مجمع الزوائد ومنبع الفوائد

سیدنا ابوذر غفاری رضی اللہ عنہ فرماتے ہیں : میں دس مرتبہ یہ حلف اٹھاؤں کہ ابن صیاد ہی دجال ہے ، یہ میرے نزدیک اس سے زیادہ محبوب ہو گا کہ میں ایک مرتبہ یہ حلف اٹھاؤں کہ وہ دجال نہیں ہے ۔ انہوں نے یہ بات بھی بیان کی ہے ۔ نبی اکرم صلی اللہ علیہ وسلم نے ایک مرتبہ مجھے اس کی ماں کی طرف بھیجا اور فرمایا : تم اس عورت سے پوچھو کہ اسے کتنا عرصہ اس کا حمل رہا تھا ، راوی کہتے ہیں : میں اس عورت کے پاس آیا ، میں نے اس سے اس بارے میں دریافت کیا ، تو اس عورت نے بتایا : مجھے بارہ مہینے تک اس کا حمل رہا تھا ۔ سیدنا ابوذر غفاری رضی اللہ عنہ بیان کرتے ہیں : نبی اکرم صلی اللہ علیہ وسلم نے پھر مجھے اس عورت کی طرف بھیجا اور فرمایا : تم اس عورت سے دریافت کرنا کہ جب یہ پیدا ہوا تھا تو یہ چیخا کس طرح سے تھا ، راوی کہتے ہیں : میں دوبارہ اس کے پاس گیا ، میں نے اس عورت سے دریافت کیا ، تو اس نے بتایا : یہ یوں ( بلند آواز میں ) چیخا تھا جیسے ایک ماہ کا بچہ چیختا ہے ۔ سیدنا ابوزر غفاری رضی اللہ عنہ بیان کرتے ہیں : پھر بعد میں ایک مرتبہ نبی اکرم صلی اللہ علیہ وسلم نے ابن صیاد سے دریافت کیا : میں نے تمہارے لئے ایک بات دل میں سوچی ہے ۔ اس نے کہا: آپ نے مٹیالی بکری کی رسی اور دھویں کے بارے میں سوچا ہے ، راوی بیان کرتے ہیں : اس نے دھویں کے لئے لفظ دخان کہنا چاہا لیکن وہ نہیں کہہ سکا ، لیکن اس نے صرف ” دخ “ کہا: نبی اکرم صلی اللہ علیہ وسلم نے ارشاد فرمایا : تم پرے ہو جاؤ ! تم اپنی اوقات سے آگے نہیں جا سکو گے ۔
یہ روایت امام أحمد نے اور امام بزار نے نقل کی ہے ۔ انہوں نے یہ الفاظ نقل کے ہیں : نبی اکرم صلی اللہ علیہ وسلم نے فرمایا : میں نے تمہارے لئے ایک چیز سوچی ہے ، وہ کیا ہے ؟ امام طبرانی نے معجم اوسط میں یہ روایت نقل کی ہے امام أحمد کے رجال صحیح کے رجال ہیں صرف حارث بن جبیرہ کا معاملہ مختلف ہے ، اور وہ ثقہ ہے ۔

سیدنا جابر بن عبدالله رضی اللہ عنہما بیان کرتے ہیں : یہودیوں کی ایک عورت نے مدینہ منورہ میں ایک بچے جو جنم دیا جس کی ایک آنکھ خراب تھی ، وہ باہر کی طرف ابھری ہوئی تھی ، نبی اکرم صلی اللہ علیہ وسلم کو یہ اندیشہ ہوا کہ کہیں یہ دجال نہ ہو ، ایک مرتبہ آپ نے اس لڑکے کو چادر کے نیچے پایا ، اس بچے کی ماں نے اسے اطلاع دیدی اور بولی: اے اللہ کے بندے ! یہ سیدنا ابوالقاسم تشریف لائے ہیں ، نبی اکرم صلی اللہ علیہ وسلم اس کی طرف بڑھے تو وہ چادر میں سے نکل آیا ، نبی اکرم صلی اللہ علیہ وسلم نے فرمایا : اس عورت کو کیا ہوا ، اللہ تعالیٰ اسے برباد کرے ، اگر یہ اس کو رہنے دیتی تو معاملہ واضح ہو جاتا ، پھر نبی اکرم صلی اللہ علیہ وسلم نے دریافت کیا : اے ابن صیاد تم کیا دیکھتے ہو ، اس نے کہا: میں ایک حق چیز دیکھتا ہوں اور ایک باطل چیز دیکھتا ہوں اور پانی پر ایک تخت دیکھتا ہوں ، تو یہ معاملہ اس کے لئے الجھن کا باعث بن گیا ، نبی اکرم صلی اللہ علیہ وسلم نے دریافت کیا : کیا تم اس بات کی گواہی دیتے ہو کہ میں اللہ کا رسول ہوں ؟ اس نے دریافت کیا : کیا آپ اس بات کی گواہی دیتے ہیں کہ میں اللہ کا رسول ہوں ؟ نبی اکرم صلی اللہ علیہ وسلم نے ارشاد فرمایا : میں اللہ تعالیٰ اور اس کے ( حقیقی ) رسولوں پر ایمان رکھتا ہوں ، پھر نبی اکرم صلی اللہ علیہ وسلم تشریف لے گئے اور آپ نے اسے چھوڑ دیا ۔ پھر آپ دوسری مرتبہ اس کے پاس آئے ، تو آپ نے اس کو پایا کہ وہ کھجوروں کے باغ میں موجود تھا ، آپ نے اس کی طرف جانے کا قصد کیا ، لیکن اس کی ماں نے اسے بتا دیا اور بولی: اے اللہ کے بندے ! یہ ابوالقاسم تشریف لے آئے ہیں ، نبی اکرم صلی اللہ علیہ وسلم نے فرمایا : اس عورت کو کیا ہوا ہے ، اللہ تعالیٰ اسے برباد کرے اگر یہ اسے رہنے دیتی تو معاملہ واضح ہو جاتا ، نبی اکرم صلی اللہ علیہ وسلم یہ چاہتے تھے کہ اس کے کلام میں سے کوئی بات سن لیں اور آپ کو پتا چل جائے کہ کیا یہ وہی ہے یا نہیں ہے ؟ نبی اکرم صلی اللہ علیہ وسلم نے دریافت کیا : اے ابن صیاد تم کیا دیکھتے ہو ، اس ( ابن صیاد ) نے یہ دریافت کیا : کیا آپ اس بات کی گواہی دیتے ہیں کہ میں اللہ کا رسول ہوں ، تو نبی اکرم صلی اللہ علیہ وسلم نے فرمایا : میں اللہ اور اس کے ( سچے اور حقیقی ) رسولوں پر ایمان رکھتا ہوں ( راوی بیان کرتے ہیں : ) تو یہ معاملہ آپ کے لئے الجھن کا باعث بن گیا آپ نے اسے چھوڑا اور تشریف لے گئے ۔ پھر جب تیسری یا چوتھی مرتبہ آپ تشریف لائے ، تو آپ کے ساتھ سیدنا ابوبکر رضی اللہ عنہ اور سیدنا عمر رضی اللہ عنہ بھی تھے اور مہاجرین اور انصار سے تعلق رکھنے والے کچھ اور افراد تھے ، میں بھی نبی اکرم صلی اللہ علیہ وسلم کے ساتھ تھا ، نبی اکرم صلی اللہ علیہ وسلم ہم سے آگے جلدی چلے گئے ، آپ کو یہ توقع تھی کہ آپ اس کے کلام میں سے کوئی بات سن لیں گے ، لیکن آپ سے پہلے اس کی ماں نے اسے کہا: اے اللہ کے بندے ! یہ سیدنا ابوالقاسم تشریف لے آئے ہیں ، تو نبی اکرم صلی اللہ علیہ وسلم نے ارشاد فرمایا : اس عورت کو کیا ہوا ہے اللہ تعالیٰ اسے برباد کرے ، اگر یہ اسے ایسے ہی رہنے دیتی تو معاملہ واضح ہو جاتا ، نبی اکرم صلی اللہ علیہ وسلم نے دریافت کیا : اے ابن صیاد تم کیا دیکھتے ہو ؟ اس نے کہا: میں ایک حق چیز دیکھتا ہوں اور ایک باطل دیکھتا ہوں اور پانی پر ایک تخت دیکھتا ہوں ، نبی اکرم صلی اللہ علیہ وسلم نے دریافت کیا : کیا تم اس بات کی گواہی دیتے ہو کہ میں اللہ کا رسول ہوں ؟ اس نے کہا: کیا آپ اس بات کی گواہی دیتے ہیں کہ میں اللہ کا رسول ہوں ، نبی اکرم صلی اللہ علیہ وسلم نے فرمایا : میں اللہ تعالیٰ پر اور اس کے ( حقیقی اور سچے ) رسولوں پر ایمان رکھتا ہوں ، یہ معاملہ آپ کے لئے الجھن کا باعث بن گیا ، نبی اکرم صلی اللہ علیہ وسلم نے ارشاد فرمایا : اے ابن صیاد ! میں نے تمہارے لئے ایک بات سوچی ہے ۔ اس نے کہا: وہ دخ ( یعنی دھواں ہے ) نبی اکرم صلی اللہ علیہ وسلم نے فرمایا : تم پرے ہو جاؤ ، سیدنا عمر رضی اللہ عنہ نے عرض کی : یا رسول اللہ ! آپ مجھے اجازت دیجئے ( کہ میں اسے قتل کر دوں ) نبی اکرم صلی اللہ علیہ وسلم نے فرمایا : اگر تو یہ وہی ہوا ، تو پھر میں اس کا متعلقہ فرد نہیں ہوں ، کیونکہ اس کے متعلقہ فرد سیدنا عیسیٰ بن مریم علیہ السلام ہوں گے اور اگر یہ وہ ( یعنی دجال ) نہیں ہے ، تو تمہیں اس بات کا حق نہیں ہے کہ تم ذمیوں سے تعلق رکھنے والے کسی شخص کو قتل کرو ، راوی بیان کرتے ہیں : اس کے بعد نبی اکرم صلی اللہ علیہ وسلم مسلسل پریقین رہے کہ وہی دجال ہو گا ۔
یہ روایت امام أحمد نے نقل کی ہے ، اور اس کے رجال صحیح کے رجال ہیں ۔

سیدنا ابوطفیل رضی اللہ عنہ کے بارے میں یہ بات منقول ہے کہ ان سے دریافت کیا گیا کہ کیا آپ نے نبی اکرم صلی اللہ علیہ وسلم کو دیکھا ہے ؟ انہوں نے جواب دیا : جی ہاں ۔ ان سے دریافت کیا گیا : کیا آپ نے نبی اکرم صلی اللہ علیہ وسلم کے ساتھ بات چیت کی ہے ؟ انہوں نے جواب دیا : جی نہیں ، میں نے آپ کو دیکھا کہ آپ فلاں فلاں جگہ سے تشریف لے جا رہے تھے ، آپ کے ساتھ سیدنا عبداللہ بن مسعود رضی اللہ عنہ تھے اور آپ کے کچھ اصحاب تھے ، یہاں تک کہ آپ کشادہ گھر میں آئے ، آپ نے فرمایا : تم لوگ یہ دروازہ کھولو ، دروازہ کھولا گیا ، نبی اکرم صلی اللہ علیہ وسلم اندر داخل ہوئے ، آپ کے ساتھ میں بھی داخل ہوا ، وہاں گھر کے درمیان میں ایک چادر پڑی ہوئی تھی ، نبی اکرم صلی اللہ علیہ وسلم نے فرمایا : اس چادر کو اٹھاؤ ، لوگوں نے چادر کو اٹھایا تو اس کے نیچے ایک کانا لڑکا تھا ، جو اس چادر کے نیچے موجود تھا ، نبی اکرم صلی اللہ علیہ وسلم نے فرمایا : اے لڑکے اٹھ جاؤ ، نبی اکرم صلی اللہ علیہ وسلم نے فرمایا : اے لڑکے کیا تم اس بات کی گواہی دیتے ہو کہ میں اللہ کا رسول ہوں ؟ اس لڑکے نے کہا: کیا آپ اس بات کی گواہی دیتے ہیں کہ میں اللہ کا رسول ہوں ؟ نبی اکرم صلی اللہ علیہ وسلم نے دو مرتبہ یہ ارشاد فرمایا : تم لوگ اس کے شر سے اللہ کی پناہ مانگو ۔
یہ روایت امام أحمد اور امام طبرانی نے نقل کی ہے ۔ اس کی سند میں ایک راوی مہدی بن عمران ہے امام بخاری رحمہ اللہ کہتے ہیں : اس کی نقل کردہ حدیث میں اس کی متابعت نہیں کی گئی ۔

سیدنا زید بن حارثہ بیان کرتے ہیں : نبی اکرم صلی اللہ علیہ وسلم نے اپنے بعض اصحاب سے فرمایا چلو پھر نبی اکرم صلی اللہ علیہ وسلم تشریف لے گئے ، آپ کے ساتھ آپ کے اصحاب تھے ، یہاں تک کہ یہ لوگ ایک طویل راستے میں دو باغوں کے درمیان جگہ پر داخل ہوئے ، جب یہ لوگ گھر تک پہنچے تو وہاں ایک عورت بیٹھی ہوئی تھی اور اس کے پاس ایک بڑا مشکیزہ تھا جو پانی سے بھرا ہوا تھا ، نبی اکرم صلی اللہ علیہ وسلم نے ارشاد فرمایا : میں مشکیزہ دیکھ رہا ہوں لیکن مجھے اس کا اٹھانے والا نظر نہیں آ رہا ، تو اس عورت نے گھر کے کونے میں موجود ایک چادر کی طرف اشارہ کیا ، وہ لوگ اٹھ کر اس چادر کی طرف گئے ، انہوں نے اس چادر کو ہٹایا تو اس کے نیچے ایک انسان موجود تھا ، اس نے اپنا سر اٹھایا ، تو نبی اکرم صلی اللہ علیہ وسلم نے ارشاد فرمایا : یہ چہرے قبیح ہو جائیں ، اس نے کہا: اے سیدنا محمد ( صلی اللہ علیہ وسلم ) آپ میرے بارے میں کیوں سختی سے بات کر رہے ہیں ؟ نبی اکرم صلی اللہ علیہ وسلم نے فرمایا : میں نے تمہارے لئے ایک چیز سوچی ہے ، تم مجھے بتاؤ کہ وہ کیا ہے ؟ نبی اکرم صلی اللہ علیہ وسلم نے اس کے لئے سورت دخان سوچی تھی ، تو اس نے کہا: دخ ۔ نبی اکرم صلی اللہ علیہ وسلم نے فرمایا : تم پرے ہو جاؤ ، اللہ تعالیٰ نے جو چاہا وہ ہو کے رہے گا ، پھر آپ تشریف لے گئے ۔
یہ روایت امام بزار نے نقل کی ہے اور امام طبرانی نے معجم کبیر اور معجم اوسط میں نقل کی ہے ۔ اس کی سند میں ایک راوی زیاد بن حسن بن فرات ہے ، جسے ابوحاتم نے ضعیف قرار دیا ہے ، اور ابن حبان نے اُسے ثقہ کہا: ہے ۔

سیدنا زید بن حارثہ رضی اللہ عنہ سے روایت ہے ، وہ بیان کرتے ہیں کہ : نبی اکرم صلی اللہ علیہ وسلم نے اپنے بعض صحابہ سے فرمایا : ” چلو ! “ ، چنانچہ رسول اللہ صلی اللہ علیہ وسلم اور آپ کے صحابہ ساتھ چل پڑے ، یہاں تک کہ وہ ایک طویل گلی میں دو دیواروں (باغوں) کے درمیان داخل ہوئے ۔ جب وہ ایک مکان کے پاس پہنچے تو وہاں ایک عورت بیٹھی تھی اور پانی سے بھری ہوئی ایک چھوٹی مشک رکھی تھی ۔ نبی اکرم صلی اللہ علیہ وسلم نے فرمایا :” مجھے مشک تو نظر آ رہی ہے لیکن اسے اٹھانے والا (لانے والا) نظر نہیں آ رہا “ ۔ اس عورت نے گھر کے ایک کونے میں رکھی چادر (یا کمبل) کی طرف اشارہ کیا ۔ صحابہ نے جا کر وہ چادر ہٹائی تو اس کے نیچے ایک انسان (ابنِ صیاد) تھا ، اس نے اپنا سر اٹھایا تو نبی اکرم صلی اللہ علیہ وسلم نے فرمایا :” چہرے بگڑ جائیں (تم پر لعنت ہو) “ ۔ اس نے کہا: اے محمد ! آپ مجھے برا بھلا کیوں کہہ رہے ہیں ؟ نبی اکرم صلی اللہ علیہ وسلم نے فرمایا : ” میں نے اپنے دل میں (امتحان کے لیے ) تیرے سامنے ایک بات چھپائی ہے ، مجھے بتاؤ وہ کیا ہے ؟ “ - اور نبی اکرم صلی اللہ علیہ وسلم نے اس کے لیے سورۃ الدخان (کا تصور یا آیت) چھپا رکھی تھی - تو اس نے (ادھورا لفظ) کہا: ” دُخ “ (یعنی دھواں) ۔ اس پر آپ صلی اللہ علیہ وسلم نے فرمایا :” ذلیل و خوار پڑا رہ ! جو اللہ چاہے وہی ہوتا ہے “۔ پھر آپ صلی اللہ علیہ وسلم وہاں سے واپس لوٹ آئے ۔
اسے امام بزار رحمہ اللہ نے اور امام طبرانی رحمہ اللہ نے المعجم الکبیر اور المعجم الاوسط میں روایت کیا ہے ، اور اس کی سند میں زیاد بن حسن بن فرات نامی راوی ہے ، جسے امام ابوحاتم رحمہ اللہ نے ضعیف قرار دیا ہے جبکہ امام ابن حبان رحمہ اللہ نے اس کی توثیق کی ہے ۔

سیدنا ابوسعید خدری رضی اللہ عنہ بیان کرتے ہیں : نبی اکرم صلی اللہ علیہ وسلم نے ابن صیاد سے فرمایا : تم کیا دیکھتے ہو ، اس نے کہا: میں سمندر پر ایک تخت دیکھتا ہوں جس کے اردگرد سانپ ہیں ، نبی اکرم صلی اللہ علیہ وسلم نے فرمایا : میرا خیال ہے وہ شیطان کا تخت ہو گا ۔
یہ روایت امام أحمد نے نقل کی ہے ۔ اس کی سند میں ایک راوی علی بن زید ہے ، اور وہ حسن الحدیث ہے ۔ اس روایت کے بقیہ رجال ثقہ ہیں ۔

ان کے حوالے سے یہ بات منقول ہے ۔ وہ بیان کرتے ہیں : نبی اکرم صلی اللہ علیہ وسلم کے سامنے ابن صیاد کا ذکر کیا گیا تو سیدنا عمر رضی اللہ عنہ نے عرض کی : اس کا یہ کہنا ہے کہ وہ جس بھی چیز کے پاس سے گزرتا ہے وہ چیز اس کے ساتھ بات چیت کرتی ہے ۔
یہ روایت امام أحمد نے نقل کی ہے ۔ اس کی سند میں ایک راوی مجالد بن سعید ہے اور وہ ضعیف ہے ، ویسے اس کی توثیق کی گئی ہے ۔ اس روایت کے بقیہ رجال ثقہ ہیں ۔

سیدنا عبداللہ بن مسعود رضی اللہ عنہ بیان کرتے ہیں : میں نو مرتبہ اللہ کے نام کا حلف اٹھاؤں اس بات پر کہ ابن صیاد ہی دجال ہے ، یہ میرے نزدیک اس سے زیادہ محبوب ہو گا کہ میں ایک مرتبہ یہ حلف اٹھاؤں کہ وہ دجال نہیں ہے ، اور میں نو مرتبہ یہ حلف اٹھاؤں کہ نبی اکرم صلی اللہ علیہ وسلم کو شہید ہونے کے طور پر قتل کیا گیا ، یہ میرے نزدیک اس سے زیادہ محبوب ہو گا کہ میں ایک مرتبہ یہ حلف اٹھاؤں کہ نبی اکرم صلی اللہ علیہ وسلم کو قتل نہیں کیا گیا ، اس کی وجہ یہ ہے کہ اللہ تعالیٰ نے آپ کو نبی بھی بنایا تھا اور آپ کو شہادت کے مرتبے پر بھی فائز کیا ۔
یہ روایت امام طبرانی نے نقل کی ہے اور امام ابویعلیٰ نے اس کی مانند روایت اختصار کے ساتھ نقل کی ہے ، امام ابویعلیٰ کے رجال صحیح کے رجال ہیں ۔

سیدنا امام حسین بن علی رضی اللہ عنہما بیان کرتے ہیں : نبی اکرم صلی اللہ علیہ وسلم نے ابن صیاد کے لئے ایک چیز دل میں سوچی اور اس سے اس چیز کے بارے میں دریافت کیا : جو آپ نے اس کے بارے میں سوچی تھی ، تو اس نے کہا: دخ ، نبی اکرم صلی اللہ علیہ وسلم نے فرمایا : تم پرے ہو جاؤ تم اپنی اوقات سے آگے نہیں جا سکو گے ، پھر نبی اکرم صلی اللہ علیہ وسلم واپس تشریف لے گئے ، نبی اکرم صلی اللہ علیہ وسلم نے دریافت کیا : اس نے کیا کہا: تھا ؟ کسی نے کہا: اس نے وخ کہا: تھا ، کسی نے کہا: بلکہ دخ کہا: تھا ، نبی اکرم صلی اللہ علیہ وسلم نے فرمایا : میں تمہارے درمیان موجود ہوں اور پھر بھی تم اختلاف کا شکار ہو گئے ، تو میرے بعد تو تم لوگ زیادہ شدید اختلاف کا شکار ہو گے ۔
یہ روایت امام طبرانی نے دو اسناد کے ساتھ نقل کی ہے جن میں سے ایک کے رجال صحیح کے رجال ہیں ۔

سیدنا مغیرہ بن شعبہ رضی اللہ عنہ بیان کرتے ہیں : نبی اکرم صلی اللہ علیہ وسلم سے دجال کے بارے میں جتنا میں نے دریافت کیا ہے : اس سے زیادہ کسی اور نے دریافت نہیں کیا ، نبی اکرم صلی اللہ علیہ وسلم نے ارشاد فرمایا : تم اس کا کیا کرو گے ، وہ تمہیں نقصان نہیں پہنچا پائے گا ، میں نے عرض کی : کیا میں ابن صیاد کو قتل نہ کر دوں ؟ نبی اکرم صلی اللہ علیہ وسلم نے فرمایا : تم اسے قتل کر کے کیا کرو گے ، اگر تو وہ دجال ہوا تو تم اسے قتل نہیں کر پاؤ گے ، اور اگر وہ دجال نہ ہوا تو پھر تم اس کا کیا کرو گے ۔ “ ( علامہ ہیثمی فرماتے ہیں : ) میں یہ کہتا ہوں
یہ روایت ” صحیح “ میں مذکور ہے ۔ اس میں ابن صیاد کے قتل والا واقعہ نہیں ہے ۔
یہ روایت امام طبرانی نے نقل کی ہے اور اس کے رجال صحیح کے رجال ہیں ، صرف جہور بن منصور کا معاملہ مختلف ہے ، اور وہ ثقہ ہے ۔