مجمع الزوائد ومنبع الفوائد

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم نے ارشاد فرمایا : ” تم لوگ زنا سے بچو ! کیونکہ اس میں چار چیزیں پائی جاتی ہیں وہ چہرے کی رونق رخصت کر دیتا ہے رزق کو ختم کر دیتا ہے رحمان کو ناراض کر دیتا ہے ، اور جہنم میں ہمیشگی کا باعث بنتا ہے “ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی عمرو بن جمیع ہے ، اور وہ متروک ہے ۔

سیدنا عبدالله بن بسر رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” زنا کرنے والے لوگ جب آئیں گے ، تو ان کے چہرے آگ سے جل رہے ہوں گے “ ۔
یہ روایت امام طبرانی نے محمد بن عبداللہ بن بسر کے حوالے سے ان کے والد سے نقل کی ہے میں ان سے واقف نہیں ہوں اس روایت کے بقیہ رجال ثقہ ہیں ۔

سیدنا عبداللہ بن یزید رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” اے عربوں کے ہلاک ہونے والو ! اے عربوں کے ہلاک ہونے والو ! مجھے تم لوگوں کے بارے میں سب سے زیادہ اندیشہ زنا کے حوالے سے اور پوشیدہ شہوت کے حوالے سے ہے “ ۔
یہ روایت امام طبرانی نے دو اسناد کے ساتھ نقل کی ہے جن میں سے ایک کے رجال صحیح کے رجال صرف عبداللہ بن بدیل بن ورقاء کا معاملہ مختلف ہے ، اور وہ ثقہ ہے ۔

سیدنا سلمان فارسی رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” تین لوگ جنت میں داخل نہیں ہوں گے بوڑھا زانی ، جھوٹا حکمران اور غریب متکبر “ ۔
یہ روایت امام بزار نے نقل کی ہے ، اور اس کے رجال صحیح کے رجال ہیں صرف عباس بن ابوطالب کا معاملہ مختلف ہے ، اور وہ ثقہ ہے ۔

سیدنا جابر بن عبداللہ رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جب اہل ذمہ پر ظلم کیا جائے ، تو حکمرانی دشمن کے پاس چلی جاتی ہے جب زنا بکثرت ہو جائے ، تو قیدی بکثرت ہو جاتے ہیں ، اور جب قوم لوط کا سا عمل زیادہ ہو جائے ، تو اللہ تعالیٰ مخلوق سے اپنا ہاتھ اٹھا لیتا ہے ، اور پھر وہ اس بات کی پرواہ نہیں کرتا کہ وہ ( لوگ ) کون سی وادی میں ہلاکت کا شکار ہوتے ہیں “ ۔
یہ روایت امام طبرانی نے نقل کی ہے ۔ اس کی سند میں ایک راوی عبدالخالق بن زید بن واقد ہے ، اور وہ ضعیف ہے ۔

سیدنا ابوہریرہ رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” قیامت کے دن اللہ تعالیٰ بوڑھے زانی مرد اور بوڑھی زانی عورت کی طرف نظر نہیں کرے گا “ ۔
یہ روایت امام طبرانی نے معجم اوسط میں اپنے استاد موسیٰ بن سہل کے حوالے سے نقل کی ہے ، اور میں اس سے واقف نہیں ہوں اس روایت کے بقیہ رجال ثقہ ہیں ۔

سیدنا عبداللہ بن عمر رضی اللہ عنہما بیان کرتے ہیں : نبی اکرم صلی اللہ علیہ وسلم نے ارشاد فرمایا : ” اللہ تعالیٰ بوڑھے زانی اور غریب متکبر کی طرف نظر نہیں کرے گا “ ۔
یہ روایت امام طبرانی نے نقل کی ہے ۔ اس کی سند میں ایک راوی ابن لہیعہ ہے اس کی نقل کردہ حدیث حسن ہے اس میں ضعف پایا جاتا ہے ۔ اس روایت کے بقیہ رجال ثقہ ہیں ۔

نبی اکرم صلی اللہ علیہ وسلم کے غلام نافع بیان کرتے ہیں : نبی اکرم صلی اللہ علیہ وسلم نے ارشاد فرمایا : غریب متکبر ، بوڑھا زانی اور اپنے عمل کے حوالے سے اللہ تعالیٰ پر احسان جتلانے والا شخص جنت میں داخل نہیں ہوں گے “ ۔
یہ روایت امام طبرانی نے نقل کی ہے ۔ اس کی سند میں تابعی صباح بن خالد بن ابوامیہ نامی شخص ہے ، اور میں اس سے واقف نہیں ہوں اس روایت کے بقیہ رجال ثقہ ہیں ۔

سیدنا بریدہ رضی اللہ عنہ بیان کرتے ہیں : ” سات آسمان اور سات زمینیں ، بوڑھے زانی پر لعنت کرتے ہیں ، اور زنا کرنے والوں کی شرمگاہوں کی بو اہل جہنم کو بھی اذیت دے گی “ ۔

سیدنا بریدہ رضی اللہ عنہ کے حوالے سے ، نبی اکرم صلی اللہ علیہ وسلم سے ، اس کی مانند روایت منقول ہے ۔ یہ دونوں روایات امام بزار نے نقل کی ہیں ، اور ان دونوں کی سند میں ایک راوی صالح بن حیان ہے ، اور وہ ضعیف ہے ۔