مجمع الزوائد ومنبع الفوائد

سیدنا عبداللہ بن عمر رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” سب سے بڑا جھوٹ یہ ہے کہ کوئی شخص ، اپنے باپ کے علاوہ کسی اور کی طرف خود کو منسوب کرے ، اور سب سے بڑا جھوٹ یہ ہے کہ کوئی شخص اپنی آنکھوں کو وہ چیز دکھائے ، جو انہوں نے نہ دیکھی ہو ( یعنی جھوٹا خواب بیان کرے ) اور کوئی شخص زمین کے ( حد بندی کے ) نشانات تبدیل کرے “ ۔
یہ روایت امام أحمد نے نقل کی ہے اور اس کی سند میں ایک راوی ابوعثمان عباس بن فضل بصری ہے اور وہ متروک ہے ۔

سیدنا علی رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص جان بوجھ کر ، خواب کے بارے میں جھوٹ بولے : گا ، قیامت کے دن اُسے اس بات کا پابند کیا جائے گا کہ وہ جو ( کے دانوں میں ) گرہ لگائے “ ۔ ( علامہ ہیثمی فرماتے ہیں : ) میں یہ کہتا ہوں
یہ روایت امام ترمذی نے نقل کی ہے ، تاہم انہوں نے ” جان بوجھ کر“ کے الفاظ نقل نہیں کیے ہیں ۔
یہ روایت امام أحمد نے نقل کی ہے اس کی سند میں ایک راوی عبدالاعلیٰ بن عامر ثعلبی ہے اور وہ ضعیف ہے ۔

سیدنا ابوشریح خزاعی رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” اللہ تعالیٰ کے بارے میں ، لوگوں میں سب سے زیادہ سرکش وہ شخص ہے ، جو اپنے قاتل کے علاوہ کسی کو قتل کرے ، یا زمانہ اسلام میں زمانہ جاہلیت کے کسی خون کا بدلہ طلب کرے ، یا اپنی آنکھوں کو نیند کے حوالے سے وہ چیز دکھائے ، جو انہوں نے نہیں دیکھی ( یعنی جھوٹا خواب بیان کرے ) “ ۔
( علامہ ہیثمی فرماتے ہیں : ) میں یہ کہتا ہوں :
یہ روایت ” صحیح “ میں مذکور ہے ، تاہم اس میں یہ الفاظ نہیں ہیں : ” وہ اپنی آنکھوں کو دکھائے ۔ ۔ ۔ ۔ ۔ ۔ ۔ “ ۔
یہ روایت امام أحمد اور امام طبرانی نے نقل کی ہے اور اس کے رجال صحیح کے رجال ہیں ۔