مجمع الزوائد ومنبع الفوائد

سیدنا انس رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” میں جنت کا دروازہ کھٹکھٹاؤں گا ، وہ میرے لئے کھول دیا جائے گا ، وہ سونے سے بنا ہوا دروازہ ہو گا ، جس کی کنڈی چاندی کی بنی ہوئی ہو گی ، میرے سامنے سب سے بڑا نور آئے گا تو میں سجدے میں چلا جاؤں گا ، اس وقت اللہ تعالیٰ کی ثناء کے بارے میں ایسے کلمات مجھے القاء کئے جائیں گے جو مجھ سے پہلے کسی کو القاء نہیں کیے گئے ، پھر مجھ سے کہا: جائے گا : تم اپنا سر اٹھاؤ ، تم مانگو ، وہ دیا جائے گا ، تم کہو ، سنا جائے گا ، تم شفاعت کرو ، شفاعت قبول کی جائے گی ، تو میں یہ کہوں گا : میری امت ، تو یہ کہا: جائے گا : تمہیں وہ ملتا ہے جس کے دل میں ، جو کے دانے کے وزن جتنا ایمان ہو ۔ نبی اکرم صلی اللہ علیہ وسلم نے ارشاد فرمایا : پھر میں دوسری مرتبہ سجدے میں جاؤں گا ، نبی اکرم صلی اللہ علیہ وسلم نے فرمایا : پھر مجھے اس کی مانند کلمات القاء کیے جائیں گے ، پھر مجھ سے اس کی مانند بات کہی جائے گی اور میں یہ کہوں گا : میری امت ، مجھ سے کہا: جائے گا : تمہیں وہ ملتا ہے جس کے دل میں رائی کے دانے کے وزن جتنا ایمان ہو ، پھر میں تیسری مرتبہ سجدے میں جاؤں گا ، پھر مجھ سے اس کی مانند بات کہی جائے گی ، پھر میں اپنا سر اٹھاؤں گا اور یہ کہوں گا : میری امت ، تو مجھ سے کہا: جائے گا : تمہیں ہر وہ فرد ملتا ہے جس نے اخلاص کے ساتھ لا الہ الا اللہ پڑھا ہو ۔ “ ( علامہ ہیثمی فرماتے ہیں : ) میں یہ کہتا ہوں : سیدنا انس رضی اللہ عنہ کے حوالے سے ” صحیح “ میں اور دوسری کتابوں میں کچھ احادیث مذکور ہیں جو اس روایت کے علاوہ ہیں ۔
یہ روایت امام ابویعلیٰ نے نقل کی ہے اس کی سند میں ایک راوی یزید رقاشی ہے اور وہ ضعیف ہے ۔

سیدنا انس رضی اللہ عنہ بیان کرتے ہیں : اللہ کے نبی صلی اللہ علیہ وسلم نے مجھے یہ بات بتائی ہے : ” میں کھڑا ہوا اپنی امت کا انتظار کروں گا ، جو پل صراط عبور کر رہی ہو گی ، اسی دوران سیدنا عیسیٰ علیہ السلام آئیں گے ، نبی اکرم صلی اللہ علیہ وسلم نے فرمایا : وہ یہ کہیں گے : یہ انبیاء آپ کے پاس آئے ہیں ، اے سیدنا محمد ( صلی اللہ علیہ وسلم ) ! اور وہ یہ سوال کرتے ہیں ۔ ( راوی کو شک ہے ، یا شاید یہ الفاظ ہیں : ) وہ آپ کے پاس اکٹھے ہوئے ہیں ، وہ اللہ تعالیٰ سے یہ دعا کر رہے ہیں کہ وہ اُمتوں کے اجتماع کو الگ الگ کر دے ، جہاں وہ چاہے کہ لوگ اس وقت شدید پریشانی کا شکار ہیں ، لوگ اس وقت پسینے میں ڈوبے ہوئے ہوں گے ، جہاں تک مومن کا تعلق ہے تو وہ اس کے لیے یوں ہو گا جیسے زکام ہوتا ہے اور جہاں تک کافر کا تعلق ہے تو موت نے اسے ڈھانپ لیا ہو گا ۔ نبی اکرم صلی اللہ علیہ وسلم نے فرمایا : سیدنا عیسیٰ علیہ السلام کہیں گے : آپ انتظار کریں ، جب تک میں آپ کے پاس واپس نہیں آتا ۔ راوی بیان کرتے ہیں : اللہ کے نبی صلی اللہ علیہ وسلم جائیں گے اور عرش کے نیچے کھڑے ہو جائیں گے اور اس وقت انہیں اس صورتحال کا سامنا ہو گا ، جس کا سامنا کسی منتخب فرشتے یا کسی مرسل نبی نے نہیں کیا ، پھر اللہ تعالیٰ سیدنا جبرائیل علیہ السلام کی طرف وحی کرے گا : کہ تم سیدنا محمد ( صلی اللہ علیہ وسلم ) کے پاس جاؤ اور ان سے یہ کہو : کہ تم اپنا سر اٹھاؤ ، تم سوال کرو ، تمھیں دیا جائے گا ، تم شفاعت کرو ، تمھاری شفاعت قبول ہو گی ۔ نبی اکرم صلی اللہ علیہ وسلم نے فرمایا : تو مجھے شفاعت میں یہ اختیار دیا جائے گا کہ میں ان میں سے ہر ننانوے میں سے ایک انسان کو نکال لوں ۔ نبی اکرم صلی اللہ علیہ وسلم نے فرمایا : میں مسلسل اپنے پروردگار کے پاس آتا جاتا رہوں گا ، میں جب بھی اس کی بارگاہ میں کھڑا ہوؤں گا میری شفاعت قبول ہو گی ، یہاں تک کہ اللہ تعالیٰ مجھے اس میں سے یہ چیز عطا کرے گا کہ وہ فرمائے گا : اے محمد ( صلی اللہ علیہ وسلم ) اللہ کی مخلوق میں سے اپنی امت میں سے ، ہر اس شخص کو داخل کروا دو جو اس بات کی گواہی دیتا ہو کہ اللہ تعالیٰ کے علاوہ اور کوئی معبود نہیں ہے ، جس نے اخلاص کے ساتھ ایک دن یہ گواہی دی ہو اور وہ اس حالت میں مر گیا ہو ۔ “
یہ روایت امام أحمد نے نقل کی ہے اور اس کے رجال صحیح کے رجال ہیں ۔

سیدنا ابوبکر صدیق رضی اللہ عنہ بیان کرتے ہیں : نبی اکرم صلی اللہ علیہ وسلم نے صبح کی نماز پڑھائی ، پھر آپ تشریف فرما ہوئے ، یہاں تک کہ چاشت کا وقت ہو گیا تو نبی اکرم صلی اللہ علیہ وسلم مسکرا دیئے پھر آپ اپنی جگہ پر رہے ، یہاں تک کہ آپ نے ظہر ، عصر اور مغرب کی نماز پڑھائی ، اس دوران آپ نے کوئی گفتگو نہیں کی ، یہاں تک کہ آپ نے عشاء کی نماز پڑھا دی ، پھر آپ اُٹھ کر اپنے گھر تشریف لے گئے ، لوگوں نے سیدنا ابوبکر رضی اللہ عنہ سے کہا: کیا آپ نبی اکرم صلی اللہ علیہ وسلم سے یہ سوال نہیں کریں گے کہ آپ کا کیا معاملہ ہے ؟ نبی اکرم صلی اللہ علیہ وسلم نے آج جو طرز عمل اختیار کیا ہے وہ آپ نے پہلے کبھی نہیں کیا ، سیدنا ابوبکر صلی اللہ علیہ وسلم نے نبی اکرم صلی اللہ علیہ وسلم سے اس بارے میں دریافت کیا تو نبی اکرم صلی اللہ علیہ وسلم نے ارشاد فرمایا : جی ہاں ! دنیا کے معاملے سے متعلق اور آخرت کے معاملے سے متعلق جو کچھ بھی ہو گا ، وہ میرے سامنے پیش کیا گیا ، سب پہلے والے اور بعد والے لوگوں کو ایک میدان میں اکٹھا کیا جائے گا ، لوگ اس صورتحال سے پریشان ہو جائیں گے ، یہاں تک کہ وہ سیدنا آدم علیہ السلام کے پاس جائیں گے ، پسینہ اتنا زیادہ ہو گا کہ انہیں لگام ڈال رہا ہو گا ، وہ کہیں گے : اے سیدنا آدم ( علیہ السلام ) ! آپ ابوالبشر ہیں ، اللہ تعالیٰ نے آپ کو منتخب کیا آپ اپنے پروردگار کی بارگاہ میں ہماری شفاعت کیجئے ، تو سیدنا آدم علیہ السلام کہیں گے : مجھے بھی اسی صورتحال کا سامنا ہے جس کا سامنا تم لوگ کر رہے ہو ، تم اپنے دوسرے جدامجد سیدنا نوح علیہ السلام کے پاس جاؤ ! ” بے شک اللہ تعالیٰ نے آدم ، نوح اور ابراہیم کی آل اور عمران کی آل کو تمام جہانوں میں سے منتخب کیا ۔ “ نبی اکرم صلی اللہ علیہ وسلم نے فرمایا : لوگ سیدنا نوح علیہ السلام کے پاس جائیں گے اور یہ کہیں گے : آپ اپنے پروردگار کی بارگاہ میں ہماری شفاعت کیجئے ، کیونکہ اللہ تعالیٰ نے آپ کو منتخب کیا اس نے آپ کی دعا کو مستجاب کیا اور اس نے روئے زمین پر کافروں کو بستا ہوا نہیں رہنے دیا ، تو سیدنا نوح علیہ السلام کہیں گے : میں یہ نہیں کر سکتا ، تم لوگ سیدنا ابراہیم علیہ السلام کے پاس جاؤ کیونکہ اللہ تعالی نے انہیں خلیل بنایا ہے ، لوگ سیدنا ابراہیم علیہ السلام کے پاس جائیں گے تو وہ یہ کہیں گے : میں یہ نہیں کر سکتا ، تم لوگ سیدنا موسیٰ علیہ السلام کے پاس جاؤ ! کیونکہ اللہ تعالیٰ نے ان کے ساتھ کلام کیا ہے ، سیدنا موسیٰ علیہ السلام کہیں گے : میں یہ نہیں کر سکتا ، تم لوگ سیدنا عیسیٰ بن مریم علیہ السلام کے پاس جاؤ ! کیونکہ وہ پیدائشی اندھے ، برص ( یعنی پھلبہری ) کے مریض کو ٹھیک کر دیتے تھے اور مردے کو زندہ کر دیتے تھے ، سیدنا عیسیٰ علیہ السلام کہیں گے : میں یہ نہیں کر سکتا ، تم اولاد آدم کے سردار کے پاس جاؤ ! کیونکہ وہ پہلے فرد ہیں ، جن کے لیے قیامت کے دن زمین کو شق کیا گیا ، تم لوگ سیدنا محمد صلی اللہ علیہ وسلم کے پاس جاؤ ! وہ تمہارے پروردگار کی بارگاہ میں تمہاری شفاعت کریں گے ۔ نبی اکرم صلی اللہ علیہ وسلم نے فرمایا : وہ لوگ جائیں گے ، سیدنا جبرائیل علیہ السلام اپنے پروردگار کے پاس آئیں گے ۔ نبی اکرم صلی اللہ علیہ وسلم نے فرمایا : پروردگار یہ فرمائے گا : اُسے اجازت دو ! اور اُسے جنت کی خوشخبری دو ! ۔ ( شاید یہاں عربی عبارت میں کوئی کمی ہے ) ۔ نبی اکرم صلی اللہ علیہ وسلم نے فرمایا : پھر نبی اکرم صلی اللہ علیہ وسلم جائیں گے وہ سجدے میں چلے جائیں گے جو ایک ہفتے تک ہو گا ، پروردگار فرمائے گا : تم اپنا سر اٹھاؤ ! تم کہو تمہیں سنا جائے گا ، تم شفاعت کرو تمھاری شفاعت قبول ہو گی ۔ نبی اکرم صلی اللہ علیہ وسلم نے فرمایا : آپ صلی اللہ علیہ وسلم اپنا سر اٹھائیں گے ، جب آپ اپنے پروردگار کی طرف دیکھیں گے تو پھر سجدے میں چلے جائیں گے جو مزید ایک ہفتے کے لیے ہو گا ، تو پروردگار فرمائے گا : تم اپنا سر اٹھاؤ ، تم کہو تمہیں سنا جائے گا ، تم شفاعت کرو ، تمھاری شفاعت قبول ہو گی ۔ نبی اکرم صلی اللہ علیہ وسلم نے فرمایا : آپ پھر سجدے میں جانے لگیں گئے تو سیدنا جبرائیل علیہ السلام بازوؤں سے آپ کو پکڑ لیں گے ، اس وقت اللہ تعالیٰ دعا کے ایسے کلمات آپ کے لئے کشادہ کرے گا کہ وہ کلمات اس نے کسی بشر کے لئے کبھی نہیں کشادہ نہیں کیے ہوں گے ، نبی اکرم صلی اللہ علیہ وسلم کہیں گے : اے میرے پروردگار ! تو نے مجھے اولاد آدم کا سردار بنایا ہے اور یہ بات میں فخر کے طور پر نہیں کہہ رہا ، اور مجھے وہ پہلا فرد بنایا ہے جس کے لیے قیامت کے دن زمین کو شق کیا گیا ، اور یہ بات فخر کے طور پر نہیں کہہ رہا ۔ ( نبی اکرم صلی اللہ علیہ وسلم نے فرمایا : ) یہاں تک کہ اس حوض پر میرے پاس لوگ آئیں گے ، جو اس سے زیادہ بڑا ہے ، جتنا صنعاء اور ایلہ کے درمیان فاصلہ ہے ، پھر یہ کہا: جائے گا : صدیقین کو بلاؤ ، وہ شفاعت کریں گے ، پھر یہ کہا: جائے گا : انبیاء کو بلاؤ ! نبی اکرم صلی اللہ علیہ وسلم نے فرمایا : پھر ایک نبی آئے گا ، اس کے ساتھ کچھ لوگ ہوں گے ، کوئی نبی آئے گا اس کے ساتھ پانچ یا چھ افراد ہوں گے ، کوئی نبی آئے گا ، جس کے ساتھ کوئی نہیں ہو گا ، پھر یہ کہا: جائے گا : شہداء کو بلاؤ ! تو وہ جس کے بارے میں چاہیں گے اس کی شفاعت کریں گے ۔ نبی اکرم صلی اللہ علیہ وسلم نے فرمایا : جب شہداء ایسا کر لیں گے تو اللہ تعالیٰ فرمائے گا : میں سب سے زیادہ رحم کرنے والا ہوں ، تم میری جنت میں ہر اُس شخص کو داخل کر دو جو کسی کو میرا شریک قرار نہ دیتا ہو ۔ نبی اکرم صلی اللہ علیہ وسلم نے فرمایا : پھر لوگ جنت میں داخل ہو جائیں گے تو اللہ تعالیٰ فرمائے گا : تم جہنم کا جائزہ لو ! کیا تمہیں کوئی ایسا شخص ملتا ہے جس نے کبھی کوئی بھلائی کی ہو ؟ نبی اکرم صلی اللہ علیہ وسلم نے فرمایا : پھر وہ ( یعنی فرشتے ) جہنم میں ایک شخص کو پائیں گے ، وہ دریافت کریں گے : کیا تم نے کبھی کوئی بھلائی کی ہے ؟ وہ جواب دے گا : جی نہیں ! البتہ میں خرید و فروخت کرتے ہوئے لوگوں کے ساتھ نرمی کا رویہ اختیار کرتا تھا ، اللہ تعالٰی فرمائے گا : میرے بندے کے ساتھ نرمی کرو ! جس طرح یہ میرے بندوں کے ساتھ نرمی کیا کرتا تھا ۔ پھر وہ جہنم سے ایک شخص کو باہر نکالیں گے اور اس سے دریافت کریں گے : کیا تم نے بھی کوئی بھلائی کی ہے ؟ وہ جواب دے گا : جی نہیں ! البتہ یہ ہے کہ میں نے اپنی اولاد کو یہ حکم دیا تھا کہ جب میں مر جاؤں ، تو تم مجھے آگ کے ذریعے جلا دینا ، پھر تم مجھے پیس دینا یہاں تک کہ جب میں سرمے کی طرح ( راکھ ) ہو جاؤں تو تم مجھے سمندر میں لے جانا اور مجھے ہوا میں اُڑا دینا ، اللہ کی قسم ! تمام جہانوں کا پروردگار مجھے کبھی مشقت کا شکار نہیں کرے گا ، تو اللہ تعالیٰ فرمائے گا : تم نے ایسا کیوں کیا ؟ وہ جواب دے گا : تیرے خوف کی وجہ سے ۔ نبی اکرم صلی اللہ علیہ وسلم نے فرمایا : اللہ تعالیٰ فرمائے گا : تم اس کا جائزہ لو ، جو سب سے بڑی مملکت ہے ، تمہیں اس کی مانند اور اس جیسا دس گنا مزید ملتا ہے ۔ نبی اکرم صلی اللہ علیہ وسلم نے فرمایا : وہ شخص کہے گا : تو میرا مذاق کیوں اڑا رہا ہے ؟ جبکہ تو بادشاہ ہے ۔ نبی اکرم صلی اللہ علیہ وسلم نے ارشاد فرمایا : اس بات پر میں چاشت کے وقت ہنسا تھا ۔
یہ روایت امام أحمد نے نقل کی ہے امام ابویعلیٰ نے اس کی مانند نقل کی ہے اور امام بزار نے نقل کی ہے اور ان کے رجال ثقہ ہیں ۔

سیدنا ابوایوب رضی اللہ عنہ بیان کرتے ہیں : ایک دن نبی اکرم صلی اللہ علیہ وسلم ان لوگوں کے پاس تشریف لائے ، آپ نے ان سے فرمایا : ” میرے پروردگار نے مجھے یہ اختیار دیا کہ ( یعنی میری امت کے ) ستر ہزار لوگ جنت میں داخل ہو جائیں ، جو معافی کے طور پر کسی حساب کے بغیر ہوں ، یا یہ ہو کہ پروردگار کے پاس میں اپنی امت کے لئے ( یعنی شفاعت ) کو سنبھال کے رکھ لوں ، نبی اکرم صلی اللہ علیہ وسلم کے بعض اصحاب نے آپ کی خدمت میں عرض کی : یا رسول اللہ ! کیا آپ کا پروردگار اسے سنبھال کے رکھے گا ؟ نبی اکرم صلی اللہ علیہ وسلم گھر تشریف لے گئے پھر آپ تشریف لائے تو آپ تکبیر کہہ رہے تھے ، آپ نے ارشاد فرمایا : ” میرے پروردگار نے مجھے مزید یہ چیز عطا کی ہے کہ ہر ایک ہزار کے ہمراہ ستر ہزار مزید ہوں گے اور اس کے پاس سنبھال کے رکھوائی گئی چیز ( یعنی شفاعت ) بھی ہے ۔ ابورہم نے کہا: اے سیدنا ابوایوب ! نبی اکرم صلی اللہ علیہ وسلم کی سنبھال کے رکھوائی گئی چیز کے بارے میں آپ کا کیا خیال ہے ؟ لوگ اس کو اپنے منہ کے ذریعے کھا رہے ہیں ( شاید یہ مراد ہے کہ لوگ اس کے بارے میں طرح طرح کی باتیں کر رہے ہیں ) لوگ یہ کہہ رہے ہیں : تمہارا اللہ کے رسول کی سنبھال کے رکھی گئی چیز کے ساتھ کیا واسطہ ؟ تو سیدنا ابوایوب انصاری رضی اللہ عنہ نے فرمایا : تم اُسے رہنے دو ! میں تمہیں اللہ کے رسول صلی اللہ علیہ وسلم کی سنبھال کے رکھی گئی چیز کے بارے میں بتاتا ہوں ، جیسا کہ میرا گمان ہے ، بلکہ جیسا کہ یقین ہے ، نبی اکرم صلی اللہ علیہ وسلم کی سنبھال کے رکھی گئی چیز یہ ہے کہ آپ یہ کہیں گے : اے میرے پروردگار ! جو شخص اس بات کی گواہی دیتا ہو کہ اللہ تعالیٰ کے علاوہ اور کوئی معبود نہیں ہے ، صرف وہی ایک معبود ہے ، اس کا کوئی شریک نہیں ہے اور سیدنا محمد صلی اللہ علیہ وسلم اس کے بندے اور اس کے رسول ہیں ، اس کی زبان اس کے دل کی تصدیق کرتی ہے ، تو اُسے جنت میں داخل کر دے ۔ “
یہ روایت امام أحمد ، امام طبرانی نے نقل کی ہے ، اس کی سند میں ایک راوی عبداللہ بن ناشر ہے جس کا تعلق بنو سریع سے ہے اور میں اس سے واقف نہیں ہوں ، اور ایک راوی ابن لہیعہ ہے جس کو جمہور نے ضعیف قرار دیا ہے ۔

سیدنا جابر بن عبدالله رضی اللہ عنہما بیان کرتے ہیں : نبی اکرم صلی اللہ علیہ وسلم کی آل کی ایک خادمہ تھی جو آپ کی خدمت کیا کرتی تھی ، اُس کا نام ” برہ “ تھا ، ایک شخص اس خاتون سے ملا اور بولا: اے برہ ! تم اپنی لٹوں کو ڈھانپ کے رکھو ! کیونکہ اللہ تعالیٰ کے مقابلے میں ، سیدنا محمد صلی اللہ علیہ وسلم تمہارے کسی کام نہیں آئیں گے ، اُس خادمہ نے نبی اکرم صلی اللہ علیہ وسلم کو یہ بات بتائی ، نبی اکرم صلی اللہ علیہ وسلم اپنی چادر کو کھینچتے ہوئے تشریف لائے ، آپ کی کنپٹیاں سرخ ہو رہی تھیں ، راوی بیان کرتے ہیں : ہمیں انصار کو نبی اکرم صلی اللہ علیہ وسلم کے غصے کا اس بات سے پتہ چل گیا کہ آپ چادر گھسیٹتے ہوئے آ رہے ہیں ، اور آپ کی کنپٹیاں سرخ ہیں ، ہم نے ہتھیا لئے اور آپ کی خدمت میں حاضر ہوئے ، ہم نے عرض کی : یا رسول اللہ ! آپ جو چاہیں ، ہمیں حکم دیں ، اس ذات کی قسم ! جس نے آپ کو حق کے ہمراہ مبعوث کیا ہے ، اگر آپ ہمیں ہماری ماؤں ، ہمارے باپوں ، ہماری اولاد کے بارے میں حکم دیں گے ، تو ہم ان کے بارے میں بھی آپ کے فرمان پر عمل کریں گے ، نبی اکرم صلی اللہ علیہ وسلم منبر پر چڑھے آپ نے اللہ تعالیٰ کی حمد و ثناء بیان کی اور پھر ارشاد فرمایا : میں کون ہوں ؟ ہم نے عرض کی : آپ اللہ کے رسول صلی اللہ علیہ وسلم ہیں ، نبی اکرم صلی اللہ علیہ وسلم نے فرمایا : ٹھیک ہے ، لیکن میں کون ہوں ؟ ہم نے عرض کی : آپ سیدنا محمد ( صلی اللہ علیہ وسلم ) بن عبدالله بن عبدالمطلب بن ہاشم بن عبدمناف ہیں ، نبی اکرم صلی اللہ علیہ وسلم نے فرمایا : ” میں اولاد آدم کا سردار ہوں ، اور یہ بات فخر کے طور پر نہیں کہہ رہا اور میں قیامت کے دن سب سے پہلے اپنے سر سے مٹی جھاڑوں گا ، اور یہ بات فخر کے طور پر نہیں کہہ رہا ، اور میں جنت میں داخل ہونے والا پہلا فرد ہوؤں گا ، اور یہ بات فخر کے طور پر نہیں کہہ رہا ، لوگوں کا کیا معاملہ ہے ؟ کہ وہ یہ گمان کرتے ہیں کہ میرے ساتھ رشتہ داری فائدہ نہیں دے گی ، ایسا نہیں ہے جیسا وہ لوگ گمان کرتے ہیں ، میں شفاعت کروں گا اور میری شفاعت قبول کی جائے گی ، یہاں تک کہ جس کی میں شفاعت کروں گا ، وہ شفاعت کرے گا تو اُس کی بھی شفاعت قبول کی جائے گی ، اور ( میری ) شفاعت کے حصول کے لئے ابلیس بھی اپنے آپ کو نمایاں کرنے کی کوشش کرے گا ۔ “
یہ روایت امام طبرانی نے معجم اوسط میں نقل کی ہے اور اس کے رجال کی توثیق کی گئی ہے اگرچہ عبید بن اسحاق عطار اور قاسم بن محمد بن عبداللہ بن محمد بن عقیل نامی راویوں میں بہت زیادہ ضعف پایا جاتا ہے ۔

سیدنا عقبہ بن عامر رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : جب اللہ تعالیٰ سب پہلے والوں ، سب بعد والوں کو جمع کرے گا اور ان کے درمیان فیصلہ کرے گا ، جب وہ ان کے درمیان فیصلہ کر کے فارغ ہو جائے گا تو مومنین یہ کہیں گے : ہمارے پروردگار نے ہمارے درمیان فیصلہ کر دیا ہے ، تو اب ہم یہ چاہتے ہیں کہ کوئی شخص ہمارے پروردگار کی بارگاہ میں ہماری شفاعت کرے ، تم لوگ ہمارے ساتھ سیدنا آدم علیہ السلام کی طرف چلو ! کیونکہ وہ ہمارے جدامجد ہیں ، اللہ تعالیٰ نے اپنے دست قدرت کے ذریعے انہیں پیدا کیا ہے اور ان کے ساتھ کلام کیا ہے ، وہ لوگ سیدنا آدم علیہ السلام کے پاس آئیں گے اور ان کے ساتھ یہ بات چیت کریں گے کہ سیدنا آدم علیہ السلام ان کی شفاعت کریں ، تو سیدنا آدم علیہ السلام یہ کہیں گے : تم پر لازم ہے کہ سیدنا نوح علیہ السلام کے پاس جاؤ ، وہ لوگ سیدنا نوح علیہ السلام کے پاس آئیں گے ، سیدنا نوح علیہ السلام ان کی رہنمائی سیدنا ابراہیم علیہ السلام کی طرف کریں گے ، وہ لوگ سیدنا ابراہیم علیہ السلام کے پاس آئیں گے ، سیدنا ابراہیم علیہ السلام اُن کی رہنمائی سیدنا موسیٰ علیہ السلام کی طرف کریں گے ، وہ لوگ سیدنا موسیٰ علیہ السلام کے پاس آئیں گے ، سیدنا موسیٰ علیہ السلام ان کی رہنمائی سیدنا عیسیٰ علیہ السلام کی طرف کریں گے ، پھر وہ لوگ سیدنا عیسیٰ علیہ السلام کے پاس آئیں گے تو وہ یہ کہیں گے : میں تمہاری رہنمائی ” امی نبی “ کی طرف کرتا ہوں ، تو وہ لوگ میرے پاس آئیں گے ، اللہ تعالیٰ مجھے اجازت دے گا کہ میں کھڑا ہو جاؤں ، تو میری محفل میں سب سے زیادہ پاکیزه ترین خوشبو پھیل جائے گی ، جو کسی بھی شخص نے سونگھی ہو ، یہاں تک کہ میں اپنے پروردگار کے پاس آ جاؤں گا ، وہ میری شفاعت قبول کرے گا ، وہ میرے لئے میرے سر کے بالوں سے لے کر میرے پاؤں کے ناخنوں تک نور بنائے گا ، پھر کافر یہ کہیں گے : مؤمن نے تو اس کو پا لیا ہے ، جو ان کی شفاعت کرے ، ہماری شفاعت کون کرے گا ؟ تو وہ کہیں گے : یہ کام صرف ابلیس کر سکتا ہے ، جس نے ہمیں گمراہ کیا تھا ، وہ لوگ اس کے پاس آئیں گے ، وہ کھڑا ہو گا ، تو اس کی محفل میں سب سے زیادہ بری بدبو پھیل جائے گی ، جو کسی شخص نے سونگھی ہو ، پھر وہ انہیں جہنم کے پاس لے جائے گا اس وقت وہ یہ کہے گا : جن کا ذکر قرآن میں ان الفاظ میں ہے : ” اور جب فیصلہ ہو جائے گا تو شیطان کہے گا : بے شک اللہ تعالیٰ نے تمہارے ساتھ سچا وعدہ کیا تھا اور میں نے تمہارے ساتھ وعدہ کیا اور میں نے تمہارے ساتھ اس کی خلاف ورزی کی ۔ “
یہ روایت امام طبرانی نے نقل کی ہے اس کی سند میں ایک راوی عبدالرحمن بن زیاد بن انعم ہے اور وہ ضعیف ہے ۔

سیدنا عبداللہ بن عمرو بن العاص رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اس قبلہ کے ماننے والوں میں سے اتنے لوگ جہنم میں داخل ہوں گے ، جن کی تعداد کو اللہ تعالی کے علاوہ اور کوئی شمار نہیں کر سکتا ، اس کی وجہ یہ ہو گی کہ اُن لوگوں نے اللہ تعالیٰ کی نافرمانی کی ہو گی اور اس کی معصیت کے بارے میں جرأت کا اظہار کیا ہو گا اور اس کی فرمانبرداری کے برخلاف کیا ہو گا ، پھر مجھے شفاعت کی اجازت دی جائے گی ، تو میں سجدے کی حالت میں اللہ تعالیٰ کی ثناء بیان کروں گا ، جس طرح میں نے قیام کی حالت میں اُس کی ثناء بیان کی تھی ، تو مجھ سے کہا: جائے گا : تم اپنا سر اٹھاؤ ، تم مانگو ، تمہیں دیا جائے گا ، تم شفاعت کرو ، تمھاری شفاعت قبول کی جائے گی ۔ “
یہ روایت امام طبرانی نے معجم کبیر اور معجم صغیر میں نقل کی ہے اور اس کی سند حسن ہے ۔

سیدنا عبادہ بن صامت رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” اُس ذات کی قسم ! جس کے دست قدرت میں میری جان ہے ، قیامت کے دن میں لوگوں کا سردار ہوؤں گا اور یہ بات کسی فخر یا ریاکاری کے بغیر کہہ رہا ہوں ، اور قیامت کے دن سب لوگ میرے جھنڈے کے نیچے ہوں گے ، اور کشادگی کے منتظر ہوں گے ، میرے پاس ” لواء الحمد “ ہو گا ، میں چلتا ہوا جاؤں گا ، لوگ میرے ساتھ چلتے ہوئے جائیں گے ، یہاں تک کہ میں جنت کے دروازے کے پاس آ جاؤں گا اور میں دروازہ کھولنے کے لیے کہوں گا ، تو دریافت کیا جائے گا : کون ہے ؟ میں جواب دوں گا : محمد ( صلی اللہ علیہ وسلم ) تو کہا: جائے گا : سیدنا محمد صلی اللہ علیہ وسلم کو خوش آمدید ! جب میں اپنے پروردگار کو دیکھوں گا ، تو میں اس کے سامنے سجدے میں گر جاؤں گا ، یہ اُس کے شکر کے طور پر ہو گا ، تو کہا: جائے گا : تم اپنا سر اٹھاؤ ! تم کہو ، تمہاری بات مانی جائے گی ، تم شفاعت کرو ، تمھاری شفاعت قبول ہو گی ( تو میری شفاعت کے نتیجے میں ) ہر وہ شخص جہنم سے نکل آئے گا ، جو اللہ تعالیٰ کی رحمت اور میری شفاعت پر یقین رکھتا ہو ۔ “
یہ روایت امام طبرانی نے نقل کی ہے ، اسحاق بن یحیی نامی راوی نے سیدنا عبادہ رضی اللہ عنہ کا زمانہ نہیں پایا ہے ، اس روایت کے بقیہ رجال ثقہ ہیں ۔

سیدنا کعب بن مالک رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” قیامت کے دن لوگوں کو دوبارہ زندہ کیا جائے گا ، تو میں اور میری اُمت قیامت کے دن ایک ٹیلے پر ہوں گے ، میرا پروردگار مجھے سبز حلہ پہنائے گا ، پھر وہ مجھے اجازت دے گا تو میں اُس کی شان کے مطابق اس کی ثناء بیان کروں گا ، یہ ” مقام “ محمود ہو گا ۔ “
یہ روایت امام طبرانی نے معجم کبیر اور معجم اوسط میں نقل کی ہے ، معجم کبیر کی دو اسناد میں سے ایک کے رجال صحیح کے رجال ہیں ۔

سیدنا حذیفہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” قیامت کے دن میں سب لوگوں کا سردار ہوؤں گا ، میرا پروردگار مجھے بلائے گا ، میں کہوں گا : میں حاضر ہوں ، سعادت تیری طرف سے حاصل ہوتی ہے ، بھلائی تیرے ہاتھوں میں ہے ، تو برکت والا ہے ، تو بلند و برتر ہے ، میں تیری مہربانی میں حاضر ہوں ، وہ ہدایت یافتہ ہے ، جسے تو نے ہدایت عطا کی ہو ، تیرا بندہ تیرے سامنے ہے ، تیرے مقابلے میں پناہ گاہ اور جائے نجات صرف تیری ذات ہے ، تو برکت والا ہے اور بلند و برتر ہے ۔ “
یہ روایت امام طبرانی نے معجم اوسط میں نقل کی ہے اس کی سند میں ایک راوی لیث بن ابوسلیم ہے اور وہ مدلس ہے ، اس روایت کے بقیہ رجال ثقہ ہیں ۔

سیدنا حذیفہ رضی اللہ عنہ بیان کرتے ہیں : اللہ تعالیٰ سب لوگوں کو ایک میدان میں اکٹھا کرے گا ، کوئی شخص کلام نہیں کر سکے گا ، سب سے پہلے سیدنا محمد صلی اللہ علیہ وسلم کلام کریں گے اور وہ یہ کہیں گے : ” میں حاضر ہوں ، سعادت مندی تیری طرف سے حاصل ہوتی ہے ، بھلائی تیرے دست قدرت میں ہے ، برائی تیری طرف نہیں جا سکتی ، ہدایت یافتہ وہ ہے جسے تو نے ہدایت عطا کی ہو ، تیرا بندہ تیرے سامنے ہے ، تیری مدد سے ہے ، تیری طرف لوٹنے والا ہے ، تیرے مقابلے میں کوئی پناہ گاہ اور جائے نجات نہیں ہے ، صرف تیری ہی ذات ہے ، تو برکت والا ہے اور بلند و برتر ہے ، تو ہر عیب سے پاک ہے ، گھر ( یعنی خانہ کعبہ ) کے پروردگار ! “ ۔ ( راوی بیان کرتے ہیں : اللہ تعالیٰ کے اس فرمان سے یہی مراد ہے : ” عنقریب تمہارا پروردگار تمہیں مقام محمود پر فائز کرے گا ۔ “
یہ روایت امام بزار نے موقوف روایت کے طور پر نقل کی ہے اور اس کے رجال صحیح کے رجال ہیں ۔

سیدنا علی بن ابوطالب رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” میں اپنی امت کی شفاعت کروں گا ، یہاں تک کہ میرا پروردگار مجھے مخاطب کر کے فرمائے گا : اے محمد ! تم راضی ہو گئے ؟ میں عرض کروں گا : اے میرے پروردگار ! تحقیق میں راضی ہو گیا ۔ “
یہ روایت امام بزار نے امام طبرانی نے معجم اوسط میں نقل کی ہے ، اس کی سند میں ایک راوی محمد بن أحمد بن زید مداری ہے اور میں اُس سے واقف نہیں ہوں ، اس روایت کے بقیہ رجال کی توثیق کی گئی ہے ، اگرچہ اُن میں سے بعض میں ضعف پایا جاتا ہے ۔

سیدنا عبداللہ رضی اللہ عنہ بیان کرتے ہیں : ایک مرتبہ ہم نبی اکرم صلی اللہ علیہ وسلم کے گھر کے صحن میں ( شاید یہ مراد ہے آپ کے گھر کے باہر ) موجود تھے ، اسی دوران آپ ہمارے پاس تشریف لائے ، آپ کا چہرہ مبارک چمک رہا تھا اور جگمگا رہا تھا ، آپ کے چہرے کو دیکھ کر ہم نے عرض کی : یا رسول اللہ ! اللہ تعالیٰ آپ کو خوش رکھے ، آپ کے چہرے کی چمک اور خوشی دیکھ کر ہمیں بھی خوشی ہوئی ہے ، نبی اکرم صلی اللہ علیہ وسلم نے ارشاد فرمایا : ابھی جبرائیل میرے پاس آئے اور انہوں نے مجھے یہ خوشخبری دی کہ اللہ تعالیٰ نے مجھے شفاعت عطا کی ہے ، ہم نے عرض کی : یا رسول اللہ ! کیا یہ بنو ہاشم کے بارے میں مخصوص ہے ؟ نبی اکرم صلی اللہ علیہ وسلم نے ارشاد فرمایا : جی نہیں ! ہم نے دریافت کیا : کیا یہ قریش کے بارے میں مخصوص ہے ؟ نبی اکرم صلی اللہ علیہ وسلم نے ارشاد فرمایا : جی نہیں ! ہم نے دریافت کیا : کیا آپ کی امت کے بارے میں ہے ؟ نبی اکرم صلی اللہ علیہ وسلم نے فرمایا : یہ میری امت کے گناہ گار بوجھل لوگوں کے لئے ہے ۔
یہ روایت امام طبرانی نے معجم کبیر اور معجم اوسط میں نقل کی ہے اس کی سند میں ایک راوی عبدالواحد نصری ہے جو بعد کے زمانے کا ہے ، اس نے اوزاعی سے روایات نقل کی ہیں اور میں اس سے واقف نہیں ہوں ، اس روایت کے بقیہ رجال ثقہ ہیں ۔

سیدنا ابوامامہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” اپنی امت کے برے لوگوں کے لئے سب سے بہتر ” میں “ ہوں ۔ “ آپ کے ساتھ بیٹھے ہوئے لوگوں میں سے ایک صاحب نے آپ کی خدمت میں عرض کی : یا رسول اللہ ! ان کے بہتر لوگوں کے لیے آپ کیسے ہوں گے ؟ نبی اکرم صلی اللہ علیہ وسلم نے ارشاد فرمایا : جہاں تک میری امت کے برے لوگوں کا تعلق ہے ، تو اللہ تعالیٰ میری شفاعت کی وجہ سے انہیں جنت میں داخل کرے گا ، جہاں تک نیک لوگوں کا تعلق ہے ، تو اللہ تعالیٰ ان کے اعمال کی وجہ سے انہیں جنت میں داخل کر دے گا ۔ “
یہ روایت امام طبرانی نے معجم کبیر میں نقل کی ہے اس کی سند میں ایک راوی جمیع بن ثوب رحبی ہے اس میں جیم پر زبر ہے اور میم پر پیش ہے ، مشہور قول یہی ہے ، ایک قول کے مطابق یہ لفظ اسم تصغیر کے طور پر ہے ، امام بخاری رحمہ اللہ نے اس راوی کے بارے میں یہ کہا: ہے : یہ منکر الحدیث ہے ، امام نسائی رحمہ اللہ نے کہا: ہے : یہ متروک الحدیث ہے ، ابن عدی کہتے ہیں : اس کی روایات اس بات پر دلالت کرتی ہیں کہ یہ ضعیف ہے ، اس روایت کے بقیہ رجال صحیح کے رجال ہیں ۔

سیدنا عبداللہ بن عباس رضی اللہ عنہما بیان کرتے ہیں : ایک دن نبی اکرم صلی اللہ علیہ وسلم نے ارشاد فرمایا : ” میری شفاعت میری اُمت کے کبیرہ گناہ کرنے والوں کے لئے ہو گی ۔ “ سیدنا عبداللہ بن عباس رضی اللہ عنہما نے فرمایا : ” بھلائی کی طرف سبقت لے جانے والے لوگ کسی حساب کے بغیر جنت میں داخل ہوں گے ، میانہ روی اختیار کرنے والے لوگ اللہ تعالیٰ کی رحمت کی وجہ سے جنت میں داخل ہوں گے اور اپنے اوپر ظلم کرنے والے لوگ اور اعراف میں رہنے والے لوگ ، سیدنا محمد صلی اللہ علیہ وسلم کی شفاعت کی وجہ سے جنت میں داخل ہوں گے ۔ “
یہ روایت امام طبرانی نے معجم کبیر میں نقل کی ہے اور معجم اوسط میں اختصار کے ساتھ اس صحابی کے حوالے سے نقل کی ہے ، اس کی سند میں ایک راوی موسیٰ بن عبدالرحمن سنانی ہے اور وہ حدیث ایجاد کرنے والا شخص ہے ۔

سیدنا عبداللہ بن عمر رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” مجھے شفاعت اور اس بات کے درمیان اختیار دیا گیا کہ میری امت کا نصف ( حصہ ) جنت میں داخل ہو جائے ، تو میں نے شفاعت کو اختیار کیا ، کیونکہ وہ زیادہ عمومی اور زیادہ کفایت کرنے والی ہے ، کیا تم اس کے بارے میں یہ سمجھتے ہو ؟ کہ وہ صاف ستھرے ( یعنی پرہیزگار ) لوگوں کے لیے ہو گی ؟ جی نہیں ! بلکہ وہ یعنی گناہوں میں ملوث ہونے والے خطاکاروں کے لیے ہو گی ۔ “ زیاد کہتے ہیں : اگرچہ ہم ایسے ہیں لیکن جس نے ہمیں یہ حدیث بیان کی ہے اس نے ہمیں یہ حدیث اسی طرح بیان کی ہے ۔
یہ روایت امام أحمد اور امام طبرانی نے نقل کی ہے تاہم انہوں نے یہ الفاظ نقل کئے ہیں : ” پرہیزگار مومنین کے لئے نہیں ہو گی بلکہ یہ گناہ گاروں خطاکاروں اور ( برائیوں میں ) ملوث ہونے والے لوگوں کے لیے ہو گی ۔ “ طبرانی کے رجال صحیح کے رجال ہیں ، صرف نعمان بن قراد کا معاملہ مختلف ہے اور وہ ثقہ ہے ۔

سیدنا انس رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : میری شفاعت میری امت کے کبیرہ گناہ کرنے والوں کے لئے ہو گی ۔ “
یہ روایت امام بزار نے اور امام طبرانی نے معجم صغیر اور معجم اوسط میں نقل کی ہے ۔

ان دونوں میں ایک روایت میں یہ الفاظ ہیں : ” شفاعت کو میری امت کے کبیرہ گناہ کرنے والوں کے لیے بنایا گیا ہے ۔ “ اس کی سند میں ایک راوی خزرج بن عثمان ہے جسے ابن حبان نے ثقہ قرار دیا ہے اور ایک سے زیادہ افراد نے اسے ضعیف کہا: ہے ، ہزار کے بقیہ رجال صحیح کے رجال ہیں ۔

سیدنا عبداللہ بن عمر رضی اللہ عنہما فرماتے ہیں : ” پہلے ہم کبیرہ گناہ کرنے والوں کے لیے دعائے مغفرت کرنے سے باز رہتے تھے ، یہاں تک کہ ہم نے اپنے نبی صلی اللہ علیہ وسلم کو یہ ارشاد فرماتے ہوئے سنا : ” میں نے اپنی شفاعت کو قیامت کے دن اپنی امت کے کبیرہ گناہ کرنے والوں ( کی شفاعت ) کے لیے سنبھال لیا ہے ۔ “ سیدنا عبداللہ بن عمر رضی اللہ عنہما کہتے ہیں : تو ہم اس چیز سے باز آ گئے جو ہم پہلے طرز عمل اختیار کرتے تھے اور ہم نے ان لوگوں کے بارے میں امید رکھنا شروع کی ۔
یہ روایت امام طبرانی نے معجم اوسط میں نقل کی ہے اس کی سند میں ایک راوی حرب بن سریج ہے جسے ایک سے زیادہ افراد نے ثقہ قرار دیا ہے اور اس میں ضعف پایا جاتا ہے اس روایت کے بقیہ رجال صحیح کے رجال ہیں ۔

سیدہ ام سلمہ رضی اللہ عنہا بیان کرتی ہیں : نبی اکرم صلی اللہ علیہ وسلم نے ارشاد فرمایا : ” تم عمل کرو ! اور تم تکیہ نہ کرو ! بے شک میری شفاعت میری امت کے ہلاکت کا شکار ہونے والے ( یعنی گناہ گار لوگوں ) کے لئے ہے ۔ “
یہ روایت امام طبرانی نے نقل کی ہے اس کی سند میں ایک راوی عمرو بن مخرم ہے اور وہ ضعیف ہے ۔

سیدنا بریده رضی اللہ عنہ بیان کرتے ہیں : میں سیدنا معاویہ رضی اللہ عنہ کے پاس آیا تو وہاں ایک شخص کلام کر رہا تھا ، سیدنا بریدہ رضی اللہ عنہ نے کہا: اے سیدنا معاویہ ! کیا آپ مجھے کلام کرنے کی اجازت دیں گے ؟ انہوں نے فرمایا : جی ہاں ! وہ یہ سمجھے کہ یہ بھی اسی طرح کلام کریں گے جس طرح دوسرا شخص کر رہا تھا ، سیدنا بریدہ رضی اللہ عنہ نے کہا: میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” مجھے یہ امید ہے کہ میں قیامت کے دن اتنی تعداد میں لوگوں کی شفاعت کروں گا جتنے زمین میں درخت اور پتھر ( یا ڈھیلے ہیں ) ۔ “ سیدنا بریدہ رضی اللہ عنہ نے کہا: اے معاویہ ! آپ کو اس ( شفاعت ) کی امید ہو گی ، تو کیا سیدنا علی رضی اللہ عنہ کو اس کی امید نہیں ہو گی ؟
یہ روایت امام أحمد نے نقل کی ہے اور اس کے رجال کی توثیق کی گئی ہے اگرچہ ابواسرائیل ملائی نامی راوی میں بہت زیادہ ضعف پایا جاتا ہے ۔

سیدنا بریده رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” کیا پتھر اور درخت بکثرت ہیں ؟ یہ بات آپ نے تین مرتبہ ارشاد فرمائی ، تو ہم نے عرض کی : جی ہاں ! نبی اکرم صلی اللہ علیہ وسلم نے ارشاد فرمایا : اس ذات کی قسم ! جس کے دست قدرت میں میری جان ہے ، میری شفاعت پتھروں اور درختوں سے زیادہ تعداد میں ( لوگوں کے لیے ) ہو گی ۔ “
یہ روایت امام طبرانی نے معجم اوسط میں نقل کی ہے اس کی سند میں ایک راوی سہل بن عبداللہ بن بریدہ ہے اور وہ ضعیف ہے ۔

سیدنا انیس انصاری رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” قیامت کے دن میں ہر اس چیز ( کی تعداد جتنے افراد ) کی شفاعت کروں گا جو چیز روئے زمین پر موجود ہے ، جس کا تعلق درختوں اور پتھروں سے ہے ۔ “
یہ روایت امام طبرانی نے معجم اوسط میں نقل کی ہے اس کی سند میں ایک راوی أحمد بن عمرو ہے جو علی بن مدینی کا شاگرد ہے اور قلوری کے نام سے معروف ہے میں اس سے واقف نہیں ہوں اس روایت کے بقیہ رجال کی توثیق کی گئی ہے اگرچہ ان میں سے بعض میں ضعف پایا جاتا ہے ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” میں جہنم کے دروازے کے پاس آؤں گا اور اس کے دروازے کو کھٹکھٹاؤں گا ، وہ میرے لئے کھول دیا جائے گا ، میں اُس میں داخل ہو جاؤں گا ، پھر میں اللہ تعالیٰ کی ایسی حمد بیان کروں گا کہ اللہ تعالیٰ کی اس طرح سے حمد ، مجھ سے پہلے کسی نے بیان نہیں کی ہو گی ، اور نہ ہی میرے بعد کوئی اس طرح حمد بیان کرے گا ، پھر میں وہاں سے ہر اس شخص کو نکالوں گا جس نے اخلاص کے ساتھ لا الہ الا اللہ پڑھا ہو گا ، پھر قریش کے کچھ لوگ میرے سامنے کھڑے ہوں گے ، وہ میرے سامنے اپنا نسب بیان کریں گے ، میں ان کے نسب کو پہچان لوں گا ، لیکن میں ان کے چہروں کو نہیں پہچانوں گا اور میں انہیں جہنم میں چھوڑ دوں گا ۔ “
یہ روایت امام طبرانی نے معجم اوسط میں نقل کی ہے انہوں نے اپنے استاد علی بن سعید رازی کے حوالے سے اس کو نقل کیا ہے جس میں کمزوری پائی جاتی ہے اور اس کی سند میں ایسے راوی ہیں ، جن سے میں واقف نہیں ہوں ۔

سیدنا جابر رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اہل جنت کچھ ایسے افراد کو غیر موجود پائیں گے جن سے وہ دنیا میں واقف تھے ، وہ انبیاء کے پاس آئیں گے اور ان لوگوں کا ذکر کریں گے اور ان لوگوں کے بارے میں شفاعت کریں گے تو اُن کی شفاعت قبول کی جائے گی اور ان لوگوں کو ” طلقاء “ کہا: جائے گا وہ سب ” طلقاء “ ہوں گے ، اُن پر آب حیات ڈالا جائے گا ۔ “
یہ روایت امام طبرانی نے معجم اوسط میں نقل کی ہے اور اس کی سند حسن ہے ۔

سیدنا عبداللہ بن مسعود رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جنت میں مسلمانوں کے کچھ لوگ داخل ہوں گے ، جنہیں جہنم میں عذاب دیا جا رہا ہو گا وہ اللہ تعالیٰ کی رحمت کی وجہ سے اور شفاعت کرنے والوں کی شفاعت کی وجہ سے ( جنت میں داخل ہوں گے ) ۔ “
یہ روایت امام طبرانی نے نقل کی ہے اور اس کی سند میں ایسے راوی ہیں ، جن سے میں واقف نہیں ہوں ۔

سیدنا مغیرہ بن شعبہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” کچھ لوگ جہنم سے نکلیں گے ، جنت میں ان کا نام ” جہنمی “ رکھا جائے گا ، وہ لوگ اللہ تعالیٰ سے یہ دعا کریں گے کہ ان کا یہ نام تبدیل کر دیا جائے ، تو اللہ تعالیٰ ان کا یہ نام محو کر دے گا ، جب وہ لوگ جہنم سے نکلیں گے تو وہ یوں اُگیں گے جس طرح پر اگتا ہے ۔ “
یہ روایت امام طبرانی نے معجم اوسط میں نقل کی ہے اس کی سند میں ایک راوی عبدالرحمن بن اسحاق ہے اور وہ ضعیف ۔

سیدنا جابر بن عبداللہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” میری امت کے کچھ لوگوں کو ان کے گناہوں کی وجہ سے عذاب دیا جائے گا جب تک اللہ کو منظور ہو گا ، وہ جہنم میں رہیں گے ، پھر مشرکین انہیں عار دلاتے ہوئے یہ کہیں گے : تم لوگوں نے جو تصدیق کی تھی اور جو تمہارا ایمان تھا ، ہمارا نہیں خیال کہ اس نے تمہیں کوئی فائدہ دیا ہے ؟ تو اس وقت ہر موحد کو اللہ تعالیٰ ( جہنم سے ) نکال دے گا ۔ “ پھر نبی اکرم صلی اللہ علیہ وسلم نے یہ آیت تلاوت کی : ” جن لوگوں نے کفر کیا وہ یہ آرزو کریں گے کہ کاش وہ مسلمان ہوتے ۔ “ ( علامہ ہیثمی فرماتے ہیں : ) میں یہ کہتا ہوں : سیدنا جابر رضی اللہ عنہ کی نقل کردہ احادیث ” صحیح “ میں مذکور ہیں ، لیکن وہ اس سیاق کے بغیر ہیں ۔
یہ روایت امام طبرانی نے معجم اوسط میں نقل کی ہے اور اس کے رجال صحیح کے رجال ہیں ، صرف بسام صیرفی کا معاملہ مختلف ہے اور وہ ثقہ ہے ۔

سیدنا انس بن مالک رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” لا الہ الا اللہ کے ماننے والوں میں سے کچھ لوگ جہنم میں اپنے گناہوں کی وجہ سے داخل ہوں گے ، تو لات اور عزیٰ کے ماننے والے اُن سے یہ کہیں گے : تمہارا لا الہ الا اللہ کہنا ، تمہارے کس کام آیا ؟ جبکہ تم بھی ہمارے ساتھ جہنم میں ہو ، اللہ تعالیٰ ان ( کافر ) لوگوں پر غضبناک ہو گا اور ان ( یعنی گناہ گار اہل ایمان ) کو ( جہنم سے ) نکال دے گا اور انہیں نہر حیات میں ڈالے گا ، تو وہ جلنے کے اثر کے حوالے سے یوں ٹھیک ہو جائیں گے جس طرح چاند کا گرہن ختم ہوتا ہے ، پھر وہ جنت میں داخل ہو جائیں گے ، تو اہل جنت انہیں ” جہنمی “ کا نام دیں گے ۔ “ ایک شخص نے کہا: اے سیدنا انس ! کیا آپ نے خود یہ ( حدیث ) نبی اکرم صلی اللہ علیہ وسلم کی زبانی سنی ہے ؟ سیدنا انس رضی اللہ عنہ نے فرمایا : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جو شخص جانتے بوجھتے ہوئے میری طرف جھوٹی بات منسوب کرے ، وہ جہنم میں اپنے مخصوص ٹھکانے تک پہنچنے کے لیے تیار رہے ۔ “ ( پھر سیدنا انس رضی اللہ عنہ نے فرمایا : ) میں نے نبی اکرم صلی اللہ علیہ وسلم کو یہ بات فرماتے ہوئے سنا ہے ( یعنی وہ حدیث جو اس سے پہلے بیان ہو چکی ہے ) ۔
یہ روایت امام طبرانی نے معجم اوسط میں نقل کی ہے اور اس کی سند میں ایسے راوی ہیں ، جن سے میں واقف نہیں ہوں ۔

سیدنا انس رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اللہ تعالیٰ فرمائے گا : اس کو جہنم سے نکال دو ! جس کے دل میں جو کے دانے کے وزن جتنا ایمان ہو ، پھر وہ فرمائے گا : اس کو جہنم سے نکال دو جس کے دل میں رائی کے دانے کے وزن جتنا ایمان ہو ، پھر وہ فرمائے گا : مجھے اپنی عزت اور اپنے جلال کی قسم ہے ، جس شخص نے دن یا رات کی گھڑی بھر کے لیے مجھ پر ایمان رکھا ہو ، میں اسے اس شخص کی مانند نہیں بناؤں گا ، جس نے مجھ پر ایمان نہیں رکھا ۔ “ ( علامہ ہیثمی فرماتے ہیں : ) میں یہ کہتا ہوں : ان صحابی کے حوالے سے ” صحیح “ میں شفاعت کے بارے میں ایک حدیث منقول ہے جو اس سے مختصر ہے ۔
یہ روایت امام طبرانی نے معجم صغیر میں نقل کی ہے اس کی سند میں ایک راوی طریف بن شہاب ہے اور وہ متروک ہے ۔

سیدنا عبداللہ بن مسعود رضی اللہ عنہ فرماتے ہیں : ” لوگوں کو شفاعت نصیب ہوتی رہے گی اور وہ جہنم سے نکلتے رہیں گے ، یہاں تک کہ ابلیس بھی اونچا ہو گا تاکہ اُسے بھی وہ ( یعنی شفاعت ) نصیب ہو جائے ۔ “
یہ روایت امام طبرانی نے ” موقوف “ روایت کے طور پر نقل کی ہے ، اس کی سند میں ایک راوی کثیر بن یحیی ہے جو بصری کا شاگرد ہے اور وہ ضعیف ہے ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” انبیاء کے لیے نور کے منبر رکھے جائیں گے ، جن پر وہ بیٹھیں گے ، صرف میرا منبر باقی رہے گا ، میں اس پر نہیں بیٹھوں گا ( یہاں ایک لفظ کے بارے میں راوی کو شک ہے ) میں اپنی امت کی خاطر اپنے پروردگار کے سامنے کھڑا رہوں گا ، اس اندیشے کے تحت کہ کہیں مجھے جنت میں نہ بھجوا دیا جائے اور میرے بعد میری امت باقی رہ جائے ، میں کہوں گا : اے میرے پروردگار ! میری امت ، میری امت ، تو اللہ تعالیٰ فرمائے گا : اے محمد ! تم کیا چاہتے ہو کہ میں تمہاری امت کے ساتھ کیا کروں ؟ میں عرض کروں گا : اے میرے پروردگار ! تو ان کے حساب میں عدل کر ! پھر ان کو بلایا جائے گا اور ان کا حساب لیا جائے گا ، ان میں سے کوئی اللہ تعالیٰ کی رحمت کی وجہ سے جنت میں داخل ہو گا ، ان میں سے کوئی میری شفاعت کی وجہ سے جنت میں داخل ہو گا ، میں مسلسل شفاعت کرتا رہوں گا ، مجھے ایسے لوگ دیے جاتے رہیں گے جنہیں جہنم کی طرف بھجوایا گیا تھا ، یہاں تک کہ جہنم کا داروغہ ” مالک “ یہ کہے گا : اے سیدنا محمد ( صلی اللہ علیہ وسلم ) ! آپ نے اپنی امت کے بارے میں اپنے پروردگار کے غضب کے لیے کوئی گنجائش نہیں رہنے دی ۔ “
یہ روایت امام طبرانی نے معجم کبیر اور معجم اوسط میں نقل کی ہے اس کی سند میں ایک راوی محمد بن ثابت بنانی ہے اور وہ ضعیف ہے ۔

سیدنا حذیفہ رضی اللہ عنہ مرفوع حدیث کے طور پر یہ بات نقل کرتے ہیں : نبی اکرم صلی اللہ علیہ وسلم نے ارشاد فرمایا : ” شفاعت کرنے والوں کی شفاعت کی وجہ سے اللہ تعالیٰ ایسے لوگوں کو ( یعنی جہنم سے ) نکالے گا جو بدبودار ہو چکے ہوں گے اور آگ نے انہیں راکھ کر دیا ہو گا ، وہ جنت میں داخل ہوں گے تو انہیں ” جہنمی “ کا نام دیا جائے گا ۔ “
یہ روایت امام أحمد نے دو حوالوں سے نقل کی ہے اور ان دونوں کے رجال صحیح کے رجال ہیں ۔ ( علامہ ہیثمی فرماتے ہیں : ) میں یہ کہتا ہوں : اللہ تعالیٰ کی رحمت سے متعلق باب میں اس نوعیت کی کچھ احادیث آگے آئیں گی ۔