مجمع الزوائد ومنبع الفوائد

سیدہ ام لیلی رضی اللہ عنہا بیان کرتی ہیں ہم نے نبی اکرم صلی اللہ علیہ وسلم کی بیعت کی آپ نے ہم سے جو عہد لیا تھا اس میں یہ بات بھی تھی کہ ہم گہرا خضاب لگائیں گی اور بال دھونے کے بعد کنگھی کریں گی اور اپنے ہاتھوں میں ہمیشہ مہندی لگا کے رکھیں گی ۔ وہ خاتون بیان کرتی ہیں ۔ نبی اکرم صلی اللہ علیہ وسلم نے ہمیں یہ حکم دیا کہ جب ہم میں سے کوئی ایک عورت اس بات کی قدرت رکھتی ہو کہ اپنے ہاتھوں میں چاندی کے بنے ہوئے کنگن پہن لے ( تو اسے ایسا کرنا چاہیے ) اور اگر وہ اس کی قدرت نہیں رکھتی ، تو وہ اپنے دونوں ہاتھوں پر مہندی لگا لے خواہ وہ سیر ( نامی بوٹی ) ہی کی ہو ، آپ نے فرمایا : تم خواتین ، مردوں کے ساتھ مشابہت اختیار نہ کرو ۔
یہ روایت امام طبرانی نے معجم اوسط اور معجم کبیر میں ایک ہی سند کے ساتھ دو مرتبہ نقل کی ہے ۔ اس کی سند میں ایسا راوی ہے جس سے میں واقف نہیں ہوں ۔

ایک خاتون ، جنہوں نے نبی اکرم صلی اللہ علیہ وسلم کی اقتداء میں دونوں قبلوں کی طرف رخ کر کے نماز ادا کی ہے ، وہ بیان کرتی ہیں : نبی اکرم صلی اللہ علیہ وسلم میرے ہاں تشریف لائے آپ نے فرمایا : تم خضاب ( یعنی ہاتھوں پر مہندی ) لگاؤ ، تم ( خواتین ) میں سے کوئی ایک خضاب ( یعنی مہندی لگانے کو ) کو ترک کر دیتی ہے ، یہاں تک کہ اس کا ہاتھ ، مرد کے ہاتھ کی طرح ہو جاتا ہے ۔ راوی کہتے ہیں : ، تو اس خاتون نے کبھی خضاب ( یعنی مہندی لگانا ) ترک نہیں کیا حالانکہ ان کی عمر اسی سال ہو چکی تھی ۔
یہ روایت امام أحمد نے نقل کی ہے ۔ اس کی سند میں ایسے راوی ہیں جن سے میں واقف نہیں ہوں ، اور ایک راوی ابن اسحاق ہے ، اور وہ مدلس ہے ۔

سیدنا عبداللہ بن عمر رضی اللہ عنہما بیان کرتے ہیں : نبی اکرم صلی اللہ علیہ وسلم کی خدمت میں کچھ انصاری خواتین حاضر ہوئیں نبی اکرم صلی اللہ علیہ وسلم نے فرمایا : ” اے انصار کی خواتین ! تم ڈبو کر خضاب لگاؤ ( یعنی پورے ہاتھ پر مہندی لگاؤ ) اور ( لڑکیوں کا ) ختنہ کرنے ہوئے مبالغہ نہ کرو ، کیونکہ یہ تمہارے شوہروں کے نزدیک زیادہ پسندیدہ ہو گا ، اور تم نعمت دینے والوں ( یعنی شوہروں ) کی ناشکری سے بچ کے رہنا “ ۔ مندل نامی راوی کہتے ہیں : اس سے مراد شوہر ہیں ۔
یہ روایت امام بزار نے نقل کی ہے ۔ اس کی سند میں ایک راوی مندل بن علی ہے ، اور وہ ضعیف ہے اس کی ، توثیق کی گئی ہے اس کے بقیہ رجال ثقہ ہیں ۔

سیدنا عبداللہ بن عباس رضی اللہ عنہما بیان کرتے ہیں : ایک خاتون نبی اکرم صلی اللہ علیہ وسلم کی خدمت میں آپ کی بیعت کرنے کے لئے حاضر ہوئی اس خاتون نے مہندی نہیں لگائی ہوئی تھی ، تو نبی اکرم صلی اللہ علیہ وسلم نے اس سے بیعت نہیں لی جب تک اس نے مہندی نہیں لگا لی ۔
یہ روایت امام بزار نے نقل کی ہے ۔ اس کی سند میں ایک راوی لیث بن ابوسلیم ہے ، اور وہ مدلس ہے اس روایت کے بقیہ رجال ثقہ ہیں ۔

سیدہ سوداء ، رضی اللہ عنہا بیان کرتی ہیں : میں آپ کی خدمت میں آپ کی بیعت کرنے کے لئے حاضر ہوئی آپ نے فرمایا : تم جاؤ اور مہندی لگاؤ اور پھر آنا تاکہ میں تم سے بیعت لے لوں ۔
یہ روایت امام طبرانی نے معجم اوسط اور معجم کبیر میں نقل کی ہے ۔ اس کی سند میں ایسا راوی ہے جس سے میں واقف نہیں ہوں ۔

سیدنا مسلم بن عبدالرحمن رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو فتح مکہ کے موقع پر صفا پہاڑی پر خواتین سے بیت لیتے ہوئے دیکھا ایک خاتون آئی اس کا ہاتھ مرد کے ہاتھ کی طرح تھا ( یعنی اس پر مہندی نہیں لگی ہوئی تھی ) تو نبی اکرم صلی اللہ علیہ وسلم نے اس کی بیعت لینے سے انکار کر دیا یہاں تک کہ وہ خاتون گئی اور اس نے اپنے ہاتھ پر زرد رنگ ( کی مہندی لگائی ) ایک شخص آپ کی خدمت میں حاضر ہوا اس نے لوہے کی انگوٹھی پہنی ہوئی تھی نبی اکرم صلی اللہ علیہ وسلم نے ارشاد فرمایا : اللہ تعالیٰ ایسے ہاتھ کو پاک نہیں کرتا جس میں لوہے کی انگوٹھی موجود ہو ۔
یہ روایت امام طبرانی نے معجم اوسط میں نقل کی ہے ۔ اور امام بزار نے نقل کی ہے ۔ اور اس کی سند میں ایک راوی شمیسہ بنت نبہان ہے میں اس سے واقف نہیں ہوں ۔ اس روایت کے بقیہ رجال ثقہ ہیں ۔

سیدنا انس بن مالک رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” جب کوئی عورت اپنے شوہر کے علاوہ کسی اور کے لئے خوشبو لگاتی ہے ، تو وہ آگ ہے جو عیب میں ہوتی ہے “ ۔
یہ روایت امام طبرانی نے معجم اوسط میں نقل کی ہے ۔ اس کی سند میں دو خواتین ایسی ہیں جن سے میں واقف نہیں ہوں ۔