مجمع الزوائد ومنبع الفوائد

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : عنقریب سیدنا مسیح عیسیٰ بن مریم علیہ السلام انصاف کرنے والے حکمران اور عادل امام ہونے کے طور پر نازل ہوں گے ، وہ خنزیر کو مار دیں گے ، صلیب کو توڑ دیں گے ، اس وقت دعوت ایک ہی ہو گی ، تم انہیں اللہ کے رسول کی طرف سے سلام کہنا ( یہاں ایک لفظ کے بارے میں راوی کو شک ہے ) میں ان کے ساتھ بات چیت کروں گا ، تو وہ میری بات کی تصدیق کریں گے ۔ راوی بیان کرتے ہیں : جب نبی اکرم صلی اللہ علیہ وسلم کی وفات کا وقت قریب آیا تو آپ نے فرمایا : انہیں میری طرف سے سلام پہنچا دینا ۔ “ ( علامہ ہیثمی فرماتے ہیں : ) میں یہ کہتا ہوں ” صحیح “ میں اس کا کچھ حصہ مذکور ہے ۔
یہ روایت امام أحمد نے نقل کی ہے ۔ اس کی سند میں ایک راوی کثیر بن زید ہے ، جسے امام أحمد اور ایک جماعت نے ثقہ قرار دیا ہے ، امام نسائی رحمہ اللہ اور دیگر حضرات نے اسے ضعیف کہا: ہے ۔ اس روایت کے بقیہ رجال ثقہ ہیں ۔

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” مجھے یہ امید ہے کہ اگر میری عمر طویل ہوئی تو میں سیدنا عیسیٰ بن مریم علیہ السلام سے ملاقات کروں گا لیکن اگر مجھے جلدی موت آ گئی تو تم میں سے جو شخص انہیں ملے وہ انہیں میری طرف سے سلام پہنچا دے ۔ “
یہ روایت امام أحمد نے دو اسناد کے ساتھ نقل کی ہے ، ایک مرفوع ہے ، اور وہ یہ والی ہے ، اور ایک موقوف ہے ، اور ان دونوں کے رجال صحیح کے رجال ہیں ۔