مجمع الزوائد ومنبع الفوائد

کردوس بیان کرتے ہیں : سیدنا خباب رضی اللہ عنہ اسلام قبول کرنے والے چھٹے فرد تھے ، تو وہ اسلام کا چھٹا حصہ ہو گئے ۔
یہ روایت امام طبرانی نے مرسل روایت کے طور پر نقل کی ہے اور کردوس تک اس کے رجال صحیح کے رجال ہیں اور کردوس ثقہ ہیں ۔

زہری بیان کرتے ہیں : سیدنا خباب بن ارت رضی اللہ عنہ بنوزہرہ کے ساتھ نسبت ولاء رکھتے تھے ، ان کی کنیت ابوعبداللہ تھی ، ان کا انتقال 37 ہجری میں ہوا ، جب سیدنا علی رضی اللہ عنہ صفین سے واپس کوفہ کی طرف تشریف لا رہے تھے ، یہ نبی اکرم صلی اللہ علیہ وسلم کے اصحاب سے تعلق رکھنے والے پہلے فرد ہیں ، جو کوفہ میں دفن ہوئے ، سیدنا خباب رضی اللہ عنہ نے مکہ میں اسلام قبول کیا تھا ۔
یہ روایت امام طبرانی نے ” مرسل “ روایت کے طور پر نقل کی ہے اور اس کی سند حسن ہے ۔

عروہ نے غزوہ بدر میں شریک ہونے والے افراد کے ناموں میں ، سیدنا خباب رضی اللہ عنہ بن ارت بن خویلد بن سعد بن جذیمہ بن کعب بن سعد کا ذکر کیا ہے ۔
یہ روایت امام طبرانی نے ” مرسل “ روایت کے طور پر نقل کی ہے اور اس کی سند حسن ہے ۔

زید بن وہب بیان کرتے ہیں : ہم ان کے ساتھ سفر کر رہے تھے ، راوی کہتے ہیں : یعنی سیدنا علی رضی اللہ عنہ کے ساتھ سفر کر رہے تھے ، یہ اس وقت کی بات ہے جب وہ صفین سے واپس آ رہے تھے ، جب ہم کوفہ کے دروازے کے پاس پہنچے ، تو وہاں ہمارے دائیں طرف سات قبریں موجود تھیں ، سیدنا علی رضی اللہ عنہ نے دریافت کیا : یہ کس کی قبریں ہیں ؟ لوگوں نے بتایا : اے اميرالمؤمنین ! آپ کے صفین کی طرف تشریف لے جانے کے بعد سیدنا خباب بن ارت رضی اللہ عنہ کا انتقال ہو گیا ، تو انہوں نے یہ وصیت کی کہ انہیں کوفہ سے باہر دفن کیا جائے ، راوی بیان کرتے ہیں : پہلے لوگ اپنے مرحومین کو اپنے گھروں میں دفن کرتے تھے ، یا اپنے محلوں کے دروازوں پر دفن کرتے تھے ، جب انہوں نے یہ دیکھا کہ سیدنا خباب رضی اللہ عنہ نے شہر سے باہر دفن ہونے کی وصیت کی ہے ، تو کچھ دوسرے لوگوں نے بھی اپنے مرحومین یہاں دفن کر دیے ، سیدنا علی رضی اللہ عنہ نے ارشاد فرمایا : ” اللہ تعالیٰ خباب پر رحم کرے ، اس نے رغبت رکھتے ہوئے اسلام قبول کیا ، فرمانبرداری کرتے ہوئے ہجرت کی ، مجاہد کے طور پر زندہ رہا ، اُسے اس کے جسم کے حوالے سے کچھ امور میں مبتلا کیا گیا ، لیکن اللہ تعالیٰ اس شخص کا اجر ضائع نہیں کرے گا ، جس نے اچھا عمل کیا ہو ۔ “ پھر سیدنا علی رضی اللہ عنہ قبروں کے قریب ہوئے اور انہوں نے یہ دعا پڑھی : ” اے مومنوں اور مسلمانوں کی بستی کے رہنے والو ! تم پر سلام ہو ، تم ہمارے پیشرو ہوں ، اور ہم تمہارے پیچھے آنے والے ہیں تھوڑے ہی عرصے میں ہم بھی تم سے آ ملیں گے ، اے اللہ ! تو ہماری اور ان کی مغفرت کر دے ، تو ہم سے اور اُن سے درگزر کر دے ، اس شخص کے لیے مبارکباد ہے جو آخرت کا ارادہ رکھتا ہے اور بھلائی کے لئے عمل کرتا ہے ، اور بنیادی ضرورت پوری ہونے پر قناعت کرتا ہے اور اللہ تعالیٰ سے راضی رہتا ہے ۔ “
یہ روایت امام طبرانی نے نقل کی ہے ، اس کی سند میں ایک راوی معلیٰ بن عبدالرحمن واسطی ہے اور وہ کذاب ہے ۔