مجمع الزوائد ومنبع الفوائد

سیدنا عبداللہ بن عمر رضی اللہ عنہما بیان کرتے ہیں : نبی اکرم صلی اللہ علیہ وسلم نے میثرہ ، قسی ، سونے کی انگوٹھی اور مفدم سے منع کیا ہے یزید کہتے ہیں : مثیرہ جانوروں کی کھال ہوتی ہے قسی سے مراد ایسا کپڑا ہے جو ابریشم سے بنا ہوتا ہے اور مصر سے لایا جاتا ہے مفدم سے مراد معصفر کپڑا ہے ۔
( علامہ ہیثمی فرماتے ہیں : ) میں یہ کہتا ہوں امام ابن ماجہ نے اس میں سے مفدم اور سونے کی انگوٹھی کی ممانعت والا حصہ نقل کیا ہے ۔
یہ روایت امام أحمد نے نقل کی ہے ۔ اس کی سند میں ایک راوی یزید بن عطاء یشکری ہے ، اور وہ ضعیف ہے ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم نے ریشم اور سونا پہننے سے ، سونے اور چاندی کے برتنوں میں پینے سے سرخ میثرہ اور قسی پہننے سے منع کیا ہے ۔ سیدہ عائشہ رضی اللہ عنہا نے عرض کی : یا رسول اللہ ! تھوڑا سا سونا ، اس کے ذریعے کنگن کو باندھا جا سکتا ہے ؟ ( راوی کو شک ہے شاید یہ الفاظ ہیں : ) اس کے ذریعے ہم اس کو باندھ لیں ؟ نبی اکرم صلی اللہ علیہ وسلم نے فرمایا : جی نہیں ! تم اسے چاندی سے بناؤ ، پھر اس پر تھوڑا سا زعفران مل دو ۔ ( علامہ ہیثمی فرماتے ہیں : ) میں یہ کہتا ہوں امام ابن ماجہ نے اس کا کچھ حصہ نقل کیا ہے ۔
یہ روایت امام أحمد اور امام ابویعلیٰ نے نقل کی ہے ۔ اس کی سند میں ایک راوی خصیف ہے جس میں ضعف پایا جاتا ہے ایک جماعت نے اسے ثقہ قرار دیا ہے ۔

ابوزبیر بیان کرتے ہیں : میں نے سیدنا جابر رضی اللہ عنہ سے ارجوان کی میثرہ کے بارے میں دریافت کیا ، تو انہوں نے بتایا نبی اکرم صلی اللہ علیہ وسلم نے ارشاد فرمایا ہے : ” میں اسے پاکیزہ قرار نہیں دیتا ہوں ، اور میں ایسی قمیص نہیں پہنوں گا جس میں ریشم ہو اور میں قسی نہیں پہنوں گا “ ۔
یہ روایت امام أحمد نے نقل کی ہے ۔ اس کی سند میں ایک راوی ابن لہیعہ ہے اس کی نقل کردہ حدیث حسن ہے ، اور اس میں ضعف پایا جاتا ہے اس روایت کے بقیہ رجال صحیح کے رجال ہیں اور ثقہ ہیں ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم نے سونے کی انگوٹھی ، قسی ، سرخ میثرہ کو ، جو پیتل سے بھرا ہوا ہو ، اس کو ( استعمال کرنے سے ) منع کیا ہے ۔ ۔ ۔ ۔ ۔ ۔ ۔ ۔ اس کے بعد راوی نے حسب سابق روایت ذکر کی ہے ۔
یہ روایت امام ابویعلیٰ نے نقل کی ہے ۔ اور اس کے رجال صحیح کے رجال ہیں ۔

سیدنا جعدہ بن ہبیرہ رضی اللہ عنہ بیان کرتے ہیں : نبی اکرم صلی اللہ علیہ وسلم نے مجھے تین چیزوں سے منع کیا ہے یہ کہ میں سونے کی انگھوٹی پہنوں قسی پہننے اور میثرہ پہننے سے منع کیا ہے ۔
یہ روایت امام طبرانی نے نقل کی ہے ۔ اور اس کے رجال صحیح کے رجال ہیں ۔

سیدنا ثوبان رضی اللہ عنہ بیان کرتے ہیں : نبی اکرم صلی اللہ علیہ وسلم نے سونے کی انگھوٹی پہننے ، قسیہ ، معصفر کے کپڑے ، مفدم اور چیتے کی کھال سے منع کیا ہے ۔
یہ روایت امام طبرانی نے نقل کی ہے ۔ اس کی سند میں ایک راوی یزید بن ربیعہ رحبی ہے ، اور وہ متروک ہے ۔

ابولیلی بیان کرتے ہیں : مجھے اس گھر کے مالک سیدنا حریز رضی اللہ عنہ ( راوی کو شک ہے شاید یہ الفاظ ہیں : ) سیدنا ابوحریز رضی اللہ عنہ نے یہ بیان کی ہے وہ کہتے ہیں : جب میں نبی اکرم صلی اللہ علیہ وسلم کی خدمت میں حاضر ہوا تو آپ اس وقت خطبہ دے رہے تھے میں نے آپ کے پالان کی میثرہ چادر پر ہاتھ رکھا ، تو میں نے اس کو پایا کہ وہ بھیڑ کی کھال کی تھی ۔
یہ روایت امام طبرانی نے نقل کی ہے ۔ اس کی سند میں ایک راوی قیس بن ربیع ہے ، جسے شعبہ اور ثوری نے ثقہ قرار دیا ہے اس میں ضعف پایا جاتا ہے دو اسناد میں سے ایک کے بقیہ رجال ثقہ ہیں ۔