مجمع الزوائد ومنبع الفوائد

سیدنا ابودرداء رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” اللہ تعالیٰ ہر بندے کے حوالے سے ، پانچ چیزوں سے فارغ ہو چکا ہے ، اس کی موت کا مخصوص وقت ، اس کا رزق ، اس کی زندگی ، اس کے مرنے کا مقام اور اس کا بدنصیب یا خوش نصیب ہونا“ ۔ ایک روایت میں یہ الفاظ ہیں : ” اور اس کا عمل ۔ “
یہ روایت امام أحمد اور امام بزار نے ، امام طبرانی نے معجم کبیر اور معجم اوسط میں نقل کی ہے ، امام أحمد کی دو اسناد میں سے ایک کے رجال ثقہ ہیں ۔

سیدنا عبداللہ بن مسعود رضی اللہ عنہ فرماتے ہیں : چار چیزوں کے حوالے سے فارغ ہوا جا چکا ہے ، ظاہری شکل و صورت ، اخلاق ، رزق اور موت ، کوئی شخص کسی دوسرے کے بہ نسبت زیادہ نہیں کمائے گا ۔ وہ یہ فرماتے ہیں : صدقہ جائز ہے ، خواہ اسے قبضے میں لیا گیا ہو ، یا قبضے میں نہ لیا گیا ہو ۔
یہ روایت امام طبرانی نے نقل کی ہے ، اس کی سند میں ایک راوی عیسیٰ بن مسیب ہے ، جسے امام حاکم رحمہ اللہ نے اور امام دارقطنی رحمہ اللہ نے ” سنن “ میں ثقہ قرار دیا ہے ، جبکہ ایک جماعت نے اسے ضعیف کہا: ہے ، اس روایت کے بقیہ رجال ، جو دو اسناد میں سے ایک کے رجال ہیں ، وہ ثقہ ہیں ۔

سیدنا عبداللہ بن مسعود رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” انسان کی چار چیزوں کے حوالے سے فارغ ہوا جا چکا ہے ، ظاہری شکل و صورت ، اخلاق ، رزق اور موت ۔ “
یہ روایت امام طبرانی نے معجم اوسط میں نقل کی ہے ، اس کی سند میں ایک راوی عیسیٰ بن مسیب بجلی ہے اور وہ جمہور کے نزدیک ضعیف ہے ، امام حاکم رحمہ اللہ نے اور امام دارقطنی رحمہ اللہ نے اپنی ” سنن “ میں اسے ثقہ قرار دیا ہے ، جبکہ دیگر کتابوں میں انہوں نے اسے ضعیف قرار دیا ہے ۔

سیدنا ابودرداء رضی اللہ عنہ بیان کرتے ہیں : نبی اکرم صلی اللہ علیہ وسلم کے سامنے عمر میں اضافے کا ذکر کیا گیا ، تو نبی اکرم صلی اللہ علیہ وسلم نے ارشاد فرمایا : ” جب کسی جان کا مخصوص وقت آ جائے ، تو اللہ تعالیٰ اُسے مؤخر نہیں کرتا ہے “ اس کے بعد راوی نے پوری حدیث ذکر کی ہے ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی سلیمان بن عطاء ہے اور وہ ضعیف ہے ۔