مجمع الزوائد ومنبع الفوائد

سیدہ عائشہ صدیقہ رضی اللہ عنہا بیان کرتی ہیں ۔ نبی اکرم صلی اللہ علیہ وسلم کی نماز کی مخصوص جگہ سے آپ کی مسواک آپ کی کنگھی جدا نہیں ہوتے تھے نبی اکرم صلی اللہ علیہ وسلم جب اپنی داڑھی مبارک سنوارتے تھے ، تو شیشے میں دیکھ لیتے تھے ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی سلیمان بن ارقم زہری ہے ، اور وہ ضعیف ہے ۔

سیدہ عائشہ صدیقہ رضی اللہ عنہا بیان کرتی ہیں پانچ چیزیں ہیں ، جنہیں نبی اکرم صلی اللہ علیہ وسلم سفر کے دوران اور مقیم ہونے کے دوران کبھی نہیں چھوڑتے تھے شیشہ ، سرمہ دانی ، کنگھی ، کھجانے والی چھڑی اور مسواک ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی اسماعیل بن یحیی ابوامیہ ہے ، اور وہ متروک ہے ۔

سیدہ ام درداء رضی اللہ عنہا بیان کرتی ہیں میں نے سیدہ عائشہ رضی اللہ عنہا سے دریافت کیا : جب آپ نبی اکرم صلی اللہ علیہ وسلم کے ساتھ سفر پر جاتی تھیں یا حج کے لیے جاتی تھیں یا آپ کے ساتھ کسی جنگ میں حصہ لینے کے لئے جاتی تھیں ، تو آپ نبی اکرم صلی اللہ علیہ وسلم کی کون سی چیزیں ساتھ رکھا کرتی تھیں ؟ انہوں نے بتایا : میں نبی اکرم صلی اللہ علیہ وسلم کے لئے زاد سفر تیار کرتی تھی اور اس میں تیل ، کنگھی ، آئینہ بال کاٹنے والی چیز ( یعنی قینچی ) سرمہ دانی اور مسواک رکھتی تھی ۔ ایک روایت میں یہ الفاظ ہیں : بال کاٹنے والی دو چیزیں ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی محمد بن حفص وصانی ہے ، اور وہ ضعیف ہے ۔