مجمع الزوائد ومنبع الفوائد

سیدنا سائب بن یزید رضی اللہ عنہ بیان کرتے ہیں : ایک شخص کو نبی اکرم صلی اللہ علیہ وسلم کے پاس لایا گیا لوگوں نے عرض کی : یا رسول اللہ ! اس شخص نے ایک اونٹ چوری کیا ہے ( راوی کو شک ہے شاید یہ الفاظ ہیں : ) ایک جانور چوری کیا ہے ۔ نبی اکرم صلی اللہ علیہ وسلم نے فرمایا : اس کے بارے میں میرا یہ خیال نہیں ہے کہ اس نے ایسا کیا ہو گا ، لوگوں نے عرض کی : یا رسول اللہ ! اس نے چوری کی ہے پھر نبی اکرم صلی اللہ علیہ وسلم نے فرمایا : اس کے بارے میں میرا یہ خیال نہیں ہے کہ اس نے ایسا کیا ہو گا ، یہاں تک کہ اس شخص نے اپنے خلاف گواہیاں دیں تو نبی اکرم صلی اللہ علیہ وسلم نے فرمایا : تم اسے لے جاؤ اور اس کا ہاتھ کاٹ دو پھر اسے میرے پاس لے کر آنا لوگ اسے لے گئے اور انہوں نے اس کا ہاتھ کاٹ دیا پھر وہ اسے لے کر نبی اکرم صلی اللہ علیہ وسلم کے پاس آئے تو نبی اکرم صلی اللہ علیہ وسلم نے ارشاد فرمایا : تمہارا ستیاناس ہو تم اللہ تعالیٰ کی بارگاہ میں توبہ کرو اس نے عرض کی : میں اللہ تعالیٰ کی بارگاہ میں توبہ کرتا ہوں ۔ نبی اکرم صلی اللہ علیہ وسلم نے فرمایا : اے اللہ ! تو اس کی توبہ قبول فرما ۔
یہ روایت امام طبرانی نے نقل کی ہے ، اور اس کے رجال صحیح کے رجال ہیں ۔

امام شعبی بیان کرتے ہیں : شراحہ ہمدانیہ سیدنا علی رضی اللہ عنہ کے پاس آئی اور بولی: میں نے زنا کا ارتکاب کیا ہے ۔ سیدنا علی رضی اللہ عنہ نے فرمایا : شاید تم مزاج کی تیزی کی وجہ سے ایسا کہہ رہی ہو شاید تم نے یہ چیز خواب میں دیکھی تھی شاید تمہارے ساتھ زبردستی کی گئی تھی ہر مرتبہ اس عورت نے یہی جواب دیا : جی نہیں ۔

ایک روایت میں یہ الفاظ ہیں : ” شاید تمہارے شوہر نے تمہارے ساتھ وظیفہ زوجیت ادا کیا تھا “ ۔
یہ روایت امام أحمد نے نقل کی ہے ، اور اس کے رجال صحیح کے رجال ہیں ۔