مجمع الزوائد ومنبع الفوائد

سیدنا عبداللہ بن عمر رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” کوئی شخص لوگوں سے مسلسل مانگتا رہے گا یہاں تک کہ جب وہ قیامت کے دن آئے گا تو اس کے چہرے پر گوشت کا کوئی ٹکڑا نہیں ہو گا ۔ “ نبی اکرم صلی اللہ علیہ وسلم نے یہ بھی ارشاد فرمایا : ” قیامت کے دن سورج قریب آ جائے گا ، یہاں تک کہ پسینہ نصف کان تک پہنچ رہا ہو گا ، لوگ اسی حالت میں ہوں گے ، اسی دوران وہ سیدنا آدم علیہ السلام سے مدد چاہیں گے تو وہ کہیں گے : میں اس کا متعلقہ فرد نہیں ہوں ، پھر وہ سیدنا موسیٰ علیہ السلام ( سے مدد چاہیں گے ) تو وہ بھی یہی کہیں گے ، پھر وہ سیدنا محمد صلی اللہ علیہ وسلم ( سے مدد چاہیں گے ) تو وہ شفاعت کریں گے ، تو اللہ تعالیٰ مخلوق کے درمیان فیصلہ کرے گا ، پھر سیدنا محمد صلی اللہ علیہ وسلم چلتے ہوئے جائیں گے ، یہاں تک کہ وہ جنت کے حلقے ( یعنی دروازے کی کنڈی ) کو پکڑ لیں گے ، اس دن اللہ تعالیٰ انہیں ” مقام محمود “ پر فائز کرے گا جس کے حوالے سے تمام اہل محشر ان کی تعریف کریں گے ۔ “ ( علامہ ہیثمی فرماتے ہیں : ) میں یہ کہتا ہوں :
یہ روایت ” صحیح “ میں اختصار کے ساتھ مذکور ہے جو یہ الفاظ ہیں : ” تو اللہ تعالیٰ مخلوق کے درمیان فیصلہ کرے گا ۔ ۔ ۔ ۔ ۔ ۔ “ اس کے بعد سے لے کر آخر تک کے الفاظ ہیں ۔
یہ روایت امام طبرانی نے معجم اوسط میں مطلب بن شعیب کے حوالے سے عبداللہ بن صالح سے نقل کی ہے اور ان دونوں کی توثیق کی گئی ہے ، اگرچہ ان دونوں میں ضعف پایا جاتا ہے ، اس روایت کے بقیہ رجال صحیح کے رجال ہیں ۔

سیدنا سلمان رضی اللہ عنہ بیان کرتے ہیں : قیامت کے دن سورج کو دس سال کی گرمی دے دی جائے گی ، پھر وہ لوگوں کے سروں کے قریب آ جائے گا ، راوی کہتے ہیں اس کے بعد انہوں نے پوری حدیث ذکر کی ہے جس میں آگے چل کر وہ بیان کرتے ہیں : ” پھر لوگ نبی اکرم صلی اللہ علیہ وسلم کے پاس آئیں گے اور یہ کہیں گے : اے اللہ کے نبی ! آپ وہ ہیں کہ اللہ تعالیٰ نے آپ کو فتح عطا کی ، آپ کے گزشتہ اور آئندہ ذنب کی مغفرت کر دی ، ہم جس صورتحال کا شکار ہیں ، آپ اُسے ملاحظہ کر رہے ہیں ، تو آپ اپنے پروردگار کی بارگاہ میں ہماری شفاعت کریں ، نبی اکرم صلی اللہ علیہ وسلم فرمائیں گے : تمہارا متعلقہ فرد ہوں ، پھر نبی اکرم صلی اللہ علیہ وسلم سب لوگوں کو ساتھ لے کر روانہ ہوں گے ، یہاں تک کہ آپ جنت کے دروازے کے پاس آ جائیں گے ، آپ دروازے کی کنڈی کو پکڑیں گے ، جو سونے کی بنی ہوئی ہو گی اور اس کے ذریعے دروازہ کھٹکھٹائیں گے ( اندر سے دربان فرشتہ ) دریافت کرے گا : کون ہے ؟ آپ فرمائیں گے : محمد ( صلی اللہ علیہ وسلم ) تو آپ کے لئے قیامت کے دن اس کو کھول دیا جائے گا ، یہاں تک کہ آپ اللہ تعالیٰ کے سامنے آئیں گے اور سجدے میں چلے جائیں گے تو پروردگار فرمائے گا : تم اپنا سر اٹھاؤ ، تو مانگو تمھیں دیا جائے گا ، تم شفاعت کرو تمھاری شفاعت قبول ہو گی ( سیدنا سلمان فارسی رضی اللہ عنہ نے یا نبی اکرم صلی اللہ علیہ وسلم نے یہ فرمایا : ) یہ ” مقام محمود “ ہے ۔
یہ روایت امام طبرانی نے نقل کی ہے اور اس کے رجال صحیح کے رجال ہیں ۔

ابونضرہ بیان کرتے ہیں : میں نے سیدنا عبداللہ بن عباس رضی اللہ عنہما کو بصرہ کے منبر پر خطبہ دینے کے دوران یہ ارشاد فرماتے ہوئے سنا : نبی اکرم صلی اللہ علیہ وسلم نے ارشاد فرمایا : ” ہر نبی کے لئے ایک مخصوص دعا تھی جسے اس نے دنیا میں مخصوص نتیجے کے حصول کے لیے استعمال کر لیا اور میں نے اپنی مخصوص دعا کو قیامت کے دن اپنی امت کی شفاعت کے لیے سنبھال کے رکھ لیا ہے ، میں اولاد آدم کا سردار ہوں اور یہ بات فخر کے طور پر نہیں کہہ رہا ( قیامت کے دن ) سب سے پہلے میرے لئے زمین کو شق کیا جائے گا اور یہ فخر کے طور پر نہیں کہہ رہا ، میرے ہاتھ میں ” لواء الحمد “ ہو گا ، سیدنا آدم علیہ السلام اور ان کے علاوہ سب میرے جھنڈے کے نیچے ہوں گے اور یہ فخر کے طور پر نہیں کہہ رہا ۔ قیامت کا دن لوگوں کے لئے طویل اور مشکل کا باعث ہو گا یہاں تک کہ وہ ایک دوسرے سے یہ کہیں گے : تم ہمارے ساتھ سیدنا آدم علیہ السلام کے پاس چلو جو بنی نوع انسان کے جد امجد ہیں ، تاکہ وہ ہمارے پروردگار کی بارگاہ میں ہماری شفاعت کریں اور وہ پروردگار ہمارے درمیان فیصلہ کر دے ، وہ لوگ سیدنا آدم علیہ السلام کے پاس جائیں گے اور یہ کہیں گے : اے سیدنا آدم ! آپ اپنے پروردگار کی بارگاہ میں ہماری شفاعت کیجئے تاکہ وہ ہمارے درمیان فیصلہ کر دے ، تو سیدنا آدم علیہ السلام کہیں گے ، میں یہ نہیں کر سکتا ، کیونکہ میری خطا کی وجہ سے مجھے جنت سے نکالا گیا تھا ، تو آج مجھے صرف اپنی ذات کے حوالے سے پریشانی ہے ، تم لوگ سیدنا نوح علیہ السلام کے پاس جاؤ ، لوگ سیدنا نوح علیہ السلام کے پاس آئیں گے اور یہ کہیں گے : اے سیدنا نوح ( علیہ السلام ) ! آپ اپنے پروردگار کی بارگاہ میں ہماری شفاعت کیجئے کہ وہ ہمارے درمیان فیصلہ کر دے ، تو سیدنا نوح علیہ السلام کہیں گے : میں یہ نہیں کر سکتا کیونکہ میں نے ایک دعا کی تھی ، جس کی وجہ سے تمام اہل زمین ڈوب گئے ، تو آج مجھے صرف اپنی ذات کی فکر ہے ، تم لوگ سیدنا ابراہیم خلیل الرحمن علیہ السلام کے پاس جاؤ ! وہ لوگ سیدنا ابراہیم علیہ السلام کے پاس آئیں گے اور یہ کہیں گے : اے سیدنا ابراہیم ( علیہ السلام ) ! آپ اپنے پروردگار کے سامنے ہماری شفاعت کیجئے تاکہ وہ ہمارے درمیان فیصلہ کر دے ، سیدنا ابراہیم علیہ السلام کہیں گے : میں یہ نہیں کر سکتا ، میں نے اسلام میں تین مرتبہ ذومعنی باتیں کی تھیں ( شاید راوی کہتے ہیں : ایک بات تو ان کا یہ کہنا ہے کہ میں بیمار ہوں ، ایک بات ان کا یہ کہنا ہے : بلکہ ان میں سے بڑے نے یہ کیا ہے اور ایک وہ بات جو انہوں نے بادشاہ سے کہی تھی ، جب وہ اس کے علاقے سے گزرے تھے ) نبی اکرم صلی اللہ علیہ وسلم نے ارشاد فرمایا ہے : اللہ کی قسم ! انہوں نے ان ذومعنی باتوں کے ذریعے مراد صرف اللہ کے دین کا غلبہ لیا تھا ( سیدنا ابراہیم علیہ السلام کہیں گے : ) آج مجھے صرف اپنی فکر ہے ، تم لوگ سیدنا موسیٰ علیہ السلام کے پاس جاؤ جو ایسے بندے ہیں جنہیں اللہ تعالیٰ نے اپنی رسالت کے لئے منتخب کیا اور ان کے ساتھ کلام کیا ، لوگ سیدنا موسیٰ علیہ السلام کے پاس آئیں گے اور یہ کہیں گے : اے سیدنا موسیٰ ( علیہ السلام ) ! آپ اپنے پروردگار کے سامنے ہماری شفاعت کیجئے کہ وہ ہمارے درمیان فیصلہ کر دے ، سیدنا موسیٰ علیہ السلام کہیں گے : میں یہ نہیں کر سکتا کیونکہ میں نے ایک شخص کو قتل کیا تھا ، تو آج مجھے صرف اپنی فکر ہے ، تم لوگ سیدنا عیسیٰ علیہ السلام کے پاس جاؤ جو اللہ کی روح اور اس کا کلمہ ہیں ، وہ لوگ سیدنا عیسیٰ علیہ السلام کے پاس آئیں گے اور یہ کہیں گے : اے سیدنا عیسیٰ علیہ السلام ! آپ اپنے پروردگار کے سامنے ہماری شفاعت کیجئے کہ وہ ہمارے درمیان فیصلہ کر دے تو سیدنا عیسیٰ علیہ السلام کہیں گے : میں یہ نہیں کر سکتا ، مجھے اللہ کو چھوڑ کر معبود بنا لیا گیا تھا ، تو آج مجھے صرف اپنی فکر ہے ، اس بارے میں تمہارا کیا خیال ہے ؟ اگر کوئی ایسا سامان ہو جو مہر بند ہو اور وہ کسی ایسے برتن میں ہو جس پر مہر لگائی گئی ہو تو کیا اس سامان کو نکالا جا سکتا ہے ، جب تک مہر کو توڑا نہ جائے ؟ لوگ جواب دیں گے : جی نہیں ! تو سیدنا عیسیٰ علیہ السلام کہیں گے : سیدنا محمد ( صلی اللہ علیہ وسلم ) خاتم النبیین ہیں ، وہ موجود ہیں ، اللہ تعالیٰ نے ان کے گزشتہ اور آئندہ ذنب کی مغفرت کر دی ہوئی ہے ، نبی اکرم صلی اللہ علیہ وسلم فرماتے ہیں : تو وہ لوگ میرے پاس آئیں گے اور یہ کہیں گے : اے سیدنا محمد ( صلی اللہ علیہ وسلم ) ! آپ اپنے پروردگار کے سامنے ہماری شفاعت کیجئے کہ وہ ہمارے درمیان فیصلہ کر دے ، تو میں یہ کہوں گا : میں اس کام کے لیے ہوں ، یہاں تک کہ اللہ تعالیٰ جس کو چاہے گا اور جس سے راضی ہو گا ، اُسے اجازت دے گا ۔ جب اللہ تعالیٰ اپنی مخلوق کے درمیان فیصلہ کرنے کا ارادہ کرے گا تو ایک منادی پکار کر یہ کہے گا : سیدنا أحمد ( صلی اللہ علیہ وسلم ) اور ان کی امت کہاں ہے ؟ سیدنا أحمد ( صلی اللہ علیہ وسلم ) اور ان کی امت کہاں ہیں ؟ تو وہ لوگ آئیں گے ، ہم پہلے والے ہیں اور آخر والے ہیں ، ہم آخر میں مبعوث ہونے والے ہیں اور وہ لوگ ہیں جن سے آخر میں حساب لیا جائے گا ، تو دیگر امتیں ہمارے لئے راستہ چھوڑ دیں گی اور ہم چلتے ہوئے جائیں گے ، طہارت کے آثار کی وجہ سے ہماری پیشانیاں چمک رہی ہوں گی ، دوسری امتیں یہ کہیں گی : یہ امت ( تعداد کے حوالے سے ) اس کے قریب ہے کہ جتنی دیگر تمام انبیاء کی امتیں ہیں ۔ “
یہ روایت امام ابویعلیٰ اور امام أحمد نے نقل کی ہے اس کی سند میں ایک راوی علی بن زید ہے ، جس کے ضعیف ہونے کے باوجود اس کی توثیق کی گئی ہے ان دونوں کے بقیہ رجال صحیح کے رجال ہیں ، امام أحمد نے یہ الفاظ زائد نقل کیے ہیں : ” ہم جنت کے دروازے پر آئیں گے ، میں دروازے کی کنڈی پکڑوں گا اور دروازہ کھٹکھٹاؤں گا ، تو کہا: جائے گا : آپ کون ہیں ؟ تو میں جواب دوں گا : میں محمد ( صلی اللہ علیہ وسلم ) ہوں ، تو میرے لئے دروازہ کھول دیا جائے گا ، میں اپنے پروردگار کی بارگاہ میں آؤں گا جو اپنی کرسی پر ۔ ( راوی کو شک ہے ، یا شاید یہ الفاظ ہیں : ) ۔ اپنے پلنگ پر ہو گا ، میں اس کے سامنے سجدے میں گر جاؤں گا اور ایسے کلمات کے ہمراہ اس کی حمد بیان کروں گا کہ اس جیسے کلمات کے ذریعے مجھ سے پہلے کسی نے اس کی حمد بیان نہیں کی ہو گی اور ان کلمات کے ذریعے کوئی میرے بعد اس کی حمد بیان نہیں کرے گا ، پھر یہ کہا: جائے گا : اے محمد ( صلی اللہ علیہ وسلم ) ! تم اپنا سر اٹھاؤ ، تو مانگو ، تمھیں دیا جائے گا ، تم شفاعت کرو ، تمھاری شفاعت قبول ہو گی ، تو میں اپنا سر اٹھاؤں گا اور میں یہ کہوں گا : اے میرے پروردگار ! میری امت ، میری امت ، تو پروردگار فرمائے گا : تم اس شخص کو نکال دو جس کے دل میں یہ یہ ہو ۔ ( یہاں روایت کے الفاظ حماد نامی راوی کو یاد نہیں رہے ) ۔ نبی اکرم صلی اللہ علیہ وسلم نے فرمایا : پھر میں واپس آؤں گا اور سجدے میں چلا جاؤں گا ، پھر میں کچھ کلمات پڑھوں گا تو یہ کہا: جائے گا : تم اپنا سر اٹھاؤ ، تم کہو سنا جائے گا ، تم مانگو تمھیں دیا جائے گا ، تم شفاعت کرو تمھاری شفاعت قبول کی جائے گی ، تو میں یہ کہوں گا : اے میرے پروردگار ! میری امت ، میری امت ، تو یہ کہا: جائے گا : تم اس کو نکال دو ، جس کے دل میں یہ اور یہ ہو ، یہ مقدار پہلے والی سے کم ہو گی ، پھر میں دوبارہ آؤں گا اور سجدے میں چلا جاؤں گا اس کی مانند کلمات پڑھوں گا تو یہ کہا: جائے گا : تم اپنا سر اٹھاؤ اور تم کہو ، تمہاری بات کو سنا جائے گا ، تم مانگو تمھیں دیا جائے گا ، تم شفاعت کرو تمھاری شفاعت قبول ہو گی ، تو میں کہوں گا : اے میرے پروردگار ! میری امت ، میری امت ، تو یہ کہا: جائے گا : تم اُس کو نکال لو ، جس کے دل میں یہ اور یہ ہو ، یہ مقدار پہلی والی سے بھی کم ہو گی ۔ “