مجمع الزوائد ومنبع الفوائد

سیدنا ابودرداء رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جب بھی سورج طلوع ہوتا ہے ، تو اُس کے ساتھ دو فرشتے ہوتے ہیں ، جو اعلان کرتے ہیں : اور دو گروہوں ( یعنی جنات اور انسانوں ) کے علاوہ تمام اہل زمین کو اُن ( فرشتوں ) کی آواز آتی ہے ( وہ یہ کہتے ہیں : ) ” اے لوگو ! اپنے پروردگار کی طرف آ جاؤ ! جو چیز تھوڑی ہو اور کفایت کر جائے ، وہ اُس سے زیادہ بہتر ہے ، جو زیادہ ہو اور غافل کر دے ۔ “
یہ روایت امام أحمد نے اور امام طبرانی نے معجم کبیر میں نقل کی ہے اور انہوں نے اس میں یہ الفاظ زاند نقل کیے ہیں : ” جب سورج غروب ہوتا ہے تو اس کے ہمراہ دو فرشتوں کو بھیجا جاتا ہے ، جو بلند آواز میں یہ کہتے ہیں : اے اللہ ! ( اپنی راہ میں ) خرچ کرنے والے کو اُس کی جگہ مزید عطا فرما ! اور ( اپنی راہ میں ) خرچ نہ کرنے والے ( کے مال کو ) ضائع کر دے ۔ “
یہ روایت امام طبرانی نے معجم اوسط میں نقل کی ہے ، تاہم انہوں نے یہ الفاظ نقل کئے ہیں : ” اے اللہ ! جو خرچ کرے ، تو اُس کی جگہ اسے عطا فرما ، اور جو خرچ نہ کرے ، اُس ( کے مال ) کو ضائع کر دے ۔ “ امام أحمد کے رجال اور طبرانی کی معجم کبیر میں اسانید کے بعض رجال صحیح کے رجال ہیں ۔

عبدالرحمن بن ابوسعید بیان کرتے ہیں : ( راوی کہتے ہیں : میرا خیال ہے انہوں نے
یہ روایت اپنے والد کے حوالے سے نقل کی ہے ، یہ شک ابوعبداللہ نامی راوی کو ہے ) وہ ( یعنی سیدنا ابوسعید خدری رضی اللہ عنہ ) کہتے ہیں : میں نے نبی اکرم صلی اللہ علیہ وسلم کو منبر پر یہ ارشاد فرماتے ہوئے سنا ہے : ” جو چیز تھوڑی ہو اور کفایت کر جائے ، وہ اُس سے بہتر ہے ، جو زیادہ ہو اور غافل کر دے ۔ “
یہ روایت ابویعلیٰ نے نقل کی ہے اور اس کے رجال صحیح کے رجال ہیں ، صرف صدقہ بن ربیع کا معاملہ مختلف ہے اور وہ ثقہ ہے ۔

سیدنا ابوامامہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اے لوگو ! اپنے پروردگار کی طرف آ جاؤ ! جو چیز تھوڑی ہو اور کفایت کر جائے ، وہ اُس سے بہتر ہے جو زیادہ ہو اور غافل کر دے ، اے لوگو ! یہ دو طرح کا سامان ہے ، بھلائی کا سامان اور شر کا سامان ، تو شر کے سامان کو تمہارے نزدیک ، بھلائی کے سامان سے زیادہ محبوب نہیں بنایا گیا ہے ۔ “
یہ روایت امام طبرانی نے فضال کی ، سیدنا ابوامامہ رضی اللہ عنہ سے نقل کردہ روایت کے طور پر نقل کی ہے اور فضال نامی راوی ضعیف ہے ۔