مجمع الزوائد ومنبع الفوائد

سیدنا عبداللہ بن مسعود رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” دونوں آنکھیں زنا کرتی ہیں دونوں پاؤں زنا کرتے ہیں ، اور شرمگاہ زنا کرتی ہے “ ۔
یہ روایت امام أحمد نے اور امام ابویعلیٰ نے نقل کی ہے ، اور انہوں نے یہ الفاظ زائد نقل کیے ہیں : ” اور دونوں ہاتھ زنا کرتے ہیں “ ۔ امام بزار اور امام طبرانی دونوں کی سند عمدہ ہے ۔

سیدنا ابوموسی رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” ہر آنکھ زنا کرتی ہے “ ۔
یہ روایت امام بزار اور امام طبرانی نے نقل کی ہے ، اور ان دونوں کے رجال ثقہ ہیں ۔

محمد بن مطرف بیان کرتے ہیں : میرے دادا نے مجھے یہ بات بتائی ہے کہ میں نے نبی اکرم صلی اللہ علیہ وسلم کے صحابی سیدنا علقمہ رضی اللہ عنہ کو یہ بیان کرتے ہوئے سنا ہے ۔ نبی اکرم صلی اللہ علیہ وسلم نے ارشاد فرمایا ہے : ” دونوں آنکھوں کا زنا ، دیکھنا ہے “ ۔
یہ روایت امام طبرانی نے نقل کی ہے محمد بن مطرف کے دادا سے میں واقف نہیں ہوں اس روایت کے بقیہ رجال ثقہ ہیں ۔

سہل بن ابوامامہ بیان کرتے ہیں : وہ اور ان کے والد سیدنا انس بن مالک رضی اللہ عنہ کی خدمت میں حاضر ہوئے یہ سیدنا عمر بن عبدالعزیز کے زمانے کی بات ہے وہ امیر تھے انہوں نے مختصر نماز پڑھائی یوں جیسے مسافر کی نماز ہو یا اس کے قریب کی نماز پڑھائی جب انہوں نے سلام پھیر دیا ، تو انہوں نے کہا: اللہ تعالیٰ آپ پر رحم کرے کیا آپ نے فرض نماز ادا کی ہے یا آپ نے کوئی نفل نماز ادا کی ہے ۔ انہوں نے کہا: یہ فرض نماز تھی اور یہ اللہ کے رسول کی نماز تھی میں نے اس میں کوئی کوتاہی نہیں کی اور نہ ہی اس کے بارے میں بھول کا شکار ہوا ہوں ۔ نبی اکرم صلی اللہ علیہ وسلم نے ارشاد فرمایا ہے : ” تم اپنے اوپر سختی نہ کرو ورنہ تم پر سختی کی جائے گی کچھ لوگوں نے اپنے اوپر سختی کی تو اللہ تعالیٰ نے ان پر سختی مسلط کر دی ان لوگوں کے بقایا ( افراد ) گرجا گھروں اور عبادت خانوں میں باقی ہیں ( ارشاد باری تعالیٰ ہے : ) ” اور رہبانیت کو انہوں نے خود ایجاد کیا تھا وہ ہم نے ان پر لازم نہیں کی تھی “ ۔ پھر جب اگلا دن آیا تو لوگوں نے کہا: اب ہم سوار ہو کر جائزہ لیں گے ، اور تحقیق کریں گے انہوں نے کہا: ٹھیک ہے پھر وہ سب لوگ سوار ہو گئے ، تو وہاں ایک ویرانہ تھا ، جہاں آبادی ختم ہو چکی تھی اور صرف کھنڈرات باقی رہ گئے تھے ، لوگوں نے کہا: کیا آپ اس جگہ کو پہچانتے ہیں ؟ انہوں نے فرمایا : اس جگہ اور یہاں کے رہنے والوں سے مجھ سے زیادہ کوئی واقف نہیں ہے ، یہ اس علاقے کے لوگ ہیں ، جنہیں زنا اور حسد نے ہلاکت کا شکار کر دیا ، بے شک حسد ، نیکیوں کو بجھا دیتا ہے ، اور سرکشی ، اس کی تصدیق کرتی ہے ، یا اس کی تکذیب کرتی ہے ، آنکھ زنا کرتی ہے ، ہتھیلی ، پاؤں ، ہاتھ اور زبان ( زنا کرتے ہیں ) اور شرمگاہ اُن کی تصدیق کرتی ہے یا اس کو جھٹلا دیتی ہے ۔
یہ روایت امام ابویعلیٰ نے نقل کی ہے ، اور اس کے رجال صحیح کے رجال ہیں صرف سعید بن عبدالرحمن بن ابوعمياء کا معاملہ مختلف ہے ، اور وہ ثقہ ہے ۔

امام شعبی بیان کرتے ہیں : ( ارشاد باری تعالیٰ ہے : ) ” اگر تمہیں یہ ( مطلوبہ یا پسندیدہ ، حکم یا فیصلہ ) دیدیا جائے ، تو تم قبول کر لینا اور اگر تمہیں ( تمہارا مطلوبہ حکم یا فیصلہ ) نہیں دیا جاتا ، تو تم ( اس کو قبول کرنے سے ) پرہیز کرنا “ ۔ انہوں نے صوریا کے دو بیٹوں کا ذکر کیا کہ جب نبی اکرم صلی اللہ علیہ وسلم ان کے پاس تشریف لائے ، اور آپ نے ان دونوں سے فرمایا : اس ذات کی قسم ! جس نے تورات کو سیدنا موسیٰ علیہ السلام پر نازل کیا اور جس نے سمندر کو چیر دیا ، اور اس ذات کی قسم ! جس نے تم لوگوں پر من و سلوی نازل کیا تم لوگ زیادہ بہتر جانتے ہو ۔ ان دونوں نے کہا: ہم اپنی قوم کو یہ عطیہ ( یا سہولت ) دیتے ہیں ، پھر ان دونوں میں سے ایک نے کہا: یہ ہمیں اس طرح کا واسطہ دے رہے ہیں نبی اکرم صلی اللہ علیہ وسلم نے فرمایا : کیا تم لوگوں نے یہ بات پائی ہے کہ دیکھنا بھی زنا ہے ، اور گلے لگانا بھی زنا ہے ، اور بوسہ لینا بھی زنا ہے ۔ ۔ ۔ ۔ ۔ ۔ ۔ اس کے بعد راوی نے حسب سابق حدیث ذکر کی ہے ۔
یہ روایت امام ابویعلیٰ نے نقل کی ہے ، اور
یہ روایت مرسل ہے ، اور اس کے رجال ثقہ ہیں ۔

سیدنا واثلہ رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” خواتین کا ایک دوسرے سے جنسی تعلق زنا ہے “ ۔
یہ روایت امام طبرانی نے نقل کی ہے یہی روایت امام ابویعلیٰ نے بھی نقل کی ہے ، اور ان کے الفاظ یہ ہیں : نبی اکرم صلی اللہ علیہ وسلم نے ارشاد فرمایا : ” خواتین کا جنسی تعلق زنا ہے “ ۔ اس کے رجال ثقہ ہیں ۔