مجمع الزوائد ومنبع الفوائد

سیدنا انس بن مالک رضی اللہ عنہ بیان کرتے ہیں : نبی اکرم صلی اللہ علیہ وسلم مکہ میں کچھ لوگوں کے پاس سے گزرے ان لوگوں نے آپ کے پیچھے آپ پر تنقید کرنا شروع کی اور یہ کہنا شروع کیا کہ یہ وہ صاحب ہیں جو یہ کہتے ہیں : وہ نبی ہیں ۔ سیدنا جبرائیل علیہ السلام نبی اکرم صلی اللہ علیہ وسلم کے ساتھ تھے ۔ انہوں نے اپنی انگلی کے ذریعے ایک شخص کو ٹہوکہ دیا ( یا اشارہ کیا ) تو ان کے جسموں میں پھوڑے کی مانند نمودار ہوا ، اور وہ چیز زخم بن گئی ، یہاں تک کہ ان کے جسم بد بودار ہو گئے ، کوئی شخص ان کے قریب نہیں جا سکتا تھا ، تو اللہ تعالی نے یہ آیت نازل کی : ” مذاق اڑانے والوں کے مقابلے میں ہم نے تمہاری کفایت کر دی ہے “ ۔
یہ روایت امام طبرانی نے معجم اوسط میں نقل کی ہے ، اور امام بزار نے اس کی مانند نقل کی ہے ۔ اس کی سند میں ایک راوی یزید بن درہم ہے ، جسے یحییٰ بن معین نے ضعیف قرار دیا ہے ، اور فلاس نے اسے ثقہ کہا: ہے ۔

سیدنا عبداللہ بن عباس رضی اللہ عنہما بیان کرتے ہیں : ( ارشاد باری تعالیٰ ہے : ) ” بے شک مذاق اُڑانے والوں کے مقابلے میں ہم نے تمہاری کفایت کر دی ہے “ ۔ سیدنا ابن عباس رضی اللہ عنہما کہتے ہیں : مذاق اڑانے والے لوگ یہ تھے ولید بن مغیرہ ، اسود بن عبديغوث ، اسود بن مطلب ، ابوزمعہ جس کا تعلق بنواسد بن عبدالعزیٰ سے ہے ، حارث بن عیطل سہی ، عاص بن وائل سہمی سیدنا جبرائیل علیہ السلام نبی اکرم صلی اللہ علیہ وسلم کے پاس آئے نبی اکرم صلی اللہ علیہ وسلم ان کے سامنے ان لوگوں کی شکایت کی نبی اکرم صلی اللہ علیہ وسلم نے سیدنا جبرائیل علیہ السلام کو ولید بن مغیرہ دکھایا سیدنا جبرائیل علیہ السلام نے اس کی ابجل نامی رگ کی طرف اشارہ کیا ۔ نبی اکرم صلی اللہ علیہ وسلم نے دریافت کیا : کیا تم نے کچھ کیا ہے ؟ سیدنا جبرائیل علیہ السلام نے کہا: آپ کے لئے میں نے اس کے حوالے سے کفایت کر دی ہے پھر نبی اکرم صلی اللہ علیہ وسلم نے انہیں حارث بن عیطل سہمی دکھایا سیدنا جبرائیل علیہ السلام نے اس کے پیٹ کی طرف اشارہ کیا ۔ نبی اکرم صلی اللہ علیہ وسلم نے دریافت کیا : کیا تم نے کچھ کیا ہے ۔ انہوں نے کہا: آپ کی خاطر میں نے اس کے حوالے سے کفایت کر دی ہے پھر نبی اکرم صلی اللہ علیہ وسلم نے انہیں عاص بن وائل دکھایا انہوں نے اس کی اخمس نامی رگ کی طرف اشارہ کیا ۔ نبی اکرم صلی اللہ علیہ وسلم نے دریافت کیا : کیا تم نے کچھ کیا ہے ، تو انہوں نے کہا: میں نے اس کے حوالے سے آپ کی کفایت کر دی ہے ۔ جہاں تک ولید بن مغیرہ کا تعلق ہے ، تو وہ خزاعہ قبیلے سے تعلق رکھنے والے ایک شخص کے پاس سے گزرا جو اپنے تیر درست کر رہا تھا ، تو اس کی ابجل نامی رگ کے اوپر وہ تیر لگا اور اس نے اس رگ کو کاٹ دیا جہاں تک اسود بن مطلب کا تعلق ہے ، تو وہ نابینا ہو گیا ان میں سے کسی شخص نے یہ کہا: ہے کہ وہ ویسے ہی نابینا ہو گیا تھا اور بعض حضرات نے یہ بات بیان کی ہے کہ وہ ایک درخت کے نیچے ٹھہرا ہوا تھا اس نے یہ کہنا شروع کیا : اے میرے بیٹو کیا تم اسے مجھ سے دور نہیں کرتے ہو میں ہلاکت کا شکار ہو گیا ہوں میری آنکھوں میں کانٹا چبھ گیا ہے ، تو وہ لوگ کہنے لگے ہمیں تو کچھ نظر نہیں آ رہا ہے ، تو اسی طرح کی صورت حال رہی یہاں تک کہ اس شخص کی دونوں آنکھوں کی بینائی ختم ہو گئی ۔ جہاں تک اسود بن عبدیغوث کا تعلق ہے ، تو اس کے سر میں پھوڑا نکلا اور وہ اس کی وجہ سے مر گیا ۔ جہاں تک حارث بن عیطل کا تعلق ہے ، تو اس کے پیٹ میں زرد پانی بھر گیا یہاں تک کہ اس کے منہ سے اس کا پاخانہ باہر آنے لگا ۔ جہاں تک عاصم بن وائل کا تعلق ہے ، تو اس کی ٹانگ میں ایک کانٹا لگا جس کی وجہ سے زخم بھر گیا اور وہ مر گیا ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی محمد بن عبدالحکیم نیشا پوری ہے ، اور میں اس سے واقف نہیں ہوں اس روایت کے بقیہ رجال ثقہ ہیں ۔

سیدنا عبداللہ بن عباس رضی اللہ عنہما بیان کرتے ہیں : مذاق اڑانے والے لوگ آٹھ تھے ولید بن مغیرہ ، ابوزمعہ یہ اسود بن مطلب ہے ، اسود بن عبدیغوث اور عاص بن وائل ۔ وہ بیان کرتے ہیں : یہ سب لوگ غزوہ بدر کے موقع پر موت یا بیماری کے عالم میں قتل ہوئے اور حارث بن قیس یہ عیاطل میں سے تھا ۔
( علامہ ہیثمی فرماتے ہیں : ) میں یہ کہتا ہوں : اپنے پاس موجود نسخے میں ، میں نے
یہ روایت اسی طرح پائی ہے جس نسخے سے میں نے اسے نقل کیا ہے ، اور اس کے رجال ثقہ ہیں ، البتہ یہ بے ڈول ( یا غیر مناسب ) ہے ، اور بظاہر یہ لگتا ہے کہ اس روایت کا کچھ حصہ ساقط ہے ۔