مجمع الزوائد ومنبع الفوائد

ابن حرملہ یہ خالد بن عبداللہ بن حرملہ ہیں وہ اپنی پھوپھی کا یہ بیان نقل کرتے ہیں : نبی اکرم صلی اللہ علیہ وسلم نے خطبہ دیا آپ صلی اللہ علیہ وسلم نے بچھو کے ڈنک مارنے کی وجہ سے اپنے سر پر پٹی باندھی ہوئی تھی ، آپ صلی اللہ علیہ وسلم نے ارشاد فرمایا : ” تم لوگ یہ کہتے ہو کہ دشمن نہیں رہا ، تم لوگ مسلسل دشمن کے ساتھ جنگ کرتے رہو گے ، یہاں تک کہ یاجوج ماجوج آ جائیں گے ، جن کے چہرے چوڑے ہوں گے ، آنکھیں چھوٹی ہوں گی ، ان کا رنگ سیاہی مائل سرخ ہو گا ، وہ ہر ایک بلندی سے تیزی سے چلتے ہوئے نیچے کی طرف آئیں گے ، اور ان کے چہرے تہہ والی ڈھالوں کی مانند ہوں گے ۔ “
یہ روایت امام أحمد اور امام طبرانی نے نقل کی ہے ، اور ان دونوں کے رجال صحیح کے رجال ہیں ۔

سیدنا عبداللہ بن عمرو رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” یاجوج ماجوج سیدنا آدم علیہ السلام کی اولاد میں سے ہوں گے ، اگر انہیں چھوڑ دیا جائے تو وہ لوگوں کی زندگی خراب کر دیں ، ان میں سے کوئی شخص اس وقت تک نہیں مرے گا ، جب تک وہ اپنی اولاد میں سے ایک ہزار سے زیادہ ذریت کو نہیں چھوڑے گا ، اور ان کے بعد تین امتیں ہوں گی ، تاویل ، تاریس اور منسک ۔ “
یہ روایت امام طبرانی نے معجم کبیر اور معجم اوسط میں نقل کی ہے اور اس کے رجال ثقہ ہیں ۔

سیدنا حذیفہ بن یمان رضی اللہ عنہ بیان کرتے ہیں : میں نے نبی اکرم صلی اللہ علیہ وسلم سے یاجوج ماجوج کے بارے میں دریافت کیا تو آپ نے ارشاد فرمایا : ” یاجوج ایک امت ہے اور ماجوج ایک امت ہے ، ان میں سے ہر ایک امت چار لاکھ امتوں پر مشتمل ہے ، اور ان میں سے کوئی بھی شخص اس وقت تک نہیں مرے گا ، جب تک وہ اپنی اولاد ( اور اولاد کی اولاد ) میں سے اپنے آگے ایک ہزار مذکر افراد کو نہیں دیکھ لے گا ، جن میں سے ہر ایک نے ہتھیار اٹھایا ہوا ہو گا ، میں نے عرض کی : یا رسول اللہ ! ان کا حلیہ ہمارے سامنے بیان کریں ، نبی اکرم صلی اللہ علیہ وسلم نے ارشاد فرمایا : وہ تین قسم کے ہوں گے ، ایک قسم وہ ہو گی جو صنوبر کے درخت کی مانند ہوں گے ، میں نے دریافت کیا : ارز سے مراد کیا ہے ؟ آپ نے فرمایا : شام میں موجود ایک درخت ہے ۔ اس درخت کی لمبائی ایک سو بیس ذراع ( کہنی سے درمیانی سب سے بڑی انگلی کے کنارے تک کی مقدار ) ہے ۔ نبی اکرم صلی اللہ علیہ وسلم نے ارشاد فرمایا : یہ وہ لوگ ہیں کہ جن کے سامنے کوئی گھوڑا یا ہتھیار قائم نہیں رہ سکتا ، ان میں سے ایک گروہ وہ ہو گا جو ایک کان کو بطور فرش بچھائے گا ، اور دوسرے کو لحاف کے طور پر لپیٹ لے گا ۔ وہ لوگ جس بھی ہاتھی یا اونٹ یا خنزیر کے پاس سے گزریں گے اسے کھا جائیں گے ، یہاں تک کہ ان میں سے جو شخص مرے گا ، وہ اس کو بھی کھا جائیں گے ، ان کا پہلا حصہ شام میں ہو گا ، اور ہانک کر لے جانے والا خراسان میں ہو گا ، وہ مشرق کی نہروں کو پی جائیں گے اور بحیرہ طبریہ کو پی جائیں گے ۔ “
یہ روایت امام طبرانی نے معجم اوسط میں نقل کی ہے ، جس کی سند میں ایک راوی یحیی بن سعید عطار ہے ، اور وہ ضعیف ہے ۔