مجمع الزوائد ومنبع الفوائد

سیدنا عبداللہ بن عمر رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص سلام کرنے سے پہلے مانگے اسے جواب نہ دو ۔ “
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی ہارون بن محمد ابوطیب ہے اور وہ کذاب ہے ۔

سیدنا جابر رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” اس شخص کو اجازت نہ دو جو پہلے سلام نہیں کرتا ۔ “
( علامہ ہیثمی فرماتے ہیں : ) میں یہ کہتا ہوں ان صحابی کے حوالے سے ایک حدیث امام ترمذی نے نقل کی ہے ، جو اس سیاق کے بغیر ہے ۔
یہ روایت امام ابویعلیٰ نے نقل کی ہے ، اور اس کی سند میں ایسا راوی ہے ، جس سے میں واقف نہیں ہوں ۔

عبدالملک بن عطاء نے سیدنا ابوہریرہ رضی اللہ عنہ کے حوالے سے یہ بات نقل کی ہے ، جس کے بارے میں مجھے شک ہے ( نبی اکرم صلی اللہ علیہ وسلم نے ارشاد فرمایا ہے : ) ” اجازت مانگنے والے کو اجازت اس وقت تک نہ دی جائے ، جب تک وہ پہلے سلام نہ کرے ۔ “
یہ روایت امام طبرانی نے معجم اوسط میں نقل کی ہے ، اور اس کے رجال ثقہ ہیں ، البتہ عبدالملک نامی راوی کے سیدنا ابوہریرہ رضی اللہ عنہ سے سماع کے بارے میں ، میں نے کوئی روایت نہیں پائی ہے ۔ ابن حبان کہتے ہیں : اس نے یزید بن اصم سے روایات نقل کی ہیں ۔