مجمع الزوائد ومنبع الفوائد

امام شعبی بیان کرتے ہیں : میں نے سیدنا عبداللہ بن عباس رضی اللہ عنہما سے سوال کیا ، سب سے پہلے کس نے اسلام قبول کیا تھا ، تو سیدنا عبداللہ بن عباس رضی اللہ عنہما نے فرمایا : کیا تم نے سیدنا حسان بن ثابت رضی اللہ عنہ کا یہ شعر نہیں سنا ہے : ” جب تم کسی قابل اعتبار کے بھائی کے غم کو یاد کرو ، تو اپنے بھائی سیدنا ابوبکر رضی اللہ عنہ اور ان کے طرز عمل کو بھی یاد کر لینا ، جو مخلوق میں سب سے بہتر ہیں ، سب سے زیادہ پرہیزگار ، سب سے زیادہ عدل کرنے والے ہیں ، نبی کے علاوہ ( وہ سب سے زیادہ نیک ہیں ) اور انہوں نے اپنی ذمہ داریاں پوری کیں ، وہ دوسرے فرد بھی ہیں ، پیچھے والے بھی ہیں ، قابل تعریف بھی ہیں ، اور وہ سب سے پہلے فرد ہیں ، جنہوں نے رسولوں کی تصدیق کی ۔ “
یہ روایت امام طبرانی نے نقل کی ہے ۔ اس کی سند میں ایک راوی ہیثم بن عدی ہے اور وہ متروک ہے ۔

سیدنا عبداللہ بن عمر رضی اللہ عنہما بیان کرتے ہیں : سب سے پہلے سیدنا ابوبکر صدیق رضی اللہ عنہ نے اسلام قبول کیا تھا ۔
یہ روایت امام طبرانی نے معجم اوسط میں نقل کی ہے ۔ اس میں ایک سے زیادہ ضعیف راوی ہیں ۔

سیدنا زید بن ارقم رضی اللہ عنہ بیان کرتے ہیں ، سب سے پہلے سیدنا ابوبکر رضی اللہ عنہ نے نبی اکرم صلی اللہ علیہ وسلم کے ساتھ نماز ادا کی تھی ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی غالب بن عبداللہ بن غالب سعدی ہیں ، اور میں اس سے واقف نہیں ہوں ۔