المعجم الكبير للطبراني

سیدہ عائشہ اور سیدہ ام سلمہ رضی اللہ عنہما دونوں فرماتی ہیں: سیدہ صفیہ بنت حیی رضی اللہ عنہا کو قربانی کے دن سے پہلے حیض آ گیا، تو رسول اللہ ﷺ ان کے پاس تشریف لائے جبکہ وہ رو رہی تھیں، آپ ﷺ نے فرمایا: ”کیا یہ ہمیں روک رکھے گی؟ کیا تم نے قربانی کے دن طوافِ افاضہ کر لیا تھا؟“ انہوں نے عرض کیا: جی ہاں۔ آپ ﷺ نے فرمایا: ”تو پھر روانہ ہو جاؤ۔“

سیدہ ام سلمہ رضی اللہ عنہا سے روایت ہے، وہ کہتی ہیں: رسول اللہ ﷺ ہمارے پاس تشریف لائے جبکہ فلاں شخص بیمار تھا، آپ ﷺ نے پوچھا: ”یہ کیا ہے؟“ ہم نے عرض کیا: ہمیں اس پر نظرِ بد کا گمان ہے، آپ ﷺ نے فرمایا: ”تم اس کے لیے نظرِ بد کا دم کیوں نہیں کرواتے؟“

سیدہ ام سلمہ رضی اللہ عنہا کہتی ہیں: ایک رات میں نے مسیح دجال کا ذکر کیا تو مجھے نیند نہ آئی، پھر جب صبح ہوئی تو میں صبح سویرے رسول اللہ ﷺ کے پاس گئی اور آپ ﷺ کو یہ بات بتائی، آپ ﷺ نے فرمایا: ”ایسا نہ کرو، اگر وہ میری موجودگی میں نکلا تو اللہ میرے ذریعے تمہاری کفایت فرمائے گا، اور اگر وہ میرے مرنے کے بعد نکلا تو اللہ نیک لوگوں کے ذریعے تمہاری کفایت فرمائے گا۔“ پھر آپ ﷺ کھڑے ہوئے اور دجال کا ذکر کیا، فرمایا: ”کوئی نبی ایسا نہیں گزرا جس نے اپنی امت کو اس سے خبردار نہ کیا ہو، اور میں تمہیں اس سے خبردار کرتا ہوں، بے شک وہ کانا ہے، اور اللہ تعالیٰ کانا نہیں ہے، خبردار! مسیح دجال کی آنکھ گویا ابھری ہوئی انگور کے دانے کی طرح ہے۔“

سیدہ ام سلمہ رضی اللہ عنہا سے روایت ہے، وہ کہتی ہیں: رسول اللہ ﷺ نے مزدلفہ کی رات مجھے اپنے کمزور گھر والوں کے ساتھ آگے بھیج دیا۔ وہ کہتی ہیں: تو میں نے رات ہی میں جمرہ کو کنکریاں ماریں، پھر مکہ کی طرف چلی گئی، وہاں صبح کی نماز پڑھی، پھر منیٰ واپس آ گئی۔

سیدہ ام سلمہ رضی اللہ عنہا سے روایت ہے کہ انہوں نے نبی کریم ﷺ سے عرض کیا: میں نے ابھی طوافِ وداع نہیں کیا۔ نبی کریم ﷺ نے ان سے فرمایا: ”جب لوگ صبح کی نماز پڑھ لیں تو تم اپنی اونٹنی پر صفوں کے پیچھے سے طواف کر لو، پھر نکل جاؤ۔“