مجمع الزوائد ومنبع الفوائد

اسلم ابوعمران تجیبی بیان کرتے ہیں : انہوں نے سیدنا ابوایوب انصاری رضی اللہ عنہ کو یہ بیان کرتے ہوئے سنا ہے : ” جنگ بدر کے دن ہم نے صف قائم کی ہم میں سے ایک شخص آگے نکلا ، تو نبی اکرم صلی اللہ علیہ وسلم نے ان لوگوں کی طرف دیکھ کر ارشاد فرمایا : میرے ساتھ رہو ! میرے ساتھ رہو ! “ ۔ عبداللہ نامی راوی بیان کرتے ہیں : میرے والد نے اسی طرح بیان کیا ہے اور انہوں نے یہ الفاظ نقل کیے ہیں : ہم نے غزوہ بدر کے دن صف بنائی ۔
یہ روایت امام أحمد نے نقل کی ہے ۔ اس کی سند میں ایک راوی ابن لہیعہ ہے اس میں ضعف پایا جاتا ہے صحیح قول یہ ہے کہ سیدنا ابوایوب انصاری رضی اللہ عنہ نے غزوہ بدر میں شرکت نہیں کی ہے باقی اللہ بہتر جانتا ہے ۔

سیدنا ابوسعید خدری رضی اللہ عنہ بیان کرتے ہیں نبی اکرم صلی اللہ علیہ وسلم کے ساتھ جب ہم دشمن کے مقابلے میں موجود ہوتے تھے ، تو ہم میں سے ہر شخص اس بات کا بھرپور خیال رکھتا تھا کہ جب تیراندازی کے لئے جنگ کے دوران صف بندی کی جائے تو اس کے بھائی کا گھٹنا آگے نہ ہو جائے وہ شخص یہ کہتا تھا اپنے گھٹنے کا خیال کرو ، کیونکہ میں بھی اسی طرح ( شہادت کا ) طلبگار ہوں جس طرح تم طلبگار ہو اللہ تعالیٰ نے ارشاد فرمایا ہے : وہ لوگ سیسہ پلائی ہوئی دیوار کی مانند ہوتے تھے “ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی ابوہارون عبدی ہے اور وہ متروک ہے ۔ اس سے پہلے سیدنا ابوامامہ رضی اللہ عنہ کے حوالے سے منقول حدیث گزر چکی ہے ، جو جہاد کی فضیلت سے متعلق باب کے آخر میں اللہ کی راہ میں صف بندی کے دوران آدمی کے کھڑا ہونے کی فضیلت کے بارے میں ہے ۔

سیدنا عمران بن حصین رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” آدمی کا اللہ کی راہ میں ( جنگ کے دوران ) صف میں کھڑا ہونا اس کے ساٹھ سال عبادت کرنے سے زیادہ فضیلت رکھتا ہے “ ۔
یہ روایت امام طبرانی نے معجم کبیر اور معجم اوسط میں نقل کی ہے ۔ امام بزار نے بھی اس کی مانند روایت نقل کی ہے ان کے الفاظ یہ ہیں : ” تم میں سے کسی ایک شخص کا صف میں گھڑی بھر کے لئے کھڑا ہونا ۔ ۔ ۔ ۔ ۔ ۔ “ ۔ اس کی سند میں ایک راوی عبداللہ بن صالح ہے ، جو لیث کا کاتب ہے ۔ امام أحمد اور دیگر حضرات نے اسے ثقہ قرار دیا ہے ۔ امام بزار کے رجال ثقہ ہیں ۔