا بخش دے۔“

سیدہ ام سلمہ رضی اللہ عنہا فرماتی ہیں: ”ہم میں سے کسی کو حیض آتا تھا حالانکہ اس کے پاس ایک ہی کپڑا ہوتا تھا، اور آج ہم میں سے کوئی اپنی خادمہ کو صرف اس لیے فارغ کرتی ہے کہ وہ اس کے کپڑے دھو کر پاک کر دے۔“

مجاہد بیان کرتے ہیں: سیدہ ام سلمہ رضی اللہ عنہا سے پوچھا گیا کہ کیا احرام کی حالت میں عورت اپنا چہرہ ڈھانپ سکتی ہے؟ تو انہوں نے فرمایا: ”سوار ہمارے پاس سے گزرتے تھے جبکہ ہم نبی کریم ﷺ کے ساتھ ہوتے تھے، تو ہم میں سے کوئی اپنے چہرے پر کپڑا لٹکا لیتی تھی۔“