المعجم الكبير للطبراني

عروہ بیان کرتے ہیں کہ بدر میں شریک ہونے والے قریش میں سے، بنو عدی بن کعب میں سے، زید بن خطاب رضی اللہ عنہ تھے۔
ابن شہاب زہری بیان کرتے ہیں کہ بدر میں شریک ہونے والے قریش میں سے، پھر بنو عدی بن کعب میں سے، زید بن خطاب رضی اللہ عنہ تھے۔
ابن شہاب زہری بیان کرتے ہیں کہ یمامہ کے دن شہید ہونے والے قریش میں سے، پھر بنو عدی بن کعب میں سے، زید بن خطاب رضی اللہ عنہ تھے۔

عبداللہ بن حکم بن ابی زیاد بیان کرتے ہیں کہ زید بن خطاب رضی اللہ عنہ عمر رضی اللہ عنہ سے عمر میں بڑے تھے، ان کی کنیت ابوعبدالرحمن تھی، اور انہیں ابوثور بھی کہا جاتا تھا۔

سیدنا عبداللہ بن عمر رضی اللہ عنہما سے روایت ہے کہ رسول اللہ ﷺ نے فرمایا: ”سانپوں کو مار ڈالو، اور دو دھاری اور دم کٹے سانپ کو (خاص طور پر) مار ڈالو، کیونکہ یہ دونوں حمل گرا دیتے ہیں اور بینائی زائل کر دیتے ہیں۔“
سیدنا ابن عمر رضی اللہ عنہما کہتے ہیں: مجھے ابولبابہ یا زید بن خطاب رضی اللہ عنہ نے دیکھا کہ میں ایک سانپ کے پیچھے بھاگ رہا تھا تاکہ اسے مار ڈالوں، تو انہوں نے مجھے روک دیا۔ میں نے کہا: رسول اللہ ﷺ نے تو انہیں مارنے کا حکم دیا ہے۔ انہوں نے کہا: آپ ﷺ نے اس کے بعد گھروں میں رہنے والے سانپوں کو مارنے سے منع فرما دیا تھا۔ زہری کہتے ہیں: ان سے مراد وہ سانپ ہیں جو گھروں میں بس جاتے ہیں۔

سیدنا عبداللہ بن عمر رضی اللہ عنہما سے روایت ہے کہ رسول اللہ ﷺ نے فرمایا: ”سانپوں کو مار ڈالو۔“
سیدنا ابن عمر رضی اللہ عنہما کہتے ہیں: مجھے ابولبابہ اور زید بن خطاب رضی اللہ عنہ نے دیکھا کہ میں گھر میں رہنے والے ایک سانپ کو مار رہا تھا، اور ہم انہیں جنان کہا کرتے تھے، تو ان دونوں نے کہا: عبداللہ! رسول اللہ ﷺ نے ہمیں گھروں میں رہنے والے سانپوں کو مارنے سے منع فرمایا ہے۔

سیدنا عبداللہ بن عمر رضی اللہ عنہما، سیدنا ابولبابہ بن عبدالمنذر اور سیدنا زید بن خطاب رضی اللہ عنہما سے روایت ہے کہ نبی کریم ﷺ نے گھر میں رہنے والے سانپوں کو مارنے سے منع فرمایا۔

سیدنا عبداللہ بن عمر رضی اللہ عنہما بیان کرتے ہیں کہ انہوں نے رسول اللہ ﷺ کو فرماتے سنا: ”دو دھاری اور دم کٹے سانپ کو مار ڈالو، کیونکہ یہ دونوں بینائی زائل کر دیتے ہیں اور حمل گرا دیتے ہیں۔“
عبداللہ بن عمر رضی اللہ عنہما کہتے ہیں: میں کوئی سانپ نہیں چھوڑتا تھا مگر اسے مار ڈالتا، یہاں تک کہ ابولبابہ بن منذر اور زید بن خطاب رضی اللہ عنہما نے مجھے دیکھا کہ میں گھروں میں رہنے والے ایک سانپ کے پیچھے پڑا ہوا ہوں، تو ان دونوں نے مجھے اسے مارنے سے روک دیا۔ میں نے کہا: رسول اللہ ﷺ نے تو انہیں مارنے کا حکم دیا ہے۔ ان دونوں نے کہا: آپ ﷺ نے گھروں میں رہنے والے سانپوں کو مارنے سے منع فرما دیا تھا۔

سیدنا زید بن خطاب رضی اللہ عنہ بیان کرتے ہیں: … ہم نے دیکھا کہ آپ ﷺ گویا کچھ سرگوشی کر رہے ہیں، پھر رسول اللہ ﷺ اٹھے تو اپنی آنکھوں سے آنسو پونچھ رہے تھے۔ سیدنا عمر رضی اللہ عنہ، جو ہم میں سب سے آگے تھے، آپ ﷺ سے ملے اور عرض کیا: میرے ماں باپ آپ پر قربان! آپ کو کس چیز نے رلا دیا؟ آپ ﷺ نے فرمایا: ”میں نے اپنے رب عزوجل سے اپنی والدہ کی قبر کی زیارت کی اجازت مانگی، وہ میری ماں تھیں اور ان کا مجھ پر حق تھا کہ میں ان کے لیے استغفار کروں، تو مجھے اجازت نہ ملی۔“ پھر آپ ﷺ نے ہمیں اشارہ کیا کہ بیٹھ جاؤ، تو ہم بیٹھ گئے۔ آپ ﷺ نے فرمایا: ”میں نے تمہیں قبروں کی زیارت سے منع کیا تھا، اب جو چاہے زیارت کرے۔ اور میں نے تمہیں تین دن سے زیادہ قربانی کا گوشت رکھنے سے منع کیا تھا، اب جتنا چاہو کھاؤ اور ذخیرہ کرو۔ اور میں نے تمہیں بعض برتنوں سے منع کیا تھا اور بعض دوسرے برتنوں کا حکم دیا تھا، اب جس برتن میں چاہو نبیذ بناؤ، کیونکہ برتن نہ کسی چیز کو حلال کرتا ہے نہ حرام، لیکن ہر نشہ آور چیز سے بچو۔“