مجمع الزوائد ومنبع الفوائد

سیدہ عائشہ صدیقہ رضی اللہ عنہا نبی اکرم صلی اللہ علیہ وسلم کا یہ فرمان نقل کرتی ہیں : ” میرے بعد نبوت میں سے صرف مبشرات باقی رہ گئے ہیں ، لوگوں نے عرض کی : یا رسول اللہ ! مبشرات کیا ہیں ؟ نبی اکرم صلی اللہ علیہ وسلم نے ارشاد فرمایا : ” وہ نیک خواب ، جنہیں کوئی بندہ دیکھتا ہے ( راوی کو شک ہے ، شاید یہ الفاظ ہیں : ) جو اُسے دکھائی دیتے ہیں “ ۔ امام أحمد کے رجال صحیح کے رجال ہیں ۔
یہ روایت امام أحمد اور امام بزار نے نقل کی ہے تاہم انہوں نے یہ الفاظ نقل کیے ہیں : ” انہیں نیک آدمی دیکھتا ہے “ ۔

سیدنا عبداللہ بن عباس رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” نیک خواب ، نبوت کے ستر اجزاء میں سے ایک جزء ہیں “ ۔
یہ روایت امام أحمد ، امام ابویعلیٰ ، امام بزار اور امام طبرانی نے نقل کی ہے اور اس کے رجال صحیح کے رجال ہیں ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” نیک خواب ، نبوت کا چھیالیسواں جزء ہیں “ ۔
یہ روایت امام ابویعلیٰ اور امام طبرانی نے نقل کی ہے اور اس کے رجال صحیح کے رجال ہیں ۔

سلیمان بن عریب ، سیدنا ابوہریرہ رضی اللہ عنہ کا یہ بیان نقل کرتے ہیں : نبی اکرم صلی اللہ علیہ وسلم نے ارشاد فرمایا : ” مومن شخص کے خواب ، اللہ تعالیٰ کی طرف سے خوشخبری ہوتے ہیں اور یہ نبوت کا چھیالیسواں جزء ہیں “ ۔ راوی بیان کرتے ہیں : میں نے سیدنا عبداللہ بن عباس رضی اللہ عنہما کو یہ حدیث بیان کی ، تو سیدنا عبداللہ بن عباس رضی اللہ عنہما نے فرمایا : سیدنا ء اس بن عبدالمطلب رضی اللہ عنہ نے یہ بات بیان کی ہے کہ نبی اکرم صلی اللہ علیہ وسلم نے ارشاد فرمایا ہے : ” نبوت کے پچاس اجزاء ، میں سے ایک ہیں ( یعنی پچاسواں جزء ہیں ) “ ۔
( علامہ ہیثمی فرماتے ہیں : ) میں یہ کہتا ہوں : سیدنا ابوہریرہ رضی اللہ عنہ سے منقول حدیث ” صحیح “ میں مذکور ہے اور اس میں سیدنا عباس رضی اللہ عنہ سے منقول حدیث کا ذکر نہیں ہے ۔
یہ روایت امام بزار نے نقل کی ہے امام طبرانی نے معجم اوسط اور معجم کبیر میں نقل کی ہے امام ابویعلیٰ نے اسے مرفوع حدیث کے طور پر نقل کیا ہے ، تاہم انہوں نے ” ساٹھویں جزء “ کے الفاظ نقل کیے ہیں ، اس روایت کی سند میں ایک راوی ابن اسحاق ہے اور وہ مدلس ہے ، اس روایت کے بقیہ رجال ثقہ ہیں ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جس نے مجھے خواب میں دیکھا ، اُس نے مجھے ہی دیکھا ، کیونکہ شیطان میری شکل اختیار نہیں کر سکتا ہے “ ۔ ابن فضیل نامی راوی نے ، ایک مرتبہ یہ الفاظ نقل کیے ہیں : ” وہ میری صورت اختیار نہیں کر سکتا ہے “ ۔ ” اور مومن بندے کا وہ خواب ، جو سچا اور نیک ہو ، وہ نبوت کا سترواں جزء ہے “ ۔ ( علامہ ہیثمی فرماتے ہیں : ) میں یہ کہتا ہوں :
یہ روایت ” صحیح “ میں مذکور ہے ، تاہم اس میں یہ الفاظ نہیں ہیں : ” سترواں جزء “ ۔
یہ روایت امام أحمد نے نقل کی ہے ، اس کی سند میں ایک راوی کلیب بن شہاب ہے اور وہ ثقہ ہے ، اس کے بارے میں ایسا کلام کیا گیا ہے ، جو نقصان دہ نہیں ہے ۔

سیدنا جابر رضی اللہ عنہ بیان کرتے ہیں : انہوں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” مومن شخص کا خواب “ نبوت کا ایک جزء ہے “ ۔
یہ روایت امام أحمد نے نقل کی ہے ، اس کی سند میں ایک راوی ابن لہیعہ ہے ، اس کی نقل کردہ حدیث حسن ہے ، اس میں ضعف پایا جاتا ہے ۔

سیدنا ابوطفیل رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” میرے بعد نبوت نہیں ہے ، صرف مبشرات ہوں گے ، لوگوں نے عرض کی : یا رسول اللہ ! مبشرات سے مراد کیا ہے ؟ نبی اکرم صلی اللہ علیہ وسلم نے فرمایا : اچھے خواب ( راوی کو شک ہے ، شاید یہ الفاظ ہیں : ) نیک خواب “ ۔
یہ روایت امام أحمد اور امام طبرانی نے نقل کی ہے اور اس کے رجال ثقہ ہیں ۔

سیدنا حذیفہ بن اسید رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” نبوت رخصت ہو گئی ، میرے بعد نبوت نہیں ہے ، صرف مبشرات ہوں گے ، عرض کی گئی : مبشرات سے مراد کیا ہے ؟ نبی اکرم صلی اللہ علیہ وسلم نے ارشاد فرمایا : ” وہ نیک خواب ، جنہیں آدمی دیکھتا ہے ( راوی کو شک ہے ، شاید یہ الفاظ ہیں : ) جو اُسے دکھائے جاتے ہیں“ ۔
یہ روایت امام طبرانی نے اور امام بزار نے نقل کی ہے ، امام طبرانی کے رجال ثقہ ہیں ۔

سیدنا سمرہ رضی اللہ عنہ بیان کرتے ہیں : نبی اکرم صلی اللہ علیہ وسلم ہم سے یہ فرماتے تھے : ” ابوبکر خوابوں کی تعبیر کر لیتا ہے ، اور نیک خواب ، نبوت کا ایک حصہ ہیں “ ۔
یہ روایت امام طبرانی اور امام بزار نے نقل کی ہے ، تاہم انہوں نے یہ الفاظ نقل کیے ہیں : ” وہ خوابوں کی تاویل کر لیتا ہے “ ۔ امام طبرانی کی سند میں ایسا راوی ہے ، جس سے میں واقف نہیں ہوں ، امام بزار کی سند ساقط ہے ۔

سیدنا عبداللہ بن مسعود رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” سچے خواب ( راوی کو شک ہے ، شاید یہ الفاظ ہیں : ) نیک خواب ، نبوت کے 76 اجزاء میں سے ایک جزء ہیں “ ۔
یہ روایت امام طبرانی نے معجم کبیر اور معجم صغیر میں نقل کی ہے اور انہوں نے اس میں یہ الفاظ نقل کیے ہیں : ” 70 اجزاء میں سے ایک جزء ہیں “ ۔
یہ روایت امام بزار نے بھی نقل کی ہے ، معجم صغیر کے رجال صحیح کے رجال ہیں ۔

سیدنا عبداللہ بن مسعود رضی اللہ عنہ بیان کرتے ہیں : نیک خواب ، نبوت کے ستر اجزاء میں سے ایک جزء ہیں ، اور سموم “ وہ چیز ہے ، جس کے ذریعے جنات کو پیدا کیا گیا ، یہ جہنم کے ستر اجزاء میں سے ایک جزء ہے اور تمہاری یہ ( دنیاوی ) آگ ، جہنم کی آگ کا سترواں حصہ ہے “ ۔
یہ روایت امام طبرانی نے اپنے استاد عبداللہ بن محمد بن سعید بن ابومریم کے حوالے سے نقل کی ہے اور وہ ضعیف ہے ۔ اس روایت کے مختلف طرق ہیں ، جو اس سے پہلے مساجد کی طرف پیدل چل کر جانے اور ایک نماز کے بعد دوسری نماز کا انتظار کرنے سے متعلق باب میں گزر چکے ہیں ۔

سیدنا انس بن مالک رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” مومن کا خواب ، نبوت کے ستر اجزاء میں سے ایک جزء ہے “ ۔
یہ روایت امام طبرانی نے معجم اوسط میں نقل کی ہے اس کی سند میں ایک راوی محمد بن عبیداللہ عرزمی ہے اور وہ ضعیف ہے ۔

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” مومن بندے کا خواب ، نبوت کے چالیس اجزاء میں سے ایک جزء ہے “ ۔ ( علامہ ہیثمی فرماتے ہیں : ) میں یہ کہتا ہوں : ان صحابی کے حوالے سے ” صحیح “ میں یہ حدیث مذکور ہے : ” چھیالیس “ یا پینتالیس ( اجزاء میں سے ایک جزء ہے ) “ ۔
یہ روایت امام بزار نے نقل کی ہے ، اس کی سند میں ایک راوی عبداللہ بن عیسیٰ خزاز ہے اور وہ ضعیف ہے ۔

سیدنا عوف بن مالک رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” مومن کا خواب ، نبوت کے چھیالیس اجزاء میں سے ایک جزء ہے “ ۔
یہ روایت امام بزار نے نقل کی ہے ، اس کی سند میں ایک راوی یزید بن ابویزید ہے ، جو بسر بن ارطاۃ کا غلام ہے ، میں اس سے واقف نہیں ہوں ، اس روایت کے بقیہ رجال صحیح کے رجال ہیں ۔

سیدنا عبادہ بن صامت رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” مومن کا خواب ایسا کلام ہے ، جس کے ذریعے اُس کا پروردگار خواب میں بندے کے ساتھ کلام کرتا ہے “ ۔
یہ روایت امام طبرانی نے نقل کی ہے اور اس کی سند میں ایسا راوی ہے ، جس سے میں واقف نہیں ہوں ۔ آگے چل کر ، اس نوعیت کی احادیث اس باب میں آئیں گی کہ جو شخص ایسا خواب دیکھے ، جو اُسے پسند ہو ۔