المعجم الأوسط

سیدنا ابوہریرہ رضی اللہ عنہ سے روایت ہے کہ نبی کریم ﷺ نے اللہ عزوجل کے اس فرمان ﴿وَمَنْ يَقْتُلْ مُؤْمِنًا مُتَعَمِّدًا فَجَزَاؤُهُ جَهَنَّمُ﴾ کے بارے میں فرمایا: ”اگر اللہ اسے سزا دے (تو یہی اس کی سزا ہے)۔“
امام طبرانی رحمہ اللہ فرماتے ہیں: ”اس حدیث کو محمد بن سیرین رحمہ اللہ سے حجاج بن اسود کے سوا کسی نے روایت نہیں کیا، اور حجاج سے علاء بن میمون کے سوا کسی نے روایت نہیں کیا، اس میں محمد بن جامع منفرد ہیں۔“

سیدنا ابو بکرہ اور سیدنا عمران بن حصین رضی اللہ عنہما سے روایت ہے کہ رسول اللہ ﷺ نے فرمایا: ”حیاء ایمان کا حصہ ہے، اور ایمان والا جنت میں جائے گا، جبکہ بے حیائی اور بدزبانی سنگ دلی و بداخلاقی سے ہے، اور سنگ دلی و بداخلاقی جہنم میں لے جانے والی ہے۔“
عبدالجبار بن عبداللہ رحمہ اللہ بیان کرتے ہیں کہ خلیفہ مامون نے خطبہ دیا تو حیاء کا خوب ذکر کیا، پھر یہ حدیث بیان کی۔

ایک آدمی ابو بکر بن عیاش رحمہ اللہ کے پاس آیا اور کہنے لگا: ”میں نے ایک شخص کو یہ کہتے سنا ہے کہ اللہ تعالیٰ نے موسیٰ علیہ السلام سے حقیقی طور پر کلام نہیں فرمایا۔“ انہوں نے کہا: ”یہ بات تو کوئی کافر ہی کہہ سکتا ہے۔ میں نے اعمش رحمہ اللہ کے سامنے قرآن پڑھا، اور اعمش نے یحییٰ بن وثاب رحمہ اللہ کے سامنے پڑھا، اور یحییٰ بن وثاب نے ابو عبدالرحمن رحمہ اللہ کے سامنے پڑھا، اور ابو عبدالرحمن نے سیدنا علی بن ابی طالب رضی اللہ عنہ کے سامنے پڑھا، اور سیدنا علی رضی اللہ عنہ نے رسول اللہ ﷺ کے سامنے پڑھا: ﴿وَكَلَّمَ اللَّهُ مُوسَىٰ تَكْلِيمًا﴾ (اور اللہ نے موسیٰ سے خوب کلام فرمایا)۔“
امام طبرانی رحمہ اللہ فرماتے ہیں: ”اس حدیث کو اعمش سے ابو بکر بن عیاش کے سوا کسی نے روایت نہیں کیا، اور عبدالجبار بن عبداللہ اس کی روایت میں منفرد ہیں۔“