مجمع الزوائد ومنبع الفوائد

سیدنا عبدالرحمن بن عوف رضی اللہ عنہ کے بارے میں یہ بات منقول ہے کہ انہوں نے نبی اکرم صلی اللہ علیہ وسلم کی خدمت میں جوؤں کی شکایت کی ، تو نبی اکرم صلی اللہ علیہ وسلم نے انہیں یہ حکم دیا کہ وہ ریشم پہن لیں ۔
یہ روایت امام بزار نے اپنے استاد عبداللہ بن شبیب کے حوالے سے نقل کی ہے ۔ اور وہ ضعیف ہے ۔

ابراہیم بن ابوعبلہ بیان کرتے ہیں : میں نے سیدنا عبداللہ بن عمرو بن حرام انصاری رضی اللہ عنہ جنہیں دونوں قبلوں کی طرف نبی اکرم صلی اللہ علیہ وسلم کی اقتداء میں نماز پڑھنے کا شرف حاصل ہے ان کے جسم پر خز ( ریشم کی ایک قسم ) کا کپڑا دیکھا جو غبار آلود تھا ۔ ابراہیم نامی راوی نے اپنے ہاتھ کے ذریعے اپنے کندھوں کی طرف اشارہ کر کے یہ بات بیان کی ۔
یہ روایت امام أحمد نے اور امام طبرانی نے نقل کی ہے ۔ اس کی سند میں ایک راوی کثیر بن مروان ہے ، اور وہ انتہائی ضعیف ہے ۔

فضیل بن کثیر بیان کرتے ہیں : میں نے سیدنا انس بن مالک رضی اللہ عنہ کے جسم پر پیلاخز ( ریشم کی ایک قسم ) دیکھا ہے ۔
یہ روایت امام طبرانی نے نقل کی ہے ۔ اس کی سند میں ایک راوی ابوساسان ہے ، اور وہ ضعیف ہے ۔

سالم بن عبدالله عتکی بیان کرتے ہیں : میں نے سیدنا انس بن مالک رضی اللہ عنہ کے جسم پر خز ( ریشم کی ایک قسم ) کا جبہ دیکھا ہے ، اور چادر دیکھی ہے ، اور خز کا سیاہی مائل رومال دیکھا ہے ، اور سیاہ رنگ کا عمامہ دیکھا ہے ، جس کا شملہ پیچھے کی طرف لٹکا ہوا تھا انہوں نے زرد خضاب لگایا ہوا تھا ۔
یہ روایت امام طبرانی نے نقل کی ہے ۔ سالم نامی اس راوی سے میں واقف نہیں ہوں ۔ اس روایت کے بقیہ رجال ثقہ ہیں ۔

مستقیم بن عبدالملک بیان کرتے ہیں : میں نے سیدنا امام حسن رضی اللہ عنہ اور سیدنا امام حسین رضی اللہ عنہ کو خز کی جرابیں پہنے ہوئے دیکھا ہے ، اور میں نے انہیں دیکھا ہے کہ وہ تجارتی خچروں پر سواری کرتے تھے ۔
یہ روایت امام طبرانی نے اپنے استاد ابراہیم بن محمد ہلالی سے نقل کی ہے ۔ میں اس سے واقف نہیں ہوں ۔ اس روایت کے بقیہ رجال کو ابن حبان نے ثقہ قرار دیا ہے ۔

عیزار بن حریث بیان کرتے ہیں : میں نے سیدنا امام حسن بن علی رضی اللہ عنہ کے جسم پر ، خز کی سرخ چادر دیکھی ہے ۔
یہ روایت امام طبرانی نے نقل کی ہے ۔ اور اس کے رجال صحیح کے رجال ہیں ۔

سدی بیان کرتے ہیں : میں نے سیدنا امام حسین بن علی رضی اللہ عنہ کو دیکھا کہ انہوں نے خز کا عمامہ باندھا ہوا تھا اور عمامہ کے نیچے سے ان کے بال باہر آ رہے تھے ۔
یہ روایت امام طبرانی نے نقل کی ہے ۔ اور اس کے رجال ثقہ ہیں ۔

امام شعبی بیان کرتے ہیں : میں سیدنا امام حسین بن علی رضی اللہ عنہ کی خدمت میں حاضر ہوا ان کے جسم پر خز کا کپڑا تھا ۔
یہ روایت امام طبرانی نے نقل کی ہے ۔ اور اس کے رجال ثقہ ہیں ۔

ابوعکاشہ ہمدانی بیان کرتے ہیں : جس دن سیدنا امام حسین رضی اللہ عنہ کو شہید کیا گیا تو میں نے دیکھا کہ ان کے جسم پر سندس کی قباء تھی ۔
یہ روایت امام طبرانی نے نقل کی ہے ۔ ابوعکاشہ نامی راوی کو مجہول قرار دیا گیا ہے ، کیونکہ ابولیلیٰ کے علاوہ کسی نے اس سے روایت نقل نہیں کی ہے ۔ ابواسحاق نے اس سے روایت نقل کی ہے ۔ اس روایت کے بقیہ رجال صحیح کے رجال ہیں ۔

زرارہ بن اوفی بیان کرتے ہیں : میں نے سیدنا عمران بن حصین رضی اللہ عنہ کو خز پہنتے ہوئے دیکھا ہے ۔
یہ روایت امام طبرانی نے نقل کی ہے ۔ اور اس کے رجال صحیح کے رجال ہیں ۔

عمار بن ابوعمار بیان کرتے ہیں : میں نے سیدنا زید بن ثابت رضی اللہ عنہ سیدنا عبداللہ بن عباس رضی اللہ عنہما اور سیدنا ابوہریرہ رضی اللہ عنہ اور سیدنا ابوقتادہ رضی اللہ عنہ کو خز کے رومال ( یا چادریں ) پہنے ہوئے دیکھا ہے ۔
یہ روایت امام طبرانی نے نقل کی ہے ۔ اور اس کے رجال صحیح کے رجال ہیں ۔

محمد بن سیرین بیان کرتے ہیں : سیدنا عبداللہ بن عمر رضی اللہ عنہما کو خز کے رومال ( یا چادریں ) تحفے کے طور پر دی گئیں جن میں ایک سرخ رومال تھا ، تو وہ انہوں نے اپنے بیٹوں کے درمیان تقسیم کر دیں ۔
یہ روایت امام طبرانی نے نقل کی ہے ۔ اور اس کے رجال صحیح کے رجال ہیں ۔

عکرمہ بیان کرتے ہیں : سیدنا عبداللہ بن عباس رضی اللہ عنہما خز پہن لیا کرتے تھے ان سے اس بارے میں بات کی گئی ، تو انہوں نے فرمایا : خالص ریشم سے منع کیا گیا ہے ۔
یہ روایت امام طبرانی نے نقل کی ہے ۔ اور اس کے رجال ثقہ ہیں ۔

ہشام بن عروہ بیان کرتے ہیں : میں نے سیدنا عبداللہ بن زبیر رضی اللہ عنہما کے جسم پر سبز رنگ کی خز کی چادر دیکھی ہے ، جو سیدہ عائشہ رضی اللہ عنہا نے انہیں پہننے کے لئے دی تھی ۔
یہ روایت امام طبرانی نے نقل کی ہے ۔ اور اس کے رجال صحیح کے رجال ہیں ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم نے خالص ریشم سے منع کیا ہے جس کا تانا ( یا بانا ( کتان ، یا روئی کا ہو ، اس میں کوئی حرج نہیں ہے ۔
یہ روایت امام طبرانی نے نقل کی ہے ۔ اس کی سند میں ایک راوی اسماعیل بن مسلم مکی ہے ، اور وہ ضعیف ہے -

سیدنا عائذ بن عمرو رضی اللہ عنہ کے بارے میں یہ بات منقول ہے کہ وہ دھاری دار زین پر بیٹھ جاتے تھے اور خز پہن لیتے تھے وہ اس میں کوئی حرج نہیں سمجھتے تھے ۔
یہ روایت امام طبرانی نے نقل کی ہے ۔ اس کی سند میں راویوں کی ایک جماعت ایسی ہے ، جن سے میں واقف نہیں ہوں ۔