مجمع الزوائد ومنبع الفوائد

سیدنا جابر بن عبداللہ رضی اللہ عنہ بیان کرتے ہیں : نبی اکرم صلی اللہ علیہ وسلم نے سیدنا ابودرداء رضی اللہ عنہ کو سیدنا ابوبکر صدیق رضی اللہ عنہ کے آگے چلتے ہوئے دیکھا ، تو ارشاد فرمایا : اے ابودرداء ! تم ایک ایسے شخص کے آگے چل رہے ہو ، سورج کسی ایسے شخص پر طلوع نہیں ہوا جو انبیاء کے بعد ، اس سب سے زیادہ فضیلت رکھتا ہو ۔ “ راوی بیان کرتے ہیں : تو اس کے بعد سیدنا ابودرداء رضی اللہ عنہ کو ہمیشہ سیدنا ابوبکر رضی اللہ عنہ کے پیچھے چلتے ہوئے دیکھا گیا ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی اسماعیل بن یحیی تیمی ہے ، اور وہ کذاب ہے ۔

سیدنا ابودرداء رضی اللہ عنہ بیان کرتے ہیں : نبی اکرم صلی اللہ علیہ وسلم نے مجھے دیکھا ، میں سیدنا ابوبکر رضی اللہ عنہ کے آگے چل رہا تھا ، تو آپ نے ارشاد فرمایا : تم اس شخص کے آگے نہ چلو جو تم سے زیادہ بہتر ہے ، ابوبکر ان سب لوگوں سے زیادہ بہتر ہے جن پر سورج طلوع ہوتا ہے یا غروب ہوتا ہے ۔ “
یہ روایت امام طبرانی نے نقل کی ہے ۔ اس کی سند میں ایک راوی بقیہ ہے ، اور وہ مدلس ہے ، اس روایت کے بقیہ رجال کی توثیق کی گئی ہے ۔

سیدنا سلمہ بن اکوع رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” ابوبکر صدیق سب لوگوں سے زیادہ بہتر ہے ، البتہ انبیاء کا معاملہ مختلف ہے ۔ “
یہ روایت امام طبرانی نے نقل کی ہے ۔ اس کی سند میں ایک راوی اسماعیل بن زیاد ہے ، اور وہ ضعیف ہے ۔

سیدنا اسعد بن زرارہ رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو دیکھا آپ نے لوگوں کو خطبہ دیا ، آپ نے توجہ کی ، تو آپ نے سیدنا ابوبکر رضی اللہ عنہ کو ملاحظہ نہیں کیا ، تو نبی اکرم صلی اللہ علیہ وسلم نے ارشاد فرمایا : ابوبکر ، ابوبکر روح القدس جبریل نے ابھی مجھے یہ بتایا ہے کہ آپ کے بعد آپ کی امت کا سب سے بہتر فرد ابوبکر صدیق ہے ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی ابوغزیہ محمد بن موسیٰ ہے اور وہ ضعیف ہے ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم اور آپ کے اصحاب ایک کنویں میں سے پانی نکال رہے تھے ، نبی اکرم صلی اللہ علیہ وسلم نے ارشاد فرمایا : تم میں سے ہر فرد اپنے ساتھ والے فرد کو لے جائے ، تو ان میں سے ہر ایک نے اپنے ساتھ والے فرد کو لے لیا ، صرف نبی اکرم صلی اللہ علیہ وسلم اور سیدنا ابوبکر رضی اللہ عنہ باقی رہ گئے ، تو نبی اکرم صلی اللہ علیہ وسلم نے سیدنا ابوبکر رضی اللہ عنہ کو اپنے ساتھ ملایا اور ان گلے لگایا اور فرمایا : میں اپنے ساتھی کے ساتھ ہوں ، میں اپنے ساتھی کے ساتھ ہوں ۔
یہ روایت امام طبرانی نے نقل کی ہے ۔ اس کی سند میں ایسا راوی ہے ، جس سے میں واقف نہیں ہوں ۔

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” اگر میں نے کسی کو خلیل بنانا ہوتا تو میں ابوبکر کو خلیل بنا لیتا ۔ “
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی داؤد بن یزید اؤدی ہے ، اور وہ ضعیف ہے ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم نے ارشاد فرمایا : ” اگر میں نے کسی کو خلیل بنانا ہوتا تو میں ابوبکر کو خلیل بنا لیتا البتہ اسلامی بھائی چارہ زیادہ فضیلت رکھتا ہے ۔ “
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی علی بن عبدالرحمن واسطی ہے ، اور میں اس سے واقف نہیں ہوں ۔

سیدنا عبداللہ بن عمر رضی اللہ عنہما بیان کرتے ہیں : ایک مرتبہ سیدنا ابوبکر رضی اللہ عنہ نے سیدنا عمر رضی اللہ عنہ کو برا بھلا کہا: ، اور پھر اس کے بعد انہوں نے کہا: اے میرے بھائی ! آپ میرے لئے دعائے مغفرت کریں ، تو سیدنا عمر رضی اللہ عنہ غصے میں آ گئے ( اور انہوں نے انکار کر دیا ) سیدنا ابوبکر رضی اللہ عنہ نے چند مرتبہ یہ بات کہی لیکن سیدنا عمر رضی اللہ عنہ غصے میں تھے ۔ سیدنا ابوبکر رضی اللہ عنہ نے اس بات کا تذکرہ نبی اکرم صلی اللہ علیہ وسلم سے کیا ، جب لوگ آپ کے پاس آئے اور وہاں بیٹھے تو نبی اکرم صلی اللہ علیہ وسلم نے فرمایا : تمہارے بھائی نے تم سے یہ کہا: تم اس کے لیے دعائے مغفرت کرو ، تو تم نے ایسا نہیں کیا ، سیدنا عمر رضی اللہ عنہ نے کہا: اس ذات کی قسم ! جس نے آپ کو حق کے ہمراہ نبی بنا کر مبعوث کیا ہے ۔ انہوں نے جب بھی مجھ سے یہ کہا: تو میں نے ان کے لئے ہمیشہ دعائے مغفرت کی ، آپ کے بعد میرے نزدیک مخلوق میں کوئی بھی ان سے زیادہ محبوب نہیں ہے ، تو سیدنا ابوبکر رضی اللہ عنہ نے کہا: جس ذات نے آپ کو حق کے ہمراہ مبعوث کیا ہے ، میرا بھی یہ عالم ہے کہ میرے نزدیک آپ کے بعد ان سے زیادہ محبوب اور کوئی نہیں ہے ، تو نبی اکرم صلی اللہ علیہ وسلم نے ارشاد فرمایا : ” میرے ساتھی کے بارے میں تم لوگ مجھے اذیت نہ پہنچاؤ ، اللہ تعالیٰ نے مجھے ہدایت اور دین حق کے ہمراہ مبعوث کیا ، تو تم لوگوں نے کہا: آپ غلط کہہ رہے ہیں ، اور ابوبکر نے کہا: آپ ٹھیک کہہ رہے ہیں ، اللہ کی قسم ! اگر اللہ تعالیٰ نے اس کا نام صاحب نہ رکھا ہوتا تو میں نے اسے خلیل بنا لینا تھا ، لیکن بھائی چارہ اللہ تعالیٰ کے لئے ہے ، خبردار ! تم لوگ ابوقحافہ کے بیٹے کے مخصوص دروازے کے علاوہ ہر دروازہ بند کر دو ۔ “
یہ روایت امام طبرانی نے نقل کی ہے ، اور اس کے رجال ” صحیح “ کے رجال ہیں ۔

سیدنا ربیعہ اسلمی رضی اللہ عنہ بیان کرتے ہیں : میں نبی اکرم صلی اللہ علیہ وسلم کی خدمت کیا کرتا تھا ، آپ نے مجھے ایک زمین عطا کی ، آپ نے سیدنا ابوبکر رضی اللہ عنہ کو بھی ایک زمین عطا کی ، جب دنیا آئی ، تو ہمارے درمیان کھجور کے ایک درخت کے بارے میں اختلاف ہو گیا ، سیدنا ابوبکر رضی اللہ عنہ نے کہا: یہ میری حد میں آتا ہے ، میں نے کہا: یہ میری حد میں آتا ہے ، اس دوران میرے اور سیدنا ابوبکر رضی اللہ عنہ کے درمیان تکرار ہو گئی ، سیدنا ابوبکر رضی اللہ عنہ نے مجھے ایک ایسی بات کہی جو مجھے بری لگی ، سیدنا ابوبکر رضی اللہ عنہ کو ندامت ہوئی ، تو انہوں نے مجھ سے کہا: اے ربیعہ ! تم بھی اس طرح کی بات مجھے جواب میں کہہ دو ، تاکہ بدلہ ہو جائے ، میں نے کہا: میں ایسا نہیں کروں گا ۔ سیدنا ابوبکر رضی اللہ عنہ نے کہا: یا تو تم ایسا کرو گے ورنہ میں تمہارے خلاف نبی اکرم صلی اللہ علیہ وسلم کی خدمت میں شکایت کروں گا ، میں نے کہا: میں ایسا نہیں کروں گا ۔ پھر انہوں نے اس زمین کو چھوڑا ، سیدنا ابوبکر رضی اللہ عنہ نبی اکرم صلی اللہ علیہ وسلم کے پاس گئے ۔ ان کے پیچھے چلتا ہوا میں بھی جانے لگا ۔ اسلم قبیلے سے تعلق رکھنے والے کچھ لوگ آئے ہوئے تھے ۔ ان لوگوں نے کہا: اللہ تعالیٰ سیدنا ابوبکر رضی اللہ عنہ پر رحم کرے ، یہ کس لئے نبی اکرم صلی اللہ علیہ وسلم کے سامنے تمہارے خلاف شکایت کرنا چاہ رہے ہیں ، حالانکہ تمہارے بارے میں بات تو انہوں نے کی ہے ، میں نے کہا: کیا تم لوگ یہ بات جانتے ہو کہ یہ کون ہیں ، یہ سیدنا ابوبکر صدیق رضی اللہ عنہ ہیں ۔ یہ دو افراد میں سے ایک ہیں ۔ یہ مسلمانوں کے بزرگ ہیں ، تم لوگ اس چیز سے بچنے کی کوشش کرو کہ ایسا نہ ہو کہ وہ مڑ کے دیکھیں اور انہیں تم نظر آؤ کہ تم لوگ ان کے خلاف میری مدد کرنا چاہ رہے ہو ، اور پھر وہ غصے میں آ جائیں اور نبی اکرم صلی اللہ علیہ وسلم کے پاس چلے جائیں اور ان کے غصے کی وجہ سے نبی اکرم صلی اللہ علیہ وسلم بھی غصے میں آ جائیں اور ان دونوں کے غصے کی وجہ سے اللہ تعالیٰ بھی غصے میں آ جائے اور ربیعہ ہلاک ہو جائے ، لوگوں نے کہا: پھر تم ہمیں کیا کہتے ہو ، سیدنا ربیعہ رضی اللہ عنہ نے کہا: تم لوگ واپس چلے جاؤ ۔ سیدنا ابوبکر رضی اللہ عنہ نبی اکرم صلی اللہ علیہ وسلم کے پاس چلے گئے ۔ ان کے بعد میں بھی اکیلا چلا گیا ، میں ان کے پیچھے چلتا ہوا نبی اکرم صلی اللہ علیہ وسلم کی خدمت میں حاضر ہوا ، سیدنا ابوبکر رضی اللہ عنہ نے نبی اکرم صلی اللہ علیہ وسلم کو پوری بات بتائی ، جس طرح ہوئی تھی ، نبی اکرم صلی اللہ علیہ وسلم نے سر اٹھا کر میری طرف دیکھا اور فرمایا : اے ربیعہ تمہارا اور صدیق کا کیا معاملہ ہے ، میں نے عرض کی : یا رسول اللہ ! اس اس طرح ہوا تھا ، انہوں نے مجھے ایک بات کہی جو مجھے اچھی نہیں لگی ، تو انہوں نے مجھ سے کہا: تم بھی اس طرح کہہ لو ، جس طرح میں نے کہا: ہے ، تاکہ بدلہ ہو جائے ، تو نبی اکرم صلی اللہ علیہ وسلم نے ارشاد فرمایا : تم نے ٹھیک کیا ہے ، تم نے اسے ہرگز جواب نہیں دینا تھا ، لیکن تم یہ کہو کہ اے ابوبکر اللہ تعالیٰ آپ کی مغفرت کرے ، راوی کہتے ہیں : تو سیدنا ابوبکر رضی اللہ عنہ روتے ہوئے تشریف لے گئے ۔
یہ روایت امام طبرانی نے نقل کی ہے ، اور امام أحمد نے اس کی مانند روایت ایک طویل حدیث کے ضمن میں نقل کی ہے ، جو اس سے پہلے نکاح سے متعلق باب میں گزر چکی ہے ۔ اس کی سند میں ایک راوی مبارک بن فضالہ ہے ، اس کی نقل کردہ حدیث حسن ہے ، اس روایت کے بقیہ رجال ثقہ ہیں ۔

سیدنا کعب بن مالک انصاری رضی اللہ عنہ بیان کرتے ہیں : تمہارے نبی کے ساتھ میری آخری ملاقات آپ کے وصال سے پانچ دن پہلے ہوئی تھی ، تو میں نے آپ صلی اللہ علیہ وسلم کو یہ ارشاد فرماتے ہوئے سنا تھا : ” ہر نبی کا اس کی امت میں ایک خلیل ہوتا ہے ، اور میرا خلیل ابوبکر بن ابوقحافہ ہے ، ویسے اللہ تعالیٰ نے تمہارے آقا کو خلیل بنایا ہوا ہے ۔ “
یہ روایت امام طبرانی نے نقل کی ہے ۔ اس کی سند میں ایک راوی علی بن یزید الہانی ہے اور وہ ضعیف ہے ۔

سیدنا ابوواقد رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اگر میں نے کسی کو خلیل بنانا ہوتا تو میں ابوقحافہ کے صاحبزادے کو ( خلیل ) بنا لیتا لیکن تمہارے آقا اللہ کے خلیل ہیں ۔ “
یہ روایت امام طبرانی نے نقل کی ہے ۔ اس کی سند میں ایک راوی یحیی بن عبدالحمید حمانی ہے ، اور وہ ضعیف ہے ۔

سیدنا ابوامامہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” بے شک اللہ تعالیٰ نے مجھے خلیل بنایا ہے ، جس طرح اس نے سیدنا ابراہیم علیہ السلام کو خلیل بنایا ہے ، اور میرا خلیل ابوبکر ہے ۔ “
یہ روایت امام طبرانی نے نقل کی ہے ۔ اس کی سند میں ایک راوی علی بن یزید الہانی ہے ، اور وہ ضعیف ہے ۔

سیدنا عبداللہ بن عباس رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” میرے ساتھ کسی نے بھی ابوبکر سے زیادہ اچھا سلوک نہیں کیا ، اس نے اپنی بیٹی کی شادی میرے ساتھ کروائی ، مجھے ساتھ لے کر دارالہجرت کی طرف آیا ، اگر میں نے کسی کو خلیل بنانا ہوتا ، تو میں ابوبکر کو خلیل بنا لیتا ، لیکن بھائی چارہ اور محبت قیامت کے دن تک رہیں گے ۔ “
یہ روایت امام طبرانی نے نقل کی ہے ۔ اس کی سند میں ایک راوی نہشل بن سعید ہے ، اور وہ متروک ہے ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” میرے ساتھ ابوبکر سے زیادہ اچھا سلوک اور کسی نے نہیں کیا ، اس نے اپنی جان اور اپنے مال کے ذریعے میرا ساتھ دیا ۔ “
یہ روایت امام طبرانی نے معجم کبیر اور معجم اوسط میں نقل کی ہے ، اور یہ الفاظ زائد نقل کیے ہیں : ” اس نے میری شادی اپنی بیٹی کے ساتھ کروائی ۔ “ اس روایت کی سند میں ایک راوی ارطاۃ ابوحاتم ہے اور وہ ضعیف ہے ۔

سیدنا معاذ بن جبل رضی اللہ عنہ بیان کرتے ہیں : جب نبی اکرم صلی اللہ علیہ وسلم نے سیدنا معاذ رضی اللہ عنہ کو یمن کی طرف بھیجنے کا ارادہ کیا ، تو آپ نے اپنے اصحاب سے مشورہ لیا ، جن میں سیدنا ابوبکر ، سیدنا عمر ، سیدنا عثمان ، سیدنا علی ، سیدنا زبیر اور سیدنا اُسید بن حضیر رضی اللہ عنہم شامل تھے ، نبی اکرم صلی اللہ علیہ وسلم نے ان لوگوں سے مشورہ لیا تو سیدنا ابوبکر رضی اللہ عنہ نے کہا: اگر آپ نے ہم سے مشورہ نہ لیا ہوتا تو ہم نے اس بارے میں بات چیت نہیں کرنی تھی ، نبی اکرم صلی اللہ علیہ وسلم نے ارشاد فرمایا : جن معاملات میں میری طرف وحی نہیں کی جاتی ، میں ان میں تمہاری طرح کا ایک فرد ہوں ، راوی کہتے ہیں : لوگوں نے اس بارے میں بات چیت کی ، ہر انسان نے اپنی رائے بیان کی ، نبی اکرم صلی اللہ علیہ وسلم نے دریافت کیا : اے معاذ ! تم کیا سمجھتے ہو ، میں نے عرض کی : میں یہ سمجھتا ہوں ، سیدنا ابوبکر رضی اللہ عنہ نے کہا: ہے ، وہی ٹھیک ہے ۔ نبی اکرم صلی اللہ علیہ وسلم نے فرمایا : ” بے شک اللہ تعالیٰ آسمان کے اوپر اس بات کو ناپسند کرتا ہے کہ ابوبکر غلطی کرے ۔ “
یہ روایت امام طبرانی نے نقل کی ہے ، اور ابوعطوف نامی راوی سے میں واقف نہیں ہوں ۔ اس روایت کے بقیہ رجال ثقہ ہیں ، اس کے بعض راویوں کے بارے میں اختلاف پایا جاتا ہے ۔

سیدنا سہل بن سعد ساعدی رضی اللہ عنہ روایت کرتے ہیں : نبی اکرم صلی اللہ علیہ وسلم نے سیدنا ابوبکر رضی اللہ عنہ اور سیدنا عمر رضی اللہ عنہ سے مشورہ لیا ، دوسرے لوگوں نے بھی نبی اکرم صلی اللہ علیہ وسلم کو مشورہ دیا ، تو سیدنا ابوبکر رضی اللہ عنہ کی رائے اس بارے میں درست ثابت ہوئی ، تو نبی اکرم صلی اللہ علیہ وسلم نے ارشاد فرمایا : ” بے شک اللہ تعالیٰ اس بات کو ناپسند کرتا ہے کہ ابوبکر سے غلطی ہو ۔ “
یہ روایت امام طبرانی نے معجم اوسط میں نقل کی ہے ، اور اس کے رجال ثقہ ہیں ۔

سیدنا عقبہ بن عامر رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جب مجھے آسمان کی طرف معراج کروائی گئی ، تو میں جنت عدن میں داخل ہوا ، میرے سامنے ایک سیب آیا ، جب میں نے اسے اپنے ہاتھ میں رکھا تو وہ ایک حور کی طرف سے آیا تھا ، جو خوبصورت آنکھوں والی پسندیدہ شخصیت کی مالک تھی ، اس کی آنکھوں کی پلکیں یوں تھیں جس طرح عقاب کے آگے والے پر ہوتے ہیں ، میں نے اس سے دریافت کیا : تم کس کو ملو گی ؟ اس نے جواب دیا : میں آپ کے بعد والے خلیفہ کے لئے ہوں“ ۔
یہ روایت امام طبرانی نے معجم کبیر اور معجم اوسط میں اپنے استاد بکر بن سہل کے حوالے سے نقل کی ہے ، امام ذہبی کہتے ہیں : یہ مقارب الحدیث ہے اس نے سلیمان عبدی کے حوالے سے اس روایت کو نقل کیا ہے ، جسے ابن حبان نے ثقہ قرار دیا ہے ، اس روایت کے بقیہ رجال ” صحیح “ کے رجال ہیں ۔

سیدنا جابر رضی اللہ عنہ بیان کرتے ہیں : نبی اکرم صلی اللہ علیہ وسلم نے سیدنا ابوبکر رضی اللہ عنہ کے پیچھے نماز ادا کی تھی ۔
یہ روایت امام طبرانی نے معجم صغیر اور معجم اوسط میں نقل کی ہے ۔ اس کی سند میں ایک راوی عبید بن ہشام ہے ، جسے ابوحاتم اور دیگر حضرات نے ثقہ قرار دیا ہے ، اور اس کے بارے میں اختلاف پایا جاتا ہے ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” ایک شخص جنت میں داخل ہو گا ، تو جنت میں موجود ہر گھر اور ہر بالاخانے کے سب لوگ یہ کہیں گے خوش آمدید ، خوش آمدید ، ہماری طرف آئیں ، ہماری طرف آئیں ، سیدنا ابوبکر رضی اللہ عنہ نے عرض کی : یا رسول اللہ ! آپ کیا سمجھتے ہیں ۔ وہ شخص آج بھی موجود ہے ؟ نبی اکرم صلی اللہ علیہ وسلم نے فرمایا : جی ہاں اے ابوبکر ! وہ تم ہو ۔ “
یہ روایت امام طبرانی نے معجم کبیر اور معجم اوسط میں نقل کی ہے ، اور اس کے رجال ” صحیح “ کے رجال ہیں ، صرف أحمد بن ابوبکر سالمی کا معاملہ مختلف ہے ، اور وہ ثقہ ہے ۔

صلہ بن زفر بیان کرتے ہیں : جب سیدنا علی رضی اللہ عنہ کے سامنے سیدنا ابوبکر رضی اللہ عنہ کا ذکر کیا جاتا تو وہ فرماتے تھے : سبقت لے جانے والے لوگ ، سبقت لے جانے والوں کا ذکر کرتے ہیں ، پھر انہوں نے فرمایا : اس ذات کی قسم ! جس کے دست قدرت میں میری جان ہے ، ہم نے جب بھی کسی بھلائی کی طرف سبقت لے جانے کی کوشش کی ، تو سیدنا ابوبکر رضی اللہ عنہ اس کی طرف ہم سے سبقت لے جا چکے ہوتے تھے ۔ “
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی أحمد بن عبدالرحمن بن مفضل حرانی ہے ، اور میں اس سے واقف نہیں ہوں ۔ اس روایت کے بقیہ رجال ثقہ ہیں ۔

محمد بن عقیل بیان کرتے ہیں : سیدنا علی بن ابوطالب رضی اللہ عنہ نے ہمیں خطبہ دیتے ہوئے ارشاد فرمایا : اے لوگو تم لوگ مجھے بتاؤ کہ لوگوں میں سب سے زیادہ بہادر کون ہے ، راوی کہتے ہیں : یا شاید یہ الفاظ ہیں ۔ ہم نے کہا: اے امیر المؤمنین ! آپ ہیں ، سیدنا علی رضی اللہ عنہ نے فرمایا : جہاں تک میرا تعلق ہے ، تو میں نے جس کسی کو بھی مقابلے کے لئے للکارا اسے پسپا کر دیا ، لیکن تم لوگ مجھے یہ بتاؤ کہ سب سے زیادہ بہادر کون ہے ؟ لوگوں نے کہا: ہمیں نہیں معلوم کون ہے ، سیدنا علی رضی اللہ عنہ نے فرمایا : ابوبکر ، غزوہ بدر کے دن ہم نے نبی اکرم صلی اللہ علیہ وسلم کے لئے ایک چھپر تیار کیا ، ہم نے سوچا کہ کون نبی اکرم صلی اللہ علیہ وسلم کے ساتھ رہے گا ، تاکہ مشرکین میں سے کوئی شخص آپ کی طرف نہ آ سکے ، تو اللہ کی قسم ! سیدنا ابوبکر رضی اللہ عنہ کے علاوہ اور کوئی نبی اکرم صلی اللہ علیہ وسلم کے قریب نہیں ہوا ، وہ تلوار سونت کر نبی اکرم صلی اللہ علیہ وسلم کے سرہانے کھڑے رہے ، جو بھی شخص نبی اکرم صلی اللہ علیہ وسلم کی طرف آنا چاہتا ، سیدنا ابوبکر رضی اللہ عنہ اس کی طرف چلے جاتے ، تو وہ سب سے زیادہ بہادر شخص تھے ۔ سیدنا علی رضی اللہ عنہ بیان کرتے ہیں : مجھے نبی اکرم صلی اللہ علیہ وسلم کے بارے میں یہ بات یاد ہے کہ قریش نے نبی اکرم صلی اللہ علیہ وسلم کو پکڑ لیا ، کوئی شخص آپ کو دھکے دے رہا تھا اور کوئی شخص آپ کو کھینچ رہا تھا ، اور وہ لوگ یہ کہہ رہے تھے ، کیا آپ وہ فرد ہیں جو یہ کہتے ہیں کہ معبود صرف ایک ہی ہوتا ہے ، سیدنا علی رضی اللہ عنہ کہتے ہیں : اللہ کی قسم ! اس وقت ہم میں سے کوئی بھی آپ کے قریب نہیں ہوا ، صرف سیدنا ابوبکر رضی اللہ عنہ آگے بڑھے اور وہ کسی کو مار رہے تھے ، کسی کو پرے کر رہے تھے ، کسی کو کھینچ رہے تھے اور یہ کہہ رہے تھے ، تم لوگوں کا ستیاناس ہو ، کیا تم ایک ایسے شخص کو قتل کرنا چاہتے ہو جو یہ کہتا ہے کہ میرا پروردگار اللہ تعالیٰ ہے ، پھر سیدنا علی رضی اللہ عنہ نے اپنے جسم پر موجود چادر کو اٹھایا اور رونے لگے ، یہاں تک کہ ان کی داڑھی تر ہو گئی ، پھر سیدنا علی رضی اللہ عنہ نے ارشاد فرمایا : میں تم لوگوں کو اللہ کا واسطہ دے کر دریافت کرتا ہوں کہ کیا آل فرعون سے تعلق رکھنے والا کوئی مومن زیادہ بہتر ہے یا سیدنا ابوبکر رضی اللہ عنہ زیادہ بہتر ہیں ؟ تو لوگ خاموش رہے ، تو سیدنا علی رضی اللہ عنہ نے فرمایا : تم لوگ مجھے جواب کیوں نہیں دیتے ؟ اللہ کی قسم ! سیدنا ابوبکر رضی اللہ عنہ کی ایک گھڑی آل فرعون سے تعلق رکھنے والے کسی مومن جیسے فرد سے زیادہ بہتر ہے ، کیونکہ ان لوگوں نے اپنے ایمان کو چھپایا تھا اور ان صاحب نے اپنے ایمان کا اعلان کیا تھا ۔
یہ روایت امام بزار نے نقل کی ہے ۔ اس کی سند میں ایسا راوی ہے ، جس سے میں واقف نہیں ہوں ۔

شقیق بیان کرتے ہیں : سیدنا علی رضی اللہ عنہ سے کہا: گیا : آپ کسی کو اپنا جان نشین مقرر کیوں نہیں کرتے ؟ انہوں نے فرمایا : نبی اکرم صلی اللہ علیہ وسلم نے کسی کو اپنا جانشین مقرر کیا تھا کہ میں تم پر اپنا جانشین مقرر کروں ، اگر اللہ تعالیٰ لوگوں کے بارے میں بھلائی کا ارادہ کرے گا ، تو ان لوگوں کو ان میں سے سب سے بہتر فرد پر جمع کر دے گا ، جس طرح اللہ تعالیٰ نے لوگوں کو ان کے نبی کے بعد ان میں سے سب سے بہتر فرد پر جمع کر دیا تھا ۔
یہ روایت امام بزار نے نقل کی ہے ، اور اس کے رجال ” صحیح “ کے رجال ہیں ، صرف اسماعیل بن ابوحارث کا معاملہ مختلف ہے ، اور وہ ثقہ ہے ۔

سیدنا اسید بن صفوان رضی اللہ عنہ جو نبی اکرم صلی اللہ علیہ وسلم کے صحابی ہیں ۔ وہ بیان کرتے ہیں : جب سیدنا ابوبکر رضی اللہ عنہ کا انتقال ہو گیا ، تو انہیں ایک چادر میں ڈھانپ دیا گیا ، مدینہ منورہ میں آہ و زاری شروع ہو گئی ، لوگ اسی طرح پریشان ہو گئے جس طرح نبی اکرم صلی اللہ علیہ وسلم کے وصال کے وقت ہوئے تھے ۔ سیدنا علی بن ابوطالب رضی اللہ عنہ تیزی سے چلتے ہوئے اور انا للہ وانا الیہ راجعون پڑھتے ہوئے آئے اور وہ یہ کہہ رہے تھے کہ آج نبوت کی خلافت منقطع ہو گئی ہے ، یہاں تک کہ وہ اس گھر کے دروازے پر آ کر ٹھہر گئے جس گھر میں سیدنا ابوبکر رضی اللہ عنہ کی میت رکھی ہوئی تھی ۔ سیدنا علی رضی اللہ عنہ نے کہا: اے ابوبکر ! اللہ تعالیٰ آپ پر رحم کرے ، آپ سب سے پہلے اسلام قبول کرنے والے شخص تھے اور سب سے زیادہ خالص ایمان والے فرد تھے سب سے زیادہ پختہ یقین رکھنے والے تھے ، اللہ تعالیٰ سے سب سے زیادہ ڈرنے والے تھے ( دنیا اور لوگوں سے ) سب سے زیادہ بے نیاز تھے اور نبی اکرم صلی اللہ علیہ وسلم کا سب سے زیادہ خیال رکھنے والے تھے ، اسلام کے سب سے زیادہ خیرخواہ تھے ، نبی اکرم صلی اللہ علیہ وسلم کے اصحاب پر سب سے زیادہ احسان کرنے والے تھے اور نبی اکرم صلی اللہ علیہ وسلم کے ساتھ کے اعتبار سے سب سے زیادہ عمدہ تھے ، مناقب کے اعتبار سے سب سے زیادہ فضیلت والے تھے ، سبقت لے جانے والے امور کے حوالے سے سب سے زیادہ کثرت والے تھے ، درجہ کے اعتبار سے سب سے زیادہ بلند مرتبہ تھے ، نبی اکرم صلی اللہ علیہ وسلم کے سب سے زیادہ قریبی تھے اور عادات و اطوار اور طور طریقوں کے حوالے سے نبی اکرم صلی اللہ علیہ وسلم سے سب سے زیادہ مشابہت رکھتے تھے ، نبی اکرم صلی اللہ علیہ وسلم کے نزدیک سب سے زیادہ قابل اعتماد تھے ، نبی اکرم صلی اللہ علیہ وسلم کے نزدیک سب سے زیادہ قدر و منزلت کے مالک تھے ، نبی اکرم صلی اللہ علیہ وسلم کے نزدیک سب سے زیادہ معزز تھے ، تو اللہ تعالیٰ اسلام کی طرف سے اپنے رسول کی طرف سے اور تمام مسلمانوں کی طرف سے آپ کو جزائے خیر عطا کرے ، جب نبی اکرم صلی اللہ علیہ وسلم کو لوگوں نے جھٹلایا تھا ، تو آپ نے نبی اکرم صلی اللہ علیہ وسلم کی تصدیق کی تھی اور آپ وہ فرد ہیں کہ جس کا نام اللہ تعالیٰ نے اپنی کتاب میں صدیق رکھا ہے ، اور ارشاد فرمایا ہے : ” اور وہ جو سچائی لے کے آیا “ اس سے مراد سیدنا محمد صلی اللہ علیہ وسلم ہیں ، اور جس نے اس کی تصدیق کی اس سے مراد سیدنا ابوبکر رضی اللہ عنہ ہیں ۔ ” جب لوگوں نے کنجوسی کا مظاہرہ کیا ، تو آپ نے نبی اکرم صلی اللہ علیہ وسلم کا ساتھ دیا ، جب لوگ بیٹھے رہے ، تو آپ نبی اکرم صلی اللہ علیہ وسلم کے ساتھ اٹھ کھڑے ہوئے ، آپ سخت صورت حال میں بھی نبی اکرم صلی اللہ علیہ وسلم کے ساتھ رہے ، اور اچھے طریقے سے ساتھ رہے ، آپ نے نبی اکرم صلی اللہ علیہ وسلم کو سکون پہنچانے کی کوشش کی ، ہجرت میں آپ نبی اکرم صلی اللہ علیہ وسلم کے ساتھی تھے ، پریشانی کے مقامات میں نبی اکرم صلی اللہ علیہ وسلم کے ساتھی تھے اور پھر نبی اکرم صلی اللہ علیہ وسلم کی امت کے بارے میں آپ نبی اکرم صلی اللہ علیہ وسلم کے جانشین بنے ، تو اچھے طریقے سے خلیفہ ثابت ہوئے ، اس وقت جب کچھ لوگ مرتد ہو گئے تو آپ نے اللہ تعالیٰ کے دین کو اس طرح قائم رکھا کہ اس طرح کسی نبی کے کسی خلیفہ نے قائم نہیں کیا ہو گا ، جب آپ کے ساتھی کمزور تھے ، تو آپ چاک و چوبند تھے ، جب وہ ہلکے ہو رہے تھے ، تو آپ اٹھ کھڑے ہوئے اور آپ نے اللہ کے رسول کے طریقے کو لازم پکڑ لیا ، خواہ یہ بات منافقین کو کتنی ہی بری لگے ، اور کافروں کو کتنا ہی غصہ آئے ، تو جب لوگ پھسل رہے تھے اس وقت آپ نے معاملے کو قائم رکھا اور جب لوگ ٹھہر گئے تھے ، تو آپ نے اللہ کے نور کو جاری رکھا ، مرتبے کے اعتبار سے آپ ان میں سب سے بلند تر تھے اور سب سے زیادہ کم کلام کرنے والے تھے اور سب سے زیادہ عمدہ کلام کرنے والے تھے ، سب سے زیادہ طویل خاموش رہنے والے تھے ، سب سے زیادہ بلیغ بات کرنے والے تھے ، سب سے زیادہ اچھی بات کرنے والے تھے ، سب سے زیادہ بہادر تھے ، سب سے مضبوط یقین رکھنے والے تھے ، سب سے بہتر عمل کرنے والے تھے ، معاملات کو سب سے زیادہ بہتر طور پر سمجھنے والے تھے ، آپ دین کے لئے پیشوا تھے اور مومنین کے لئے مہربان باپ تھے ، جب وہ لوگ آپ کے عیال بن گئے تھے ، تو آپ نے اس بوجھ کو اٹھایا ، جس کے حوالے سے وہ لوگ کمزور ہو گئے تھے اور اس چیز کی حفاظت کی جس کو وہ ضائع کرنے لگے تھے اور اس چیز کا خیال رکھا جس میں وہ تاخیر کر رہے تھے اور اس وقت آپ نے صبر سے کام لیا ، جب وہ لوگ گریہ و زاری کر رہے تھے اور وہ جو چاہتے تھے اس کے نشانات تک آپ پہنچ گئے اور وہ لوگ آپ کی وجہ سے وہاں تک پہنچے جس کے بارے میں ان کا گمان نہیں تھا ، آپ کافرین کے لئے انڈیلا جانے والا عذاب تھے اور مسلمانوں کے لیے بادل اور ہریالی تھے ، آپ کی فطرت میں بے نیازی تھی ، آپ اس کے کناروں ( یا اس کے زیادہ تر حصے ) کے ذریعے کامیاب ہوئے ، اور اس کے فضائل لے گئے ، آپ نے اس کے سبقت لے جانے والوں کو محفوظ کر لیا ، آپ کی حجت کم نہیں ہوئی ، آپ کا دل ٹیڑھا نہیں ہوا ، آپ کی بصیرت کم نہیں ہوئی ، آپ کا من بزدل نہیں ہوا ، آپ اس پہاڑ کی مانند تھے ، جس کو تیز ہوائیں ہلا نہیں سکتی ہیں اور بجلیاں گرا نہیں سکتی ہیں ، آپ ویسے ہی تھے جس طرح نبی اکرم صلی اللہ علیہ وسلم نے ارشاد فرمایا : نبی اکرم صلی اللہ علیہ وسلم کے ساتھ سب سے زیادہ اچھا سلوک ، اپنے ساتھ کے اعتبار سے ، آپ نے کیا ، یا جس طرح نبی اکرم صلی اللہ علیہ وسلم نے ارشاد فرمایا : یہ جسمانی طور پر کمزور ہے ، لیکن اللہ کے معاملے میں طاقتور ہے ، مسلمانوں کے نزدیک آپ تواضع کرنے والے عظیم فرد تھے ، زمین میں نمایاں حیثیت کے مالک تھے کسی کو آپ کے بارے میں کوئی الجھن نہیں تھی ، کوئی شخص آپ کی برائی نہیں کر سکتا تھا اور نہ ہی آپ کے بارے میں کوئی لالچ رکھ سکتا تھا ، آپ کے نزدیک کسی شخص کے لیے زیادتی نہیں تھی ، کمزور اور کمتر حیثیت کا شخص آپ کے نزدیک طاقتور تھا کہ آپ اس کا حق اسے دلوا سکتے تھے ، اور طاقتور نمایاں حیثیت کا شخص ، آپ کے نزدیک کمزور تھا ، جب تک اس سے حق وصول نہیں کیا جاتا ، اس بارے میں قریب کے لوگ اور دور کے لوگ آپ کے نزدیک برابر کی حیثیت رکھتے تھے ، آپ کا معاملہ حق کا سچائی کا تھا ، آپ کے قول میں نرمی پائی جاتی تھی ، جب آپ دنیا سے رخصت ہوئے ، تو راستہ طے ہو چکا تھا ، دین معتدل ہو چکا تھا ، ایمان قوی ہو چکا تھا ، اللہ کا معاملہ قوی ہو چکا تھا ، خواہ یہ بات کافروں کو بری ہی لگے ، تو اللہ کی قسم ! آپ زبردست سبقت لے گئے اور آپ نے اپنے بعد والوں کو شدید مشکل کا شکار کر دیا ، آپ جنت کے حوالے سے کامیاب ہوئے اور آسمان میں آپ کی ( وفات ) کی تکلیف بڑی سمجھی گئی ، اور آپ کی مصیبت مخلوق تک پہنچ گئی ، تو بے شک ہم اللہ تعالیٰ کے لئے ہیں ، اور بے شک ہم نے اسی کی طرف لوٹ کے جانا ہے ، اور بے شک ہم اللہ تعالیٰ کے اس کے فیصلے کے حوالے سے اس سے راضی ہیں ، اور اس کا معاملہ اللہ تعالیٰ کے سپرد کرتے ہیں ، مسلمانوں کو اللہ کے رسول صلی اللہ علیہ وسلم کے بعد اور کسی کے حوالے سے ایسی مصیبت کا سامنا نہیں کرنا پڑے گا ، جس طرح کی مصیبت کا سامنا آپ کے ( انتقال کی ) وجہ سے کرنا پڑا ہے ، آپ دین کے لئے تیاری اور پناہ گاہ تھے ، مسلمانوں کے لئے قلعہ اور اجتماعیت اور انسیت کا باعث تھے ، منافقین کے لئے سختی اور شدت کا باعث تھے ، اللہ تعالیٰ آپ کو اپنے نبی صلی اللہ علیہ وسلم کے ساتھ ملائے اور آپ کے اجر سے ہمیں اللہ تعالیٰ محروم نہ رکھے ، اور آپ کے بعد ہمیں گمراہ نہ کرے ۔ “ راوی بیان کرتے ہیں : لوگ خاموش رہے ، یہاں تک کہ سیدنا علی رضی اللہ عنہ نے اپنی بات پوری کر لی تو نبی اکرم صلی اللہ علیہ وسلم کے اصحاب رونے لگے ، انہوں نے کہا: اے اللہ کے رسول کے چچا زاد ! آپ نے سچ کہا: ہے ۔
یہ روایت امام بزار نے نقل کی ہے ۔ اس کی سند میں ایک راوی عمر بن ابراہیم ہاشمی کردی ہے اور وہ کذاب ہے ۔

علی بن أحمد سدوی اپنے والد کا یہ بیان نقل کرتے ہیں : سیدہ عائشہ رضی اللہ عنہا کو یہ اطلاع ملی کہ کچھ لوگ سیدنا ابوبکر صدیق رضی اللہ عنہ پر تنقید کرتے ہیں ، سیدہ عائشہ رضی اللہ عنہا نے ان میں سے کچھ لوگوں کو پیغام بھیج کر بلوایا ، انہوں نے درمیان میں پردہ کروایا اور پھر غصے کا اظہار کرتے ہوئے اور ملامت کرتے ہوئے یہ ارشاد فرمایا : میرے والد ، میرے والد کے کیا کہنے ؟ تم لوگ میرے والد پر تنقید نہیں کر سکتے ، اللہ کی قسم ! وہ بلند پہاڑ تھے اور پھیلا ہوا سایہ تھے ، جب تم لوگوں نے جھٹلایا ، تو اللہ کی قسم ! اس وقت انہوں نے کامیابی حاصل کی ، جب تم لوگوں نے کمزوری دکھائی ، تو انہوں نے سبقت حاصل کی ، ایک ایسی سبقت جو کسی شہسوار کی ہوتی ہے ، جب اُس نے دور تک جانا ہو ، وہ اپنی جوانی میں قریش کے نمایاں فرد تھے ، اور بڑھاپے میں اُن کے لئے غار کی حیثیت رکھتے تھے ، انہوں نے ( لوگوں ) کے قیدیوں کو آزاد کروایا ، اور ان ( لوگوں ) کے غریبوں کو مال دیا ، وہ ان کے بکھرے ہوئے معاملات کو اکٹھا کرتے تھے ، اور پریشانیوں کو ختم کرتے تھے ، یہاں تک کہ ان لوگوں کے دل اُن کی طرف مائل ہو گئے ، پھر سیدنا ابوبکر رضی اللہ عنہ نے اپنے دین کے بارے میں مضبوطی کا اظہار کیا ، اور اللہ کی ذات کے بارے میں اُن کی یہ مضبوطی ہمیشہ برقرار رہی ، یہاں تک کہ انہوں نے اپنے صحن میں مسجد بنا لی ، جس میں وہ ، اُس چیز ( یعنی عبادت ) کو زندہ کرتے تھے ، جسے باطل لوگ نہیں کرتے تھے ، وہ ایسے ( فرد ) تھے کہ اُن کے آنسو بہتے رہتے تھے ، اور ان کا دل نرم تھا ، غم کی وجہ سے ان کی گھٹی ہوئی سی آواز نکلتی تھی ، مکہ کی خواتین اور ان خواتین کے بچے ، سیدنا ابوبکر رضی اللہ عنہ کے پاس اکٹھے ہو جاتے تھے اور اُن کا مذاق اڑایا کرتے تھے ، حالانکہ اللہ تعالیٰ ان ( کفار ) کے ساتھ استہزاء کرے گا اور انہیں اُن کی سرکشی میں رہنے دے گا کہ وہ بھٹکتے رہیں ، یہ بات قریش سے تعلق رکھنے والے افراد پر بہت گراں گزری ، انہوں نے اپنی کمانیں سیدھی کر لیں اور تیروں پر پھل لگا لیا ، اور سیدنا ابوبکر رضی اللہ عنہ کو نشانہ بنا لیا ، تو قریش کے لوگوں نے سیدنا ابوبکر رضی اللہ عنہ کے لئے نہ تو کوئی پتھر توڑا ، اور نہ ہی اُن کے لئے کوئی نیزہ توڑا ، سیدنا ابوبکر رضی اللہ عنہ سے اپنے طریقے پر گامزن رہے ، یہاں تک کہ دین نے غلبہ حاصل کر لیا ، دین اپنی جگہ پر جم گیا ، اور اس نے اپنے کیل ٹھوک دیئے ، اور لوگ گروپوں کی شکل میں دین میں داخل ہونے لگے ، ہر گروہ کچھ افراد کو بھیج دیتا تھا ، لوگ متفرق شکلوں میں آتے تھے ، پھر یہ ہوا کہ اللہ تعالیٰ نے اپنے نبی کے لئے اس چیز کو منتخب کیا ، جو اس کے پاس ہے ، جب اللہ تعالیٰ نے انہیں وفات دے دی ، تو شیطان نے اپنا خیمہ لگا لیا ، اس نے اپنا جال بچھا لیا ، اس نے اپنی طنابیں کھینچ لیں اور اپنے گھر سواروں اور پیادہ افراد کو لے آیا ، وہ اسلام کی رسّی میں اضطراب آ گیا ، اور اس کے عہد میں تنازع آ گیا ، اور اہل اسلام اختلاف کا شکار ہو گئے ، اور ان کا اجتماع انتشار میں بدل گیا ، تو کچھ لوگوں نے یہ گمان کیا کہ شاید وہ اپنے لالچ ، یا مقاصد کو حاصل کر لیں گے اور اس صورتحال میں مسلمان کامیابی حاصل نہیں کر سکیں گے ، لیکن یہ بھلا کیسے ہو سکتا تھا ، جبکہ سیدنا صدیق اکبر رضی اللہ عنہ ان کے درمیان موجود تھے ، وہ آستینیں چڑھا کر اور تہبند سنبھال کر اٹھ کھڑے ہوئے ، انہوں نے اپنے لباس کے کنارے کو سی لیا ، اور دونوں طرف سے اسے اکٹھا کر لیا ( یعنی وہ مقابلہ کرنے کے لئے مکمل طور پر تیار ہو گئے ) تو انہوں نے اسلام کے غلبے کو لوٹا دیا ، اور اس کے بکھرے ہوئے امور کو سمیٹ دیا ، اور اس میں رونما ہونے والے ٹیڑھے پن کو سیدھا کر دیا ، تو ان کے دبانے کی وجہ سے منافقت پیچھے ہٹ گئی ، اور ان کے بلند کرنے کی وجہ سے دین اس چیز سے محفوظ ہو گیا ، جس کے حوالے سے اندیشہ تھا ، جب انہوں نے حق کو اس کے متعلقہ افراد تک پہنچا دیا ، اور سروں کو کندھوں پر جما دیا ، اور پھولوں کو جوڑوں میں محفوظ کر دیا ، تو ان کا آخری وقت آ گیا ، تو انہوں نے اپنی ذات کے حوالے سے پیدا ہونے والے خلاء کو اس شخصیت کے ذریعے پر کیا ، جو رحمت ہونے میں ان کی طرح کے تھے ، اور طریقہ کار اور عدل کرنے میں ان کی نظیر تھے ، اور وہ خطاب کے صاحبزادے ( سیدنا عمر رضی اللہ عنہ ) ہیں ۔ اس ماں کے کیا کہنے ؟ جو ان کے حوالے سے حاملہ ہوئیں ، جس نے انہیں دودھ پلایا ، اور ان جیسے بے مثل شخص کو جنم دیا ، انہوں نے کافروں کو فتح کیا اور انہیں ذلت کا شکار کیا ، اور اور شرک کو یوں پرے کر دیا کہ اُس کا ٹھکانہ نہ رہا ، اور انہوں نے زمین کو چیر دیا ( یعنی اسے فتح کر لیا ) تو اُس ( زمین ) نے اپنی کھائی ہوئی چیز کو قے کر دیا اور چھپا کر رکھی گئی چیز کو اس نے پھینک دیا ( یعنی سیدنا عمر رضی اللہ عنہ کی وجہ سے زمین میں سے ، نعمتیں اور دولتیں مسلمانوں کو حاصل ہوئیں ) اُس ( یعنی دنیا ) نے سیدنا عمر رضی اللہ عنہ کے سامنے محبت کا اظہار کیا تو سیدنا عمر رضی اللہ عنہ نے اُس ( دنیا ) سے اعراض کیا ، وہ ( دنیا ) اُن کے سامنے آئی ، تو انہوں نے اس کو انکار کیا ، سیدنا عمر رضی اللہ عنہ نے دنیا کے بارے میں پرہیزگاری کو اختیار کیا ، اور پھر اُسے اُسی حالت میں چھوڑا ، جس حالت میں وہ اُس ( دنیا ) کے ساتھ رہے تھے ۔ تو اب تم لوگ مجھے بتاؤ ! کہ تم کیا کہتے ہو ؟ تمہیں میرے والد کے دودنوں میں سے کون سے دن پر اعتراض ہے ؟ ان کے مقیم رہنے والے دن پر اعتراض ہے ؟ کہ جب انہوں نے تمہارے درمیان عدل سے کام لیا ، یا ان کی روانگی کے دن پر اعتراض ہے کہ جب انہوں نے تمہارے لئے سوچ بچار کی ؟ ( پھر سیدہ عائشہ رضی اللہ عنہا نے فرمایا : ) میں نے اپنی بات کہہ دی ہے ، اور میں اپنے لیے اور تمہارے لئے اللہ تعالیٰ سے مغفرت طلب کرتی ہوں ۔
یہ روایت امام طبرانی نے نقل کی ہے ، أحمد سدوی نامی راوی نے ، سیدہ عائشہ رضی اللہ عنہا کا زمانہ نہیں پایا ہے ، میں اُس سے اور اس کے بیٹے سے واقف نہیں ہوں ۔

سیدہ عائشہ صدیقہ رضی اللہ عنہا بیان کرتی ہیں : جب نبی اکرم صلی اللہ علیہ وسلم کا وصال ہوا ، تو عرب مرتد ہو گئے اور نفاق بلند ہو گیا ، میرے والد کو ایسی صورتحال کا سامنا کرنا پڑا کہ اگر وہ صورتحال مضبوط پہاڑوں پر نازل ہوتی ، تو انہیں بھی توڑ کے رکھ دیتی ۔ سیدہ عائشہ رضی اللہ عنہا بیان کرتی ہیں : لوگوں نے جس بھی نقطہ کے بارے میں خلل کا اظہار کیا ، تو میرے والد اس کے تمام تر لوازمات کو لے کر وہاں تک پہنچے ، جن کے ذریعے اسے ٹھیک کیا جا سکے ۔ پھر سیدہ عائشہ رضی اللہ عنہا نے سیدنا عمر بن خطاب رضی اللہ عنہ کا ذکر کرتے ہوئے یہ بات کہی : اللہ کی قسم ! وہ بڑی ہمت والے تھے ، اور بے مثل شخصیت کے مالک تھے ، انہوں نے تمام امور کے لیے مناسب تیاری کی ۔ یہاں ریاشی نامی راوی نے یہ بات کہی ہے : جب کوئی شخص ایسا ماہر ہو کہ کسی کو اُس کے مشابہ قرار نہ دیا جا سکے ، تو اس کے یہ لفظ استعمال کیے جاتے ہیں : ” نسیج وحده - عییر وحده - جحیش وحده ۔ “ کسی شاعر نے کہا: ہے : ” وہ سواری اس شخص کو لے کر آئی ، جس شخص نے اپنی چادر لپیٹی ہوئی تھی اور وہ سواری چھوٹی پیشانی والی تھی ، وہ سواری تیزی سے ایک بے مثال شخص کو لے کر آئی ، وہ پتھر کو رگڑ کر ، قیس کو آگ لگانے کی کوشش کرتا ہے ، اور جو بھی سورما اُس کے سامنے آتا ہے ، وہ اسے سرنگوں کر لیتا ہے ۔ “ راوی بیان کرتے ہیں : یعنی وہ اس پر غالب آ جاتا ہے ۔ ریاشی بیان کرتے ہیں : اصمعی نے مجھے یہ اشعار سنائے : ” اس نیند کا کیا معاملہ ہے ؟ جو مجھ پر طاری ہو رہی ہے ، میں اُسے اپنے سے پرے کرنے کی کوشش کرتا ہوں اور وہ مجھ پر غالب آ رہی ہے ۔ “
یہ روایت امام طبرانی نے معجم صغیر اور معجم اوسط میں مختلف طرق کے ساتھ نقل کی ہے ، جن میں سے ایک کے رجال ثقہ ہیں ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم نے سیدنا ابوبکر رضی اللہ عنہ کو امیر الحج مقرر کیا ، پھر آپ نے برأت ( لاتعلقی ) کا اعلان دے کر سیدنا علی رضی اللہ عنہ کو بھیجا ، سیدنا ابوبکر رضی اللہ عنہ نے عرض کی : یا رسول اللہ ! کیا آپ نے میرے خلاف کوئی چیز محسوس کی ؟ نبی اکرم صلی اللہ علیہ وسلم نے فرمایا : جی نہیں ، تم غار میں میرے ساتھی رہے ہو اور حوض پر بھی ہو گے ۔ “ ( علامہ ہیثمی فرماتے ہیں : ) میں یہ کہتا ہوں امام ترمذی نے ان صحابی کے حوالے سے ایک اور حدیث نقل کی ہے ، جو اس کے علاوہ ہے ، اور اس سے زیادہ طویل ہے ، اور اس روایت میں اضافہ پایا جاتا ہے ۔
یہ روایت امام بزار نے نقل کی ہے ، اور اس کے رجال ” صحیح “ کے رجال ہیں ۔

سیدنا ابوبکر صدیق رضی اللہ عنہ بیان کرتے ہیں : ( میں فتح مکہ کے دن ) سیدنا ابوقحافہ رضی اللہ عنہ کو لے کر نبی اکرم صلی اللہ علیہ وسلم کے پاس آیا ، تو نبی اکرم صلی اللہ علیہ وسلم نے ارشاد فرمایا : تم نے ان بزرگوار کو ( گھر میں ) کیوں نہیں رہنے دیا ، میں ان کے پاس چلا جاتا تو سیدنا ابوبکر رضی اللہ عنہ نے عرض کی : بلکہ یہ اس بات کے زیادہ حق دار ہیں کہ وہ آپ کی خدمت میں آئیں ، نبی اکرم صلی اللہ علیہ وسلم نے ارشاد فرمایا : ہم نے ان کا خیال رکھنا تھا ، کیونکہ ہمارے نزدیک ان کے صاحبزادے کی بڑی حیثیت ہے ۔
یہ روایت امام بزار نے نقل کی ہے ۔ اس کی سند میں ایک راوی عبداللہ بن عبدالملک فہری ہے ، اور میں اس سے واقف نہیں ہوں ۔ اس روایت کے بقیہ رجال ثقہ ہیں ، لیکن یہ روایت منقطع ہے ۔

عروہ بیان کرتے ہیں : سیدنا ابوبکر صدیق رضی اللہ عنہ نے سات ایسے افراد کو آزاد کروایا تھا جنہیں اللہ کی خاطر عذاب دیا جاتا تھا ان میں ایک سیدنا بلال رضی اللہ عنہ اور سیدنا عامر بن فہیرہ رضی اللہ عنہ ہیں ۔
یہ روایت امام طبرانی نے نقل کی ہے ، اور عروہ تک اس کے رجال ” صحیح “ کے رجال ہیں ۔

سیدنا عبداللہ بن زبیر رضی اللہ عنہما بیان کرتے ہیں : یہ آیت سیدنا ابوبکر صدیق رضی اللہ عنہ کے بارے میں نازل ہوئی تھی : ” اور کسی کا اس پر کوئی احسان نہیں ہے ، جس کا بدلہ دیا گیا ہو بلکہ اس نے یہ اپنے برتر پروردگار کی رضا کے حصول کے لئے کیا ہے ، اور وہ پروردگار عنقریب راضی ہو جائے گا ۔ “
یہ روایت امام طبرانی نے نقل کی ہے اس کی سند میں ایک راوی مصعب بن ثابت ہے ، جسے ابن حبان اور دیگر حضرات نے ثقہ قرار دیا ہے ، اور اس میں ضعف پایا جاتا ہے اس روایت کے بقیہ رجال ثقہ ہیں ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم نے ارشاد فرمایا : ” کسی کے مال نے ہمیں اتنا فائدہ نہیں دیا جتنا ابوبکر کے مال نے ہمیں فائدہ دیا ۔ “
یہ روایت امام ابویعلیٰ نے نقل کی ہے ، اور اس کے رجال ” صحیح “ کے رجال ہیں ، صرف اسحاق بن اسرائیل کا معاملہ مختلف ہے ، اور وہ ثقہ اور مامون ہے ۔

سیدہ عائشہ صدیقہ رضی اللہ عنہا واقعہ افک نقل کرتے ہوئے بیان کرتی ہیں : سیدنا حسان بن ثابت رضی اللہ عنہ نے اپنے آپ کو جھٹلاتے ہوئے یہ کہا: ” وہ پاکدامن ہیں ، کامل عقل رکھنے والی ہیں ، ان پر کسی مشکوک صورتحال کا الزام عائد نہیں کیا جا سکتا ، وہ ایسی حالت میں صبح کرتی ہیں کہ غافل لوگوں کے گوشت کے حوالے سے وہ بھوکی ہوتی ہیں ( یعنی وہ کسی کی غیبت نہیں کرتی ہیں ) میں اگرچہ پہلے ایسا فرد تھا ، کہ میں نے وہ بات کہی تھی ، جو تم لوگوں کا بیان تھا ، لیکن میری انگلی کے پوروں نے میری چھڑی کو بھی نہیں اُٹھایا ، لیکن اب یہ کیسے ہو سکتا ہے ؟ جبکہ یہ صورتحال ہے کہ جب تک میں زندہ رہا ، میری محبت اور میری مدد اللہ کے رسول صلی اللہ علیہ وسلم کی آل کے لئے ہو گی ، جو محفل کی زینت ہے ، کیا میں اس شخصیت کو برا کہوں گا ، جو اپنے شوہر ( یعنی نبی اکرم صلی اللہ علیہ وسلم ) کی نسبت سے ، اپنے والد ( یعنی سیدنا ابوبکر رضی اللہ عنہ ) کی نسبت سے ، اور خود ذاتی اعتبار سے سب لوگوں سے بہتر ہیں ، اگر میں ایسا کروں ( یعنی انہیں برا کہوں ) گا ، تو میں بری جگہ پر پڑاؤ کروں گا ۔ “
یہ روایت امام ابویعلیٰ نے ایک طویل حدیث کے ضمن میں نقل کی ہے ، اور اس کے رجال ” صحیح “ کے رجال ہیں ، صرف حوثرہ بن اشرس کا معاملہ مختلف ہے ، اور وہ ثقہ ہے ۔

موسیٰ بن عقبہ بیان کرتے ہیں : ایسے افراد کا پتہ نہیں چل سکا جن کی چار پشتوں نے نبی اکرم صلی اللہ علیہ وسلم کا زمانہ پایا ہو ( اور انہیں آپ کے صحابی ہونے کا شرف حاصل ہو ) البتہ ان چار حضرات کا معاملہ مختلف ہے ، سیدنا ابوقحافہ رضی اللہ عنہ سیدنا ابوبکر رضی اللہ عنہ سیدنا عبدالرحمن بن ابوبکر رضی اللہ عنہ اور سیدنا ابوعتیق رضی اللہ عنہ بن سیدنا عبدالرحمن رضی اللہ عنہ بن سیدنا ابوبکر رضی اللہ عنہ اور سیدنا ابوعتیق کا نام محمد تھا ۔
یہ روایت امام طبرانی نے نقل کی ہے ۔ اس کی سند میں ایک راوی محمد بن عبداللہ بن عبدالرحمن بن قاسم بن محمد ہے ، اور میں اس سے واقف نہیں ہوں ۔