المعجم الكبير للطبراني

محمد بن سلام رحمہ اللہ فرماتے ہیں: عمرو بن معدی کرب کی زمانہ جاہلیت میں کئی لڑائیاں ہوئیں، پھر انہوں نے اسلام کا زمانہ پایا، نبی کریم ﷺ کی خدمت میں حاضر ہوئے، اور سیدنا عمر بن خطاب رضی اللہ عنہ نے انہیں سیدنا سعد بن ابی وقاص رضی اللہ عنہ کی طرف قادسیہ بھیجا، وہاں انہوں نے بڑی جانفشانی دکھائی۔ سیدنا عمر رضی اللہ عنہ نے سیدنا سعد بن ابی وقاص رضی اللہ عنہ کو لکھا کہ میں نے تمہاری مدد دو ہزار آدمیوں سے کی ہے: (یعنی) عمرو بن معدی کرب اور طلحہ بن خویلد، یعنی طلحہ اسدی، (یہ دونوں دو ہزار کے برابر ہیں)، تو جنگ کے معاملے میں ان دونوں سے مشورہ کرو لیکن انہیں کوئی عہدہ نہ دو۔

قیس بن ابی حازم رحمہ اللہ فرماتے ہیں: میں نے عمرو بن معدی کرب کو قادسیہ کے دن دیکھا، وہ لوگوں کو جنگ پر ابھار رہے تھے اور کہہ رہے تھے: ”اے لوگو! مضبوط، غالب اور نڈر شیر بن جاؤ، فارسی تو محض ایک بکرا ہے جب اپنا چھوٹا نیزہ پھینک دے۔“ راوی کہتے ہیں: وہ اسی حال میں تھے کہ فارس کے شہسواروں میں سے ایک شہسوار ان کی طرف تیر کا نشانہ باندھے ہوئے تھا، ان سے کہا گیا: اے ابوثور! یہ شہسوار آپ کو اپنے تیر کا نشانہ بنا رہا ہے۔ راوی کہتے ہیں: چنانچہ اس نے تیر چلایا جو عمرو کی کمان کے کنارے پر لگا اور اسے توڑ دیا، تو عمرو نے اس پر حملہ کیا اور اسے نیزہ مار کر اس کی کمر توڑ دی، پھر (اس کے پاس) اتر کر اس کے دونوں کڑے اتار لیے جو سونے کے تھے، اور ایک ریشمی لباس بھی، راوی کہتے ہیں: پھر وہ (سامان) انہی کے حوالے کر دیا گیا۔

محمد بن سلام رحمہ اللہ کہتے ہیں: ہمارے بعض ساتھیوں نے مجھ سے بیان کیا کہ سیدنا سلمان بن ربیعہ رضی اللہ عنہ نے گھوڑوں کی تربیت اور آزمائش کی، اسی دوران سیدنا عمرو بن معدی کرب رضی اللہ عنہ اپنے گھوڑے پر وہاں سے گزرے تو سلمان نے ان سے کہا: یہ تو دوغلی نسل کا گھوڑا ہے۔ عمرو نے کہا: نہیں، یہ خالص نسل کا ہے۔ راوی کہتے ہیں: سلمان نے حکم دیا تو اس گھوڑے کو پیاسا رکھا گیا، پھر ایک طشت میں پانی منگوایا اور خالص نسل کے گھوڑوں کو بلایا تو انہوں نے (سیدھا کھڑے ہو کر) پانی پیا، پھر عمرو کا گھوڑا آیا اور اس نے اپنی دونوں اگلی ٹانگیں موڑ کر (جھک کر) پانی پیا، اور یہ دوغلی نسل کے جانور کا انداز ہے۔ سلمان نے عمرو سے کہا: کیا تم دیکھتے نہیں؟ عمرو نے کہا: ہاں، دوغلا دوغلے کو پہچان لیتا ہے۔ یہ بات سیدنا عمر رضی اللہ عنہ تک پہنچی تو انہوں نے انہیں لکھا: ”مجھے پتا چلا ہے جو تم نے اپنے امیر سے کہا، اور مجھے یہ بھی معلوم ہوا ہے کہ تمہاری ایک تلوار ہے جسے تم صمصامہ کہتے ہو، جبکہ میرے پاس ایک تیز دھار تلوار ہے، اللہ کی قسم! اگر میں نے وہ تمہارے سر پر رکھ دی تو اسے اس وقت تک نہ ہٹاؤں گا جب تک اس کے ذریعے (تمہارے) پیٹ کی ایک چیز تک نہ پہنچ جاؤں (راوی نے پیٹ کی اس چیز کا نام لیا)، پس اگر تمہیں یہ جاننا اچھا لگتا ہے کہ میں جو کہہ رہا ہوں وہ سچ ہے تو دوبارہ ایسی بات کر کے دیکھو۔“