مجمع الزوائد ومنبع الفوائد

سیدنا کعب بن مالک رضی اللہ عنہ بیان کرتے ہیں : جب ان کی معافی کا حکم نازل ہوا تو وہ نبی اکرم صلی اللہ علیہ وسلم کے پاس آئے اور انہوں نے نبی اکرم صلی اللہ علیہ وسلم کا ہاتھ پکڑ کر آپ کی دست بوسی کی ۔
یہ روایت امام طبرانی نے نقل کی ہے ۔ اس کی سند میں ایک راوی یحیی بن عبدالحمید حمانی ہے ، اور وہ ضعیف ہے ۔

یحیی بن حارث ذماری بیان کرتے ہیں : میری ملاقات سیدنا واثلہ بن اسقع رضی اللہ عنہ سے ہوئی تو میں نے کہا: آپ نے اپنے اس ہاتھ کے ذریعے نبی اکرم صلی اللہ علیہ وسلم کے دست اقدس پر بیعت کی تھی ؟ انہوں نے جواب دیا : جی ہاں ۔ تو میں نے کہا: آپ اپنا ہاتھ آگے بڑھائیں تاکہ میں اسے بوسہ دوں ۔ انہوں نے اپنا ہاتھ مجھے دیا تو میں نے اس کو بوسہ دیا ۔
یہ روایت امام طبرانی نے نقل کی ہے ۔ اس کی سند میں ایک راوی عبدالملک فزاری ہے ، اور میں اس سے واقف نہیں ہوں ۔ اس روایت کے بقیہ رجال ثقہ ہیں ۔

عبدالرحمن بن رزین سیدنا سلمہ بن اکوع رضی اللہ عنہ کے بارے میں نقل کرتے ہیں : انہوں نے فرمایا : میں نے اپنے اس ہاتھ کے ذریعے نبی اکرم صلی اللہ علیہ وسلم کی بیعت کی تھی ( راوی کہتے ہیں : ) تو ہم نے ان کے ہاتھ کو بوسہ دیا ، تو انہوں نے اس بات پر اعتراض نہیں کیا ۔
( علامہ ہیثمی فرماتے ہیں : ) میں یہ کہتا ہوں ” صحیح “ میں اس میں سے بیعت کرنے والا حصہ منقول ہے ۔
یہ روایت امام طبرانی نے معجم اوسط میں نقل کی ہے اور اس کے رجال ثقہ ہیں ۔

سیدنا عبداللہ بن عمر رضی اللہ عنہما کے بارے میں یہ بات منقول ہے کہ انہوں نے نبی اکرم صلی اللہ علیہ وسلم کے دست مبارک کو بوسہ دیا تھا ۔
یہ روایت امام ابویعلیٰ نے نقل کی ہے ۔ اس کی سند میں ایک راوی یزید بن ابوزیاد ہے اور وہ حدیث میں کمزور ہے ۔ اس حدیث کے بقیہ رجال صحیح کے رجال ہیں ۔